រាជធានីភ្នំពេញ ៖ គម្រោងលំនៅឋានសាធារណៈតម្លៃទាបសម្រាប់អ្នកមានចំណូលទាប និងមធ្យម ជាពិសេសមន្ត្រីរាជការ ដែលមហាជនកំពុងទន្ទឹងរង់ចាំនោះ ពេលនេះបានចាប់ផ្ដើមបុកគ្រឹះសាងសង់ជាផ្លូវការហើយនៅថ្ងៃសៅរ៍ ទី៧ មករានេះ ដែលមានទីតាំងស្ថិតនៅភូមិកោះគរ ឃុំរកាខ្ពស់ ស្រុកស្អាង ខេត្តកណ្ដាល និងមានចម្ងាយប្រមាណ៨គីឡូម៉ែត្រពីរង្វង់មូលតាខ្មៅ ទីរួមខេត្តកណ្ដាល ។
ដំណឹងនេះ ធ្វើឲ្យមន្ត្រីរាជការ និងប្រជាពលរដ្ឋដែលកំពុងស្វែងរកលំនៅឋានសម្រាប់ស្នាក់នៅសប្បាយរីករាយ និងត្រេកអរផងដែរ។ ទោះជាយ៉ាងណា ក៏មានអ្នកមួយចំនួនអាក់អន់ចិត្តដែរ ព្រោះទីតាំងគម្រោងមិនស្ថិតនៅកន្លែងដែលខ្លួនបានគិត ឬចំទីតាំងដែលខ្លួនប្រាថ្នា ចង់បាន ប៉ុន្តែនេះគ្រាន់តែជាគម្រោងទី១ ហើយវានឹងមានគម្រោងបន្តបន្ទាប់ទៀត ។
លោកឧកញ៉ាសៀ ឫទ្ធី អគ្គនាយកក្រុមហ៊ុនWorld Bridge Land ដែលចាប់ដៃគូសហការជាមួយក្រុមហ៊ុនមួយមានមូលដ្ឋាននៅប្រទេសសិង្ហបុរី ដែលវិនិយោគលើគម្រោងលំនៅឋានសាធារណៈនេះ បានថ្លែងឲ្យដឹងតាមទូរស័ព្ទនារសៀលថ្ងៃទី៦ មករា ម្សិលមិញនេះថា លំនៅឋានសាធារណៈចំនួន២.២៩៦ខ្នងផ្ទះ នឹងបើកការដ្ឋានសាងសង់នៅក្នុងដំណាក់កាលទី១នាថ្ងៃទី៧ មករា ឆ្នាំ២០១៧ នៅលើផ្ទៃដីទំហំ២០ហិកតាក្នុងចំណោមផ្ទៃដីដែលបានបម្រុងទុកចំនួន៤៥ហិកតា ព្រមទាំងមានការចូលរួមពីលោក ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ផងដែរ ។
លោកឧកញ៉ាសៀ ឫទ្ធី បានបន្តថា គម្រោងដំណាក់កាលទី១នេះ នឹងបញ្ចប់ការសាងសង់ក្នុងរយៈពេល២ឆ្នាំ និងចាប់ផ្តើមបើកលក់នៅក្នុងរយៈពេលពីរទៅបីសប្តាហ៍ខាងមុខនេះ ប៉ុន្តែ គម្រោងនេះអាចប្រែប្រួល ដោយសារលោកមិនទាន់ទទួលបានគោលការណ៍ជួយសម្រួលពីរាជរដ្ឋាភិបាល លើហេដ្ឋារចនាសម្ព័ន្ធនៅឡើយទេ ប៉ុន្តែលោកចាប់ផ្តើមសម្ពោធគម្រោងជាមុន ។
លោកបន្តថា ៖« គម្រោងនេះនឹងទទួលបានជោគជ័យ ព្រោះខ្ញុំធ្វើដើម្បីប្រជាពលរដ្ឋទាំង អស់គ្នា មិនគិតពីផលចំណេញឬខាតនោះទេ ព្រោះបើគិតពីចំណេញ ខ្ញុំសាងសង់ខុនដូសម្រាប់លក់វិញ ទើបបានផលចំណេញ » ។
គំរោងនេះនឹងអនុញ្ញាត្តឲ្យប្រជាពលរដ្ឋក្រីក្រពិតប្រាកដ អាចទិញបានតាមរយៈ ការដាក់ចេញលក្ខខណ្ឌជាច្រើនដូចជា ការបង់រំលស់ត្រឹម១ខែចំនួន៨០ដុល្លារ សម្រាប់រយៈពេល២០ឆ្នាំ ។ ការទិញលំនៅឋាន នេះ តម្រូវឲ្យម្ចាស់ស្នាក់នៅរយៈពេល៥ឆ្នាំ និងសម្រាប់ប្រជាពលរដ្ឋមានប្រាក់ចំណូលត្រឹម៥០០ដុល្លារចុះក្រោម ។
លោក សេង ឡូត អ្នកនាំពាក្យក្រសួងរៀបចំដែនដី នគរូបនីយកម្ម និងសំណង់ បានថ្លែងថា ក្រសួងមានការគាំទ្រចំពោះគម្រោងនេះ ដែលនឹងផ្តល់អាទិភាពជំហានដំបូងដល់មន្ត្រីរាជការ និងកងកម្លាំងប្រដាប់អាវុធជាមុន និងផ្តល់ជូនដល់ប្រជាពលរដ្ឋទូទៅនៅជំហានបន្តបន្ទាប់ទៀត ព្រោះជាគោលនយោបាយគម្រោងលំនៅឋានសាធារណៈ គឺផ្តល់ជូនប្រជាពលរដ្ឋមានប្រាក់ចំណូលទាប ចំណូលមធ្យម និងក្រុមប្រជាពលរដ្ឋងាយរងគ្រោះ ។
លោកបន្តថា ៖« បន្ទាប់ពីគម្រោងនេះដំណើរការ ខ្ញុំរំពឹងថានឹងអាចមានគម្រោងផ្សេងទៀត នឹងដំណើរការផងដែរ»។
បើតាមលោកឧកញ៉ា សៀ ឫទ្ធី ធ្លាប់មានប្រសាសន៍ថា គម្រោងលំនៅឋានសាធារណៈនេះ មិនធ្វើតែមួយកន្លែងទេ គឺនឹងធ្វើនៅគ្រប់ខណ្ឌនៅជាយក្រុងភ្នំពេញ ដើម្បីសម្រួលដល់ការធ្វើដំណើររបស់ប្រជាពលរដ្ឋ ។ ដូចនេះ ប្រជាពលរដ្ឋអាចជ្រើសរើសយកលំនៅឋានណាដែលនៅជិតកន្លែងធ្វើការរបស់ខ្លួន ។ មិនតែប៉ុណ្ណោះ គម្រោងនេះអាចនឹងឈានទៅដល់បណ្ដាខេត្តផងដែរ ដើម្បីបំពេញតម្រូវការលំនៅឋានដល់ប្រជាពលរដ្ឋដែលកំពុងស្វែងរកលំនៅឋានសម្រាប់ស្នាក់នៅ ។
គួររំឭកថា គម្រោងលំនៅឋានសាធារណៈរបស់រាជរដ្ឋាភិបាល ដែលបានសហការជាមួយក្រុមហ៊ុនឯកជន ត្រូវបានចុះកិច្ចសន្យារួមគ្នាជិត២ឆ្នាំមកហើយ ដើម្បីដោះស្រាយបញ្ហាលំនៅឋានរបស់ប្រជាពលរដ្ឋមានចំណូលទាប និងមធ្យមនៅកម្ពុជា ហើយជំហានដំបូងនេះ គឺដោះស្រាយបញ្ហាលំនៅឋានជូនប្រជាពលរដ្ឋចំណូលទាប និងមធ្យម នៅរាជធានីជាមុនសិន ជាពិសេស សម្រាប់មន្ត្រីរាជការតែម្ដង ។
តាមការអះអាងរបស់ម្ចាស់គម្រោង ក៏ធ្លាប់បានបញ្ជាក់ដែរថា គម្រោងលំនៅឋានសាធារណៈ ឬហៅថាលំនៅឋានតម្លៃទាបនេះ គ្រោងវិនិយោគទឹកប្រាក់ប្រមាណ១០០លានដុល្លារអាមេរិក ដោយផ្ទះនីមួយៗមានតម្លៃចន្លោះពី២,៥ម៉ឺន ដល់៣ម៉ឺនដុល្លារអាមេរិក ។ ម្យ៉ាងទៀត អ្នកទិញគម្រោងលំនៅឋាននេះ ត្រូវតែជាអ្នកមានគ្រួសារ ដែលនេះគឺជាលក្ខខណ្ឌសម្រាប់អ្នកមានបំណងទិញគម្រោងលំនៅឋានសាធារណៈ ព្រោះការធ្វើបែបនេះ ទើបអាចលក់ជូនដល់អ្នកដែលមានចំណូលទាប និងមធ្យមពិតប្រាកដ ៕
ចែករំលែកព័តមាននេះ