5ចំណុចដែលអ្នកលក់ផ្ទះគិតមិនដល់
ការប្រកាសលក់ផ្ទះ មិនមែនជារឿងលំបាក ហើយក៏មិនងាយស្រួលដែរ ។ វាមិនត្រឹមតែប្រកាសផ្សាយតាមវែបសាយ ឬទាក់ទងជាមួយឈ្មួញកណ្តាល ហើយអង្គុយចាំឱ្យមានអ្នកទាក់ទងទិញនោះទេ ប៉ុន្តែអ្នកត្រូវចាត់
ការប្រកាសលក់ផ្ទះ មិនមែនជារឿងលំបាក ហើយក៏មិនងាយស្រួលដែរ ។ វាមិនត្រឹមតែប្រកាសផ្សាយតាមវែបសាយ ឬទាក់ទងជាមួយឈ្មួញកណ្តាល ហើយអង្គុយចាំឱ្យមានអ្នកទាក់ទងទិញនោះទេ ប៉ុន្តែអ្នកត្រូវចាត់ចែងផ្ទះឱ្យរៀបរយជាមុន ។
អ្វីដែលត្រូវជួសជុល ក៏ត្រូវជួសជុល ហើយអ្វីត្រូវបោះបង់ចោល គឺត្រូវយកចេញ និងនៅមានចំណុចតូចៗជាច្រើនទៀតដែលម្ចាស់ផ្ទះគួរតែយកចិត្តទុកដាក់មុននឹងលក់ ដើម្បីឱ្យផ្ទះរបស់អ្នកលក់ដាច់ឆាប់រហ័ស ទទួលតម្លៃខ្ពស់ និងបង្កើនចំណាប់អារម្មណ៍ផងដែរ ។ ខាងក្រោមនេះ គឺជាចំណុចដែលមនុស្សភាគច្រើនភ្លេចនៅពេលលក់ផ្ទះ ៖
១-កម្ចាត់ភាពអាប់អួក្នុងផ្ទះ ៖
ផ្ទះនីមួយៗតែងមានភាពអាប់អួនៅតាមចំណុចផ្សេងៗ មិនថានៅក្រោមជណ្តើរ ខាងមុខបន្ទប់ទឹក ឬនៅតាមផ្លូវដើរចង្អៀត ។ នៅពេលមានអ្នកសុំចូលមើលផ្ទះ ចំណុចអាប់អួទាំងនេះនឹងកាន់តែធ្វើឱ្យគេមានអារម្មណ៍ថា ផ្ទះនេះមើលទៅមិនគួរឱ្យរស់នៅ ។ ដូច្នេះ មុននឹងលក់ ម្ចាស់ផ្ទះគួររកវិធីកម្ចាត់ចំណុចអាប់អួទាំងនេះ ដោយអាចលាបពណ៌ឱ្យភ្លឺថែមទៀត ឬរក Sticker មានក្បូរក្បាច់មកតុបតែងដើម្បីបង្កើតបរិយាកាសល្អ ។
២-សម្អាតកញ្ចក់គ្រប់ផ្នែក ៖
មនុស្សជាច្រើនតែងភ្លេចគិតដល់កញ្ចក់ មិនថាជាកញ្ចក់ក្នុងផ្ទះ ឬកញ្ចក់ដាក់នៅតាមទ្វារមុខ តើដឹងឬទេថា កញ្ចក់ជំនួយយ៉ាងខ្លាំងដែលអាចធ្វើឱ្យផ្ទះមើលទៅស្រស់ថ្លា និងទូលាយ ។
ប៉ុន្តែកញ្ចក់ក៏បង្កើតផលអាក្រក់ផងដែរដូចជា ប្រសិនបើវាបែក ឬមានស្នាមប្រេះ នឹងកាន់តែធ្វើឱ្យផ្ទះមើលទៅទ្រុឌទ្រោមខ្លាំង ។ ដូច្នេះ គួរតែសម្អាតកញ្ចក់គ្រប់ផ្នែកទាំងអស់ បើសិនជាផ្នែកណាបែកបាក់ ឬមិនស្នាមប្រេះ ត្រូវប្រញាប់ផ្លាស់ប្តូរចេញ ។
៣-បោះចោលនូវសម្ភារចាស់ ៖
បោះចោលនូវសម្ភារចាស់ៗ និងដាក់បន្ថែមសម្ភារថ្មីសម្រាប់ប្រើប្រាស់ក្នុង ផ្ទះ ។ ប្រសិនបើវត្ថុនោះគ្មានប្រយោជន៍ និងមានសភាពចាស់រហូតដល់ប្រើការលែងបាន គួរតែបោះវាចោលល្អជាងដាក់តាំងក្នុងផ្ទះ ដែលកាន់តែធ្វើឱ្យមើលទៅមិនល្អភ្នែកថែមទៀត ។ គួរទុកតែវត្ថុណាដែលប្រើប្រាស់បានប៉ុណ្ណោះ និងនៅក្នុងសភាពថ្មីល្អ ព្រោះបើសិនជាសម្ភារ ឬគ្រឿងសង្ហារិមចាស់ គឺមានតែធ្វើឱ្យសភាពផ្ទះមើលទៅទ្រុឌទ្រោមថែមទៀត ។
៤-ពិនិត្យប្រព័ន្ធទឹក-ភ្លើង ៖
ពិនិត្យវាឱ្យមានទំនុកចិត្ត ដែលភាគច្រើនអ្នកមកមើលផ្ទះទាំងឡាយមិនបានមកមើលតែម្យ៉ាងនោះទេ ប៉ុន្តែពួកគេតែងសាកល្បងប្រព័ន្ធទឹក-ភ្លើងថា តើនៅអាចប្រើការបានល្អឬអត់។ ដូច្នេះ វានឹងល្អបំផុតប្រសិនបើអ្នកជួសជុលឱ្យគ្រប់យ៉ាងល្អរៀបរយសម្រាប់ទាំងខ្លួនយើងផ្ទាល់ និងអ្នកទិញ ។
៥-ប្រមូលសម្ភារផ្ទាល់ខ្លួន/គ្រួសារ ៖
ប្រមូលសម្ភារទាំងនេះឱ្យផុតពីភ្នែក ព្រោះវាមិនមែនជាអ្វីដែលគួរឱ្យចង់មើលប៉ុន្មានទេ បើសិនជាអ្នកនៅមានរបស់ផ្ទាល់ខ្លួនឬគ្រួសារដូចជា សម្លៀកបំពាក់ ថ្នាំដុសធ្មេញ និងរូបថតក្រុមគ្រួសារជាដើម ព្រោះវត្ថុទាំងនេះនឹងធ្វើឱ្យអ្នកមើលផ្ទះមានអារម្មណ៍ថា ផ្ទះនេះនៅមានមនុស្សរស់នៅ និងមិនផ្តល់អារម្មណ៍ថាជាផ្ទះលក់នោះទេ ។
វិធីល្អ ត្រូវប្រមូលនូវវត្ថុផ្ទាល់ខ្លួនចេញឱ្យអស់ដើម្បីឱ្យក្នុងផ្ទះមានតែគ្រឿងសង្ហារិម និងវត្ថុតុបតែងតូចៗដែលចាំបាច់ប៉ុណ្ណោះ គឺគ្រប់គ្រាន់ ៕
ចែករំលែកព័តមាននេះ