ពិព័រណ៍បច្ចេកវិទ្យាដ៏ធំបំផុតក្នុងពិភពលោក CES នៅឡាសវេហ្គាស សហរដ្ឋ អាមេរិកសម្រាប់ឆ្នាំ២០១៧ មានការចូលរួមពីបណ្តាក្រុមហ៊ុនជាច្រើន ដើម្បីបង្ហាញផលិតផលថ្មីរបស់ខ្លួនសម្រាប់លក់ក្នុងឆ្នាំ២០១៧ ។
ក្នុងព្រឹត្តិការណ៍តាំងពិព័រណ៍នោះមានផលិតផលមួយត្រូវបានគេដាក់ភ្ជាប់ជាមួយឈើច្រត់សម្រាប់មនុស្សចាស់ ។ វាត្រូវបានក្រុមហ៊ុនបារាំង Fayet បង្កើតឡើងសម្រាប់ជាជំនួយដល់មនុស្សចាស់ដើរផង និងអាចផ្តល់សញ្ញាដល់អ្នកថែរក្សាមនុស្សចាស់ឲ្យបានដឹងថាគាត់ដួលជាដើម ។ ម្យ៉ាងវិញទៀតវាក៏បានបំពាក់នូវកម្មវិធីដើររបស់ម្ចាស់វា ហើយបញ្ជូនសារមកកាន់អ្នកថែរក្សា សាច់ញាតិ ឬអ្នកជំនាញថែទាំសុខភាពប្រសិនបើម្ចាស់ឈើច្រត់មានសញ្ញាប្រែប្រួល ។ ឈើច្រត់នេះត្រូវបានក្រុមហ៊ុនគ្រោងនឹងដាក់បង្ហាញជាផ្លូវការនៅ៦ខែទៀត ។ ឆ្លងតាមរយៈបច្ចេកវិទ្យានៅលើឈើច្រត់បែបនេះ មានន័យថា ពិភពបច្ចេកវិទ្យាមិនមែនសម្រាប់តែមនុស្សវ័យក្មេងប៉ុណ្ណោះទេ មនុស្សចាស់ក៏ត្រូវការបច្ចេកវិទ្យាដែរ ។
ទីផ្សារសម្រាប់ផលិតផលមួយនេះត្រូវបានគេជឿជាក់ថា នឹងមានតម្រូវការខ្ពស់នៅក្នុងប្រទេសអភិវឌ្ឍន៍ ។ ឈើច្រត់របស់ Fayet បានភ្ជាប់បច្ចេកវិទ្យាដែលគួរឲ្យចាប់អារម្មណ៍ជាច្រើន ដូចជា មានប្រព័ន្ធអីុនធើរណែតភ្ជាប់ជាមួយកម្មវិធីជំនួយសំឡេងដំបូងនៅក្នុងពិភពលោក និងអាចគ្រប់គ្រងវាជាមួយនឹង Iphone ឬភ្ជាប់ជាមួយឧបករណ៍ឆ្លាតវៃផ្សេងៗទៀត ។ វាមានសមត្ថភាពអាចដំឡើងសំឡេងឲ្យបានល្អជាងមុននៅកន្លែងដែលមានសំឡេងរំខាន និងអាចទទួលការហៅទូរស័ព្ទចូលបាន និងស្តាប់តន្ត្រីតាមប្រព័ន្ធអីុនធើរណែតជាដើម ៕
ចែករំលែកព័តមាននេះ