ស្ទះចរាចរណ៍នៅម្តុំជម្ពូវ័នរាល់ថ្ងៃ អាជ្ញាធរពោធិសែនជ័យស្ងាត់ឈឹង
រាជធានីភ្នំពេញ ៖ ស្ទើរតែរៀងរាល់ព្រឹកល្ងាចនៅកំណាត់ផ្លូវជាតិលេខ៤ចាប់ពីចំណុចរង្វង់មូលចោមចៅទៅដល់ភ្លើងស្តុបផ្លូវកែងទំនប់កប់ស្រូវ
រាជធានីភ្នំពេញ ៖ ស្ទើរតែរៀងរាល់ព្រឹកល្ងាចនៅកំណាត់ផ្លូវជាតិលេខ៤ចាប់ពីចំណុចរង្វង់មូលចោមចៅទៅដល់ភ្លើងស្តុបផ្លូវកែងទំនប់កប់ស្រូវ ចរាចរណ៍បានកកស្ទះ ប៉ុន្តែពលរដ្ឋដែលធ្វើដំណើរអះអាងថា មិនសូវជាឃើញអាជ្ញាធរដែនដី ពិសេសប៉ូលិសប៉ុស្តិ៍នគរបាលរដ្ឋបាលចោមចៅ ឬ ប៉ូលិសខណ្ឌពោធិសែនជ័យ ចេញអន្តរាគមន៍ជួយសម្រួលការកកស្ទះនោះប៉ុន្មានឡើយ ។
ជាការកត់សម្គាល់ ការកកស្ទះស្ទើររាល់ថ្ងៃនៅតាមកំណាត់ផ្លូវខាងលើ មិនមែនតែដោយសារការជីកដាក់លូ ការពង្រីកផ្លូវ ឬក៍ការធ្វើជណ្តើរឆ្លងផ្លូវ ដែលមន្ទីរសាធារណការនិងដឹកជញ្ជូនរាជធានីភ្នំពេញបាននិងកំពុងដំណើរការស្ថាបនានោះទេ គឺការកកស្ទះនេះមានរាប់ខែឆ្នាំមកហើយ ពិសេសនៅចំណុចមុខផ្សារជម្ពូវ័នតែម្តង ដោយសារតែការចតរថយន្ត រ៉ឺម៉ក និងម៉ូតូកង់៣(តុកៗ) ជាដើមគ្មានសណ្តាប់ធ្នាប់ ។
ម្យ៉ាងទៀត កំណាត់ផ្លូវជាតិលេខ៤នេះដែរ រថយន្តកុងតឺន័រ យីឌុប និងរថយន្តធំៗដទៃទៀត បានបើកឆ្លងកាត់ទោះជាក្នុងពេលវេលាហាមឃាត់របស់សាលារាជធានីភ្នំពេញនោះក្តី ដែលបន្ថែមលើការកកស្ទះបណ្តាលមកពីការចតគ្មានសណ្តាប់នោះទៀត ។
ក្រុមប្រជាពលរដ្ឋ ក៍ដូចជាអ្នកធ្វើដំណើរឆ្លងកាត់ បានសំណូមពរដល់អាជ្ញាធរខណ្ឌពោធិសែនជ័យ ចាត់កម្លាំងចុះជួយសម្រួលចរាចរណ៍នៅកំណាត់ផ្លូវខាងលើនេះ ព្រោះការកកស្ទះបានប៉ះពាល់ដល់ការបំពេញការងារ និងមុខរបរទទួលទានរបស់មន្ត្រីរាជការ កងកម្លាំងប្រដាប់អាវុធ និយោជក បុគ្គលិក កម្មករ និងប្រជាពលរដ្ឋ ពិសេសនឹងអាចឲ្យពលរដ្ឋមួយចំនួនកើតជំងឺថប់អារម្មណ៍ និងឈានទៅកើតជំងឺផ្លូវចិត្តធ្ងន់ធ្ងរនោះថែមទៀត ៕
ចែករំលែកព័តមាននេះ