រាជធានីភ្នំពេញ ៖ ការពង្រីកផ្លូវជាតិលេខ៥ ដែលផ្តល់កម្ចីពីរដ្ឋាភិបាលជប៉ុន នឹងបើកសម្ពោធការដ្ឋាននៅខែកុម្ភៈខាងមុខ ហើយគ្រោងនឹងបញ្ចប់ការស្ថាបនានៅឆ្នាំ២០២១។ នេះបើតាមមន្ត្រីទទួលបន្ទុកគម្រោងជំនួយរបស់ជប៉ុន
រាជធានីភ្នំពេញ ៖ ការពង្រីកផ្លូវជាតិលេខ៥ ដែលផ្តល់កម្ចីពីរដ្ឋាភិបាលជប៉ុន នឹងបើកសម្ពោធការដ្ឋាននៅខែកុម្ភៈខាងមុខ ហើយគ្រោងនឹងបញ្ចប់ការស្ថាបនានៅឆ្នាំ២០២១។ នេះបើតាមមន្ត្រីទទួលបន្ទុកគម្រោងជំនួយរបស់ជប៉ុន នៃក្រសួងសាធារណការ និងដឹកជញ្ជូន ។
លោក ឈឹម ផល្លា ប្រធាននាយកដ្ឋានសហប្រតិបត្តិការអន្តរជាតិនៃក្រសួងសាធា- រណការ និងដឹកជញ្ជូន ទទួលបន្ទុកគម្រោងជំនួយរបស់ជប៉ុន បានថ្លែងនៅព្រឹកថ្ងៃទី៦ មករា ម្សិលមិញថា ការស្ថាបនាពង្រីកផ្លូវជាតិលេខ៥ នឹងធ្វើឡើងជា៣ដំណាក់កាល ដោយដំណាក់កាលទី១ នឹងចាប់ពីខេត្តបាត់ដំបង ទៅកាន់ក្រុងសិរីសោភ័ណ។
ដំណាក់កាលទី២ នឹងចាប់ពីស្ពានព្រែកក្តាម ក្នុងដល់តំបន់ធាម្អម ខេត្តពោធិ៍សាត់ និងដំណាក់កាលទី៣ ចាប់ពីខេត្តពោធិ៍សាត់ ទៅបាត់ដំបង និងចេញពីសិរីសោភ័ណ ទៅកាន់ច្រកទ្វារអន្តរជាតិស្ទឹងបត់ ស្ថិតក្នុងក្រុងប៉ោយប៉ែត ខេត្តបន្ទាយមានជ័យ ។
លោកបន្តថា ៖ « ផ្លូវជាតិលេខ៥ នឹងជាផ្លូវដ៏សំខាន់ ដែលការពង្រីកនឹងបង្កើនទំហំផ្លូវ អាចបើកបររថយន្តពីរទៅ ពីរមកបាន និងមានសួនច្បារពុះចំកណ្តាលទ្រូងផ្លូវ ។ ផ្លូវនេះនឹងធ្វើវាងទីប្រជុំជនស្រុកឧដុង្គ ខេត្តកណ្តាល និងវាងទីក្រុងកំពង់ឆ្នាំង ពោធិ៍សាត់ បាត់ដំបង និងទីរួមខេត្តបន្ទាយមានជ័យ ។ ការវាងនេះដើម្បីបញ្ចៀសផលប៉ះពាល់លើលំនៅឋានប្រជាពលរដ្ឋ និងមិនឲ្យមានផលប៉ះពាល់បរិស្ថាន និងសង្គមនៅតាមទីប្រជុំជនទាំងនោះ » ។
ទោះជាយ៉ាងណា លោកមិនទាន់បញ្ជាក់ឲ្យដឹងពីទំហំថវិកាសម្រាប់សាងសង់ផ្លូវនេះទេ ព្រោះការផ្តល់កម្ចីធ្វើឡើងជាដំណាក់កាល និងកំពុងគណនានៅឡើយ ។
លោក ឈឹម ផល្លា បន្ថែមថា ការស្ថាបនាផ្លូវនេះជាជំនួយរបស់រដ្ឋាភិបាលជប៉ុន តាមរយៈទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន ហៅកាត់ថា JICA ។ ការស្ថាបនាកំណាត់ផ្លូវដំណាក់កាលទី១ អង្គការ JICA បានជ្រើសរើស និងដេញថ្លៃក្រុមហ៊ុនសាងសង់រួចហើយ ។
កំណាត់ផ្លូវជាតិលេខ៥ ពីរាជធានីភ្នំពេញ ទៅកាន់ក្រុងប៉ោយប៉ែត ស្ថាបនា និងផ្តល់ជំនួយដោយប្រទេសចិន និងជប៉ុន ។ ការស្ថាបនាពីរាជធានីភ្នំពេញ ទៅកាន់ស្ពានព្រែកក្តាម បាននិងកំពុងស្ថាបនាដោយក្រុមហ៊ុនចិន ដែលមានប្រវែងជាង៣០គីឡូម៉ែត្រ និងចន្លោះពីស្ពានព្រែកក្តាម ទៅកាន់ច្រកស្ទឹងបត់ ក្រុងប៉ោយប៉ែត ស្ថាបនា និងផ្តល់កម្ចីសម្បទានដោយរដ្ឋាភិបាលជប៉ុន ដែលមានប្រវែងជាង៣០០គីឡូម៉ែត្រ ។
លោក ហេង សុខគង់ រដ្ឋលេខាធិការក្រសួងឧស្សាហកម្ម និងសិប្បកម្ម ថ្លែងថា ផ្លូវជាតិលេខ៥ ជាផ្លូវជាតិដ៏សំខាន់ដែលតភ្ជាប់ពីប្រទេសថៃ ឆ្លងកាត់កម្ពុជា ឆ្ពោះទៅកាន់វៀតណាម។ ហេតុនេះ ទើបរាជរដ្ឋាភិបាលកម្ពុជាគ្រោងរៀបចំតំបន់ឧស្សាហកម្ម និងសួនឧស្សាហកម្មនៅតាមបណ្តោយផ្លូវនេះដើម្បីទទួលបានអត្ថប្រយោជន៍ពីការដឹកទំនិញឆ្លងកាត់ ។
លោកបណ្ឌិត ម៉ី កល្យាណ ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិ ថ្លែងថា ការកសាងហេដ្ឋារចនាសម្ព័ន្ធមានសារសំខាន់ណាស់ដើម្បីដោះស្រាយបញ្ហាប្រឈមក្នុងវិស័យដឹកជញ្ជូនរបស់កម្ពុជា ដោយសារបច្ចុប្បន្ន កម្ពុជាកំពុងប្រឈមមុខនឹងបញ្ហានេះយ៉ាងខ្លាំង ។ ដូច្នេះ រាជរដ្ឋាភិបាលគួរពន្លឿនការវិនិយោគលើវិស័យនេះ ព្រោះការកសាងផ្លូវមិនមែនធ្វើតែមួយឆ្នាំ ឬពីរឆ្នាំបញ្ចប់នោះទេ ។ លោកបន្តថា ៖ « ដើម្បីជំរុញកំណើនសេដ្ឋកិច្ចកម្ពុជាឈានទៅកាន់កម្រិតថ្មីមួយទៀត ទាមទារឲ្យមានការវិនិយោគលើហេដ្ឋារចនាសម្ព័ន្ធបន្ថែម » ៕
ចែករំលែកព័តមាននេះ