រាជធានីភ្នំពេញ ៖ កងវិស្វកម្មកម្លាំងមួកខៀវកម្ពុជាចំនួន១៨៤នាក់ចូលរួមបំពេញបេសកកម្មរបស់អង្គការសហប្រជាជាតិ នៅសាធារណរដ្ឋលីបង់ នៅចុងឆ្នាំ២០១៥កន្លងទៅ
រាជធានីភ្នំពេញ ៖ កងវិស្វកម្មកម្លាំងមួកខៀវកម្ពុជាចំនួន១៨៤នាក់ចូលរួមបំពេញបេសកកម្មរបស់អង្គការសហប្រជាជាតិ នៅសាធារណរដ្ឋលីបង់ នៅចុងឆ្នាំ២០១៥កន្លងទៅ បានត្រឡប់មកដល់ កម្ពុជាវិញ បន្ទាប់ពីបញ្ចប់ការងារប្រកបដោយភាពជោគជ័យ។ លោក អ៊ុច បូរិទ្ធ រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ និងជាអនុប្រធានគណៈកម្មាធិការជាតិគ្រប់គ្រងកម្លាំងរក្សាសន្តិភាព នៅថ្ងៃទី៦ ខែមករា ឆ្នាំ២០១៧ ក្នុងពិធីទទួលកងវិស្វ័កម្មកម្លាំងវិស្វកម្មមួកខៀវកម្ពុជា ចំនួន១៨៤នាក់ បានធ្វើមាតុភូមិនិវត្តន៍វិញ នៅមូលដ្ឋានទ័ពអាកាស រាជធានីភ្នំពេញ បានឲ្យដឹងថា កម្លាំងមួកខៀវទាំង១៨៤នាក់ ដែលបានវិលមកកម្ពុជាវិញនេះ គឺបានបំពេញការងារទទួលបានជោគជ័យ និងមានការទទួលស្គាល់ស្នាដៃរបស់កម្ពុជា ដែលបានបំពេញការងាររយៈពេល១ឆ្នាំនៅប្រទេសលីបង់។
កម្លាំងវិស្វកម្មនេះ គឺបានកសាងផ្លូវថ្នល់ សង់សំណង់បន្ទាយ សម្រាប់កម្លាំងទ័ពអង្គការសហប្រជាជាតិ មកពីបណ្តាប្រទេស ផ្សេងៗ រៀបចំប្រព័ន្ធទឹកស្អាត ដោះមីននៅលើផ្ទៃដីជាច្រើនរយហិកតា និងការពារដំណើរជូនជនភៀសខ្លួនផងដែរ។ លោកនាយឧត្តមសេនីយ៍ ឧបនាយករដ្ឋមន្ត្រី ទៀ បាញ់ រដ្ឋមន្ត្រីក្រសួងការពារជាតិ ថ្លែងថា “រាជរដ្ឋាភិបាល កម្ពុជាបានបង្ហាញពីចក្ខុវិស័យរបស់ខ្លួន ក្នុងគោលដៅនិរន្តភាពនៃការអភិវឌ្ឍន៍ថ្មី នៃការបញ្ជូនកងកម្លាំងរក្សាសន្តិភាព ទៅបណ្តាប្រទេសចំនួន៨ ដោយប្តេជ្ញាយ៉ាងមុតមាំលើវិស័យរក្សាសន្តិភាព ក្នុងការចូលរួមបំពេញបេសកកម្មរបស់អង្គការសហប្រជាជាតិ ដើម្បីបន្តវិភាគទានរួមចំណែកជាមួយសហគមន៍អន្តរជាតិ”។
លោកឧបនាយករដ្ឋមន្ត្រីលើកឡើងថា “រដ្ឋាភិបាលបានផ្តោតសំខាន់ទៅលើសកម្មភាព ក្នុងវិស័យមួយចំនួន ដែលកម្ពុជាមានលទ្ធភាពចូលរួម និងខិតខំធ្វើការកែលម្អ ការគ្រប់គ្រងធនធានមនុស្ស ពិសេសការបង្កើនចំនួនចូលរួមជាស្ត្រី ដើម្បីឲ្យស្របទៅនឹងទស្សនៈរបស់អង្គការសហប្រជាជាតិ ក្នុងការចូលរួមបេសកកម្មរក្សាសន្តិភាព។
ប្រត្តិបត្តិការរក្សាសន្តិភាព និងទស្សនៈទានសម្រាប់របៀបវារៈការអភិវឌ្ឍន៍ប្រកបដោយចីរភាពឆ្នាំ២០៣០ ដោយចាត់ទុកថា ការអភិវឌ្ឍន៍ នឹងមិនកើតមានឡើយ ប្រសិនបើគ្មានសន្តិភាព បើគ្មានការអភិវឌ្ឍន៍ប្រកបដោយចីរភាព ក៏គ្មានសន្តិភាពដែរ។
លោកនាយឧត្តមសេនីយ៍ សែម សុវណ្ណនី អគ្គនាយកមជ្ឈមណ្ឌលជាតិរក្សាសន្តិភាព ថ្លែងថា “កម្លាំងមួកខៀវនៃកងវិស្វកម្ម គឺបានទៅបំពេញបេសកកម្ម នៅសាធារណរដ្ឋលីបង់ កាលពីខែវិច្ឆិកា ឆ្នាំ២០១៥កន្លងទៅ តែរហូតមកដល់ថ្ងៃនេះ គឺបានបញ្ចប់នៃការបំពេញបេសកកម្ម រយៈពេល១ឆ្នាំ”។ លោកបានបញ្ជាក់បានថា កម្លាំងដែលទៅបំពេញការងារ ផ្នែកវិស្វកម្មនេះ គឺមានចំនួនគ្រប់ មិនមានបាត់កម្លាំងនោះទេ គឺទៅគ្រប់ មកគ្រប់។ លោក Alexantre Huynh តំណាងអ្នកសម្របសម្រួលអង្គការសហប្រជាជាតិកម្ពុជា បានថ្លែងថា “កម្ពុជាបានបញ្ជូនកម្លាំងទៅកាន់ប្រទេសលីបង់នេះ គឺកម្ពុជាបានបង្ហាញអំពីការប្តេជ្ញាចិត្តយ៉ាងមុតមាំរបស់ខ្លួន ក្នុងការគាំទ្រដល់ប្រតិបត្តិការសន្តិភាព របស់អង្គការសហប្រជាជាតិ ដើម្បីដោះស្រាយជម្លោះ ដ៏ស្មុគស្មាញ និងការពារជនស៊ីវិល ដែលជាភារកិច្ចដ៏សំខាន់បំផុត និងជាសក្ខីភាពជាក់ស្តែងផងដែរ។
លោកស្រីបានបន្ថែមថា ព្រឹតិ្តការណ៍ប្រមាណ២៣ឆ្នាំមុន កងរក្សាសន្តិភាពរបស់ អង្គការសហប្រជាជាតិបញ្ជូនមកកាន់កម្ពុជា។ តែបច្ចុប្បន្នកម្ពុជាបានប្រែក្លាយជាប្រទេសមួយបញ្ជូនកម្លាំង និងក្រុមជំនាញចូលរួមប្រតិបត្តិការរក្សាសន្តិភាពរបស់អង្គការសហប្រជាជាតិ ក្នុងនាមមនុស្សធម៌ ទៅកាន់ប្រទេសចំនួន៨ រួមមាន ប្រទេស ស៊ូដង់ ស៊ូដង់ខាងត្បូង អាហ្វ្រិកកណ្ដាល សាយប្រឹស លីបង់ ឆាដ ស៊ីរី និងប្រទេស ម៉ាលី។ គួរបញ្ជាក់ថា ចាប់តាំងពីឆ្នាំ២០០៦មក កម្ពុជា បានបញ្ជូនកម្លាំង ចំនួនសរុបជាង៤ពាន់នាក់ ក្នុងនោះមានស្ត្រីចំនួន១៥១នាក់ ទៅចូលរួម បេសកកម្មរបស់អង្គការសហប្រជាជាតិ។ ដែលបច្ចុប្បន្នកម្ពុជាមានកម្លាំងចំនួនជិត១០០០នាក់ ដែលកំពុងបំពេញបេសកកម្មនៅប្រទេសចំនួន៥ រួមមាន ប្រទេសស៊ូដង់ ស៊ូដង់ខាងត្បូង អាហ្វ្រិកកណ្តាល លីបង់ និងម៉ាលី។
ហើយកម្លាំងមួកខៀវទាំងអស់នេះ ដែលធ្វើឲ្យប្រទេសកម្ពុជា ជាប្រទេសបរិច្ចាគកម្លាំងរក្សា សន្តិភាពច្រើនជាងគេលំដាប់ទី៣ នៅក្នុងតំបន់អាស៊ាន។ ចាប់តាំងពីឆ្នាំ២០០៦មក កម្ពុជាបានបញ្ជូនកម្លាំង សរុបប្រមាណជិត៤ពាន់នាក់ ក្នុងនោះមានស្ត្រីចំនួនជាង១០០នាក់ ទៅចូលរួម បេសកកម្មរបស់អង្គការសហប្រជាជាតិ។ នៅដើមខែមករានេះកម្លាំងមួកខៀវកម្ពុជាម្នាក់ឈ្មោះ លោក លុយ ប៊ុនឡុង បានស្លាប់នៅប្រទេសអាហ្វ្រិចកណ្តាល នៅក្នុងមន្ទីរពេទ្យរ៉ូវ៉ានដា ដោយសារតែជំងឺគ្រុនចាញ់ធ្ងន់ធ្ងរ។ កាលពីថ្ងៃទី៤ ខែមករានេះកម្លាំងមួកខៀវចំនួន១៨៤នាក់ត្រូវបានបញ្ជូនចេញទៅកាន់ប្រទេសលីបង់ជំនួសកន្លែងកម្លាំងដែលបានធ្វើមាតុភូមិនិវត្តន៍ទាំងនេះ៕
ចែករំលែកព័តមាននេះ