សារព័ត៌មានបរទេសកាលពីពេល ថ្មីៗកន្លងមកផ្សាយថា លោកតា Robert Marchand ជនជាតិបារាំងអាយុ១០៥ឆ្នាំបានបំបែកឯតទគ្គកម្មជិះកង់រយៈពេល១ម៉ោង សម្រាប់មនុស្សវ័យចំណាស់ក្នុងចម្ងាយ២២,៥៤គីឡូម៉ែត្រ
សារព័ត៌មានបរទេសកាលពីពេល ថ្មីៗកន្លងមកផ្សាយថា លោកតា Robert Marchand ជនជាតិបារាំងអាយុ១០៥ឆ្នាំបានបំបែកឯតទគ្គកម្មជិះកង់រយៈពេល១ម៉ោង សម្រាប់មនុស្សវ័យចំណាស់ក្នុងចម្ងាយ២២,៥៤គីឡូម៉ែត្រ កាលពីថ្ងៃទី៤ មករា ២០១៧ នាទីលានធាក់កង់ក្នុងទីក្រុងសាំងកេនតាំងអង់អុីវលីន នៅភាគខាងលិចក្រុងប៉ារីស ក្រោមការសាទរពីទស្សនិកជនជាច្រើននាក់ ។
លោកតា Marchand ថាគាត់មិនហត់ ឬរួយជើងទេ ក្រោយពីធាក់បានចំនួន៩២ជុំ ប៉ុន្តែចុករួយដៃតិចតួច ។
កាលពី៣ឆ្នាំមុន លោកតា Marchand បានបង្កើតឯតទគ្គកម្មធាក់កង់រយៈពេល១ម៉ោងចំពោះអ្នកមានអាយុលើស១០០ឆ្នាំ ដោយធាក់បានចម្ងាយ២៦,៩២គីឡូម៉ែត្រ ដោយក្នុងពេលកន្លងមកមិនធ្លាប់មានមនុស្សវ័យចំណាស់អាយុ១០៥ឆ្នាំ បង្កើតឯតទគ្គកម្មបែបនេះទេ ។
លោកតា Marchand ជាអ្នកពន្លត់អគ្គិភ័យចូលនិវត្តន៍ ធ្លាប់ជាជើងឯកកាយសម្ព័ន្ធរបស់ប្រទេស និងធ្លាប់ជាកីឡាករប្រដាល់ បានថែទាំខ្លួនជារៀងរហូត និងទទួលទានអាហារមានអនាម័យ ។ លោកតាបញ្ជាក់ថា គាត់បានហាត់សមធាក់កង់ប្រហែលពី១០ទៅ២០គីឡូម៉ែត្រក្នុងមួយថ្ងៃ ដោយហាត់សមក្នុងម្លប់ព្រោះបារម្ភខ្លាចធ្លាក់ខ្លួនឈឺ ៕
ចែករំលែកព័តមាននេះ