ខេត្តពោធិ៍សាត់ ៖ ក្មេងប្រុសម្នាក់បានស្លាប់ពេលដឹកដល់មន្ទីរពេទ្យ ដោយសារឈរផ្អែកសសរប៉ះចំតំណខ្សែភ្លើងបណ្ដាលឲ្យឆក់។ ហេតុការណ៍នេះ បានកើតឡើងកាលពីថ្ងៃទី៤ខែមករាកន្លងទៅ វេលាម៉ោង៦និង៤៥នាទីល្ងាចនៅនឹងផ្ទះរបស់ជនរងគ្រោះ ស្ថិតក្នុងភូមិផ្សារឃុំអន្លង់ត្នោត ស្រុកក្រគរ ។
សមត្ថកិច្ចឲ្យដឹងថា ក្មេងប្រុសរងគ្រោះឈ្មោះ អេង ស៊ីឡាង អាយុ១៤ឆ្នាំ ជាសិស្សរៀននៅអនុវិទ្យាល័យក្រគរ ។ នៅល្ងាចថ្ងៃនោះក្មេងប្រុសរូបនេះមិនបានដឹងថា ខ្សែភ្លើងត្រង់សសរផ្ទះមានមុខតំណរ ហើយបានដើរទៅផ្អែកក៏ចរន្ដឆក់តែម្ដង ។ ភ្លាមៗ ក្រុមគ្រួសារបានដឹកយកទៅព្យាបាលនៅមន្ទីរពេទ្យដែរ ប៉ុន្តែគ្រាន់តែយកទៅដល់ក៏ស្លាប់ទៅ ។សមត្ថកិច្ចបានត្រួតពិនិត្យសពបង្ហាញថា ក្មេងប្រុសពិតជាស្លាប់ដោយខ្សែភ្លើងឆក់ប្រាកដមែន។
នេះជាមេរៀនមួយ ដល់គ្រួសារដទៃទៀតឲ្យមានការប្រុងប្រយ័ត្ន កុំតខ្សែភ្លើងរញ៉េរញ៉ៃក្នុងផ្ទះ ព្រោះវាអាចបណ្ដាលឲ្យឆក់ស្លាប់ផងនិងអាចទុស្សេខ្សែភ្លើងបង្កជាអគ្គិភ័យឆេះផ្ទះសម្បែងជាយថាហេតុផង ៕
ចែករំលែកព័តមាននេះ