យុវជន២ក្រុមកា.ប់ចាក់គ្នាផ្អើលពេញរោងការ
ខេត្តពោធិ៍សាត់ ៖ ក្នុងពិធីមង្គលការមួយ ខណៈកំពុងនាំគ្នារាំលេងយ៉ាងសប្បាយរីករាកឡើងហុយដីទ្រលោម ស្រាប់តែយុវជន២ក្រុមបានរាំជាន់ជើងគ្នា ក៏កើតជម្លោះកា.ប់ចាក់គ្នា …
ខេត្តពោធិ៍សាត់ ៖ ក្នុងពិធីមង្គលការមួយ ខណៈកំពុងនាំគ្នារាំលេងយ៉ាងសប្បាយរីករាកឡើងហុយដីទ្រលោម ស្រាប់តែយុវជន២ក្រុមបានរាំជាន់ជើងគ្នា ក៏កើតជម្លោះកាប់ចាក់គ្នាយ៉ាងសាហាវ បង្កឲ្យមានការភ្ញាក់ផ្អើលពេញរោងការកាលពីវេលាម៉ោង២ និង១៥នាទីរសៀល ថ្ងៃទី០៦ ខែមករា ឆ្នាំ២០១៧ នៅចំណុចអំពួច ស្ថិតក្នុងភូមិជ្រៃក្រឹម ឃុំផ្ទះរុង ស្រុកភ្នំក្រវាញ ខេត្តពោធិ៍សាត់ ។
សមត្ថកិច្ចបានឲ្យដឹងថា ជនរងគ្រោះដែលស្លាប់ឈ្មោះ ដៀប ឌឿន ភេទប្រុស អាយុ៣៣ឆ្នាំ រស់នៅភូមិព្រះចំបក់ ឃុំត្រពាំងជង ស្រុកបាកាន ត្រូវបានគូបក្ខដិបក្ខចាក់ត្រូវ១កាំបិតចំដើមដោះខាងឆ្វេង បណ្ដាលឲ្យស្លាប់នៅនឹងកន្លែងកើតហេតុ ។ ចំណែកជនដៃដល់ដែលត្រូវឃាត់ខ្លួនឈ្មោះ ក្រេង កុសល ភេទប្រុស អាយុ២៥ឆ្នាំ រស់នៅភូមិឃុំកើតហេតុខាងលើ របួសក្ដោងច្រមុះ ។
ទាក់ទិននឹងករណីនេះសមត្ថកិច្ចឲ្យដឹងថា នៅថ្ងៃកើតហេតុ នៅផ្ទះប្រជាពលរដ្ឋឈ្មោះ នាង វុធ អាយុ៤៥ឆ្នាំ ជាស្ត្រីម៉េម៉ាយបានរៀបអាពាហ៍ពិពាហ៍កូនដោយមានជប់លៀង និងដាក់ធុងបាស់រាំយ៉ាងគគ្រឹកគគ្រេង ។ ពេលដែលផឹកស្រាស្រវឹងសប្បាយហួសប្រមាណនោះ ជនរងគ្រោះ និងជនដៃដល់បានឡើងរាំជាមួយភ្ញៀវជាច្រើនទៀតហុយដីទ្រលោម ។ មួយសន្ទុះក្រោយមកស្រាប់តែមានការរាំជាន់ជើងគ្នា២-៣ដង រហូតទំនាស់ពាក្យសំដី និងដេញកាប់ចាក់គ្នាផ្អើលពេញរោងការតែម្តង ។ ភាគីទាំងសងខាងបានធ្វើសកម្មភាពកាប់ចាក់គ្នាទៅវិញទៅមករបួសរៀងខ្លួន ប៉ុន្តែភាគីម្ខាងចាក់នឹងកាំបិតមុតជ្រៅក៏បណ្ដាលឲ្យស្លាប់តែម្ដង ។
សមត្ថកិច្ចបញ្ជាក់ថា បក្ខពួកជនដៃដល់៣នាក់ទៀតដែលរត់គេចខ្លួន សមត្ថកិច្ចកំណត់មុខសញ្ញាបានអស់ហើយ កំពុងតាមចាប់ខ្លួន ដើម្បីយកមកផ្ដន្ទាទោសតាមច្បាប់ ។ ចំណែកជនសង្ស័យកំពុងសម្រាកព្យាបាលនៅមន្ទីរពេទ្យ ដោយមានសមត្ថកិច្ចយាមជាប់រហូត រីឯសាកសពជនរងគ្រោះត្រូវបានក្រុមគ្រួសារយកទៅធ្វើបុណ្យតាមប្រពៃណីនៅគេហដ្ឋាននៃសព ៕
ចែករំលែកព័តមាននេះ