ខេត្តត្បូងឃ្មុំ ៖ ត្រីធ្វើប្រហុកផ្អកចាប់ផ្តើមត្រូវច្រើនហើយ គេឃើញអាជីវករបាននាំគ្នាទៅប្រមូលទិញតាមទូកអូសមាញ់ពីទន្លេមេគង្គ និងព្រែកពាមជីលាំង ដឹកតាមរថយន្តតូចៗយកមកលក់នៅផ្សារអូររាំងឪ នាព្រឹកថ្ងៃទី៧ មករា ។ ពេលនោះមានប្រជាពលរដ្ឋមកពីគ្រប់ទិសទីបាននាំគ្នាមកទិញ ត្រីដើម្បីយកទៅធ្វើប្រហុកផ្អកសម្រាប់ទុកទទួលទានក្នុងគ្រួសារច្រើនគួរសមដែរ ។
អាជីវករលក់ត្រីឈ្មោះ ហេង ឌឿន អាយុ៣៨ឆ្នាំ នៅភូមិគក ឃុំថ្មពេជ្រ ស្រុកត្បូងឃ្មុំ ប្រាប់ឲ្យដឹងថា គាត់បានទិញត្រីពីព្រែកពាមជីលាំង ប្រមាណជាង៣០០គីឡូក្រាម យកមកលក់នៅផ្សារអូររាំងឪ ដោយក្នុង១ជើងគាត់អាចសល់លុយជាង១០ម៉ឺនរៀលផងដែរ ប្រសិនបើត្រីត្រូវកាន់តែច្រើននោះគាត់ក៏ទទួលបានផលចំណេញកាន់តែច្រើនដែរ។
អាជីវករម្នាក់ទៀតឈ្មោះ សុខ សាន្ត អាយុ៣១ឆ្នាំ រស់នៅភូមិស្វាយតាធម្ម ឃុំអំពិលតាពក ស្រុកអូររាំងឪ ប្រាប់ឲ្យដឹងថា ត្រីដែលគាត់បានទិញពីតាមទូកមាញ់នៅខាងជីហែ ស្រុកកោះសូទិន បានជាង៥០០គីឡូក្រាម ដោយដឹកតាមរថយន្តយកមកលក់នៅផ្សារអូររាំងឪក្នុង១គីឡូក្រាមតម្លៃពី២.៣០០រៀលទៅ២.៥០០រៀល តាមប្រភេទត្រីល្អ ឬរាងអន់សាច់ ។ ក្នុងការប្រកបរបរទិញត្រីលក់នេះ គាត់ទើបតែដឹកបាន១ជើងនេះទេ និងបានឃើញពលរដ្ឋនាំគ្នា មកទិញត្រីធ្វើប្រហុកផ្អកជាច្រើននាក់ដើម្បីទុកទទួលទានតាមក្រុមគ្រួសារនីមួយៗ ហើយត្រីឆ្នាំនេះហាក់សម្បូរជាងឆ្នាំទៅ ។
ស្ត្រីចំណាស់ម្នាក់ឈ្មោះ នួន សាម៉ី អាយុ៦៣ឆ្នាំ រស់នៅភូមិព្រៃស្រឡៅ ឃុំអំពិលតាពក ប្រាប់ឲ្យដឹងដែរថា នៅឆ្នាំកន្លងទៅ គាត់បានទិញត្រីធ្វើប្រហុកផ្អកសម្រាប់ទុកទទួលទានបានប្រហែលជាង៦០គីឡូក្រាម ហើយមកដល់ឆ្នាំ២០១៧នេះ គាត់បានទិញធ្វើរួចរាល់ហើយដែរ គឺប្រហាក់ប្រហែលនឹងឆ្នាំទៅដែរ។ ជាក់ស្តែងនៅព្រឹកថ្ងៃទី៧ មករា គាត់ទិញត្រីប្រភេទស្លឹកឫស្សី ដើម្បីធ្វើផ្អកជូរមានតម្លៃ២.៤០០រៀលក្នុង១គីឡូក្រាម គឺទិញមិនច្រើននោះទេព្រោះថា ផ្អកជូរទុកមិនបានយូរទេ ។
តាមការកត់សម្គាល់ ត្រីនៅដើមឆ្នាំ២០១៧ នេះសម្បូរជាងឆ្នាំកន្លងទៅ ដោយសារតែឆ្នាំនេះ ទឹកទន្លេធំល្មមមិនដូចឆ្នាំមុនទេទឹកមានតែនៅពោះទន្លេប៉ុណ្ណោះ៕
ចែករំលែកព័តមាននេះ