រាជធានីភ្នំពេញ ៖ ថ្លែងទៅកាន់ពលរដ្ឋរាប់រយនាក់ នៅក្នុងពិធីសម្ពោធដាក់ឲ្យប្រើប្រាស់ប្រឡាយបេតុង និងផ្លូវអមប្រឡាយបាក់ទូក នាព្រឹកថ្ងៃទី០៦ ខែមករា ឆ្នាំ២០១៧ ស្ថិតក្នុងសង្កាត់ទួលសង្កែ ខណ្ឌឫស្សីកែវ នោះ លោក ប៉ា សុជាតិវង្ស អភិបាលរាជធានីភ្នំពេញ បានបញ្ជាក់ថា ប្រជាពលរដ្ឋរស់នៅអមសងខាងប្រឡាយបាក់ទូករហូតដល់ទំនប់កប់ស្រូវនឹងទទួលបានប្លង់កម្មសិទ្ធិស្របច្បាប់នៅពេលអាជ្ញាធរស្ថាបនាជញ្ជាំងបេតុងប្រឡាយ និងផ្លូវអមសងខាងប្រឡាយនេះរួច។
លោក ប៉ា សុជាតិវង្ស មានប្រសាសន៍ទៀតថា ដោយសារកំណើនសេដ្ឋកិច្ចធ្វើឲ្យប្រជាជនមានជីវភាពធូរធា មានយានយន្តកាន់តែច្រើន បានធ្វើឲ្យភ្នំពេញប្រឈមទៅនឹងការកកស្ទះចរាចរ ដែលរដ្ឋបាលភ្នំពេញ បានរិះរកគ្រប់វិធានការក្នុងការដោះស្រាយ ចំណែកបញ្ហាប្រឡាយលូក៏ជាចំណុចប្រឈមយ៉ាងខ្លាំងក្នុងការដោះស្រាយផងដែរ។ ជាក់ស្តែងប្រឡាយបាក់ទូកនេះត្រូវបានគេរំលោភធ្វើឲ្យស្ទះចរន្តទឹកហូរ ឯបញ្ហាចរាចរក៏មានការកកស្ទះនៅតំបន់នេះផងដែរ ប៉ុន្តែដោយការខិតខំរបស់រដ្ឋបាលរាជធានីភ្នំពេញ និងមានការចូលរួមពីប្រជាពលរដ្ឋទើបអាចស្ថាបនាប្រឡាយ និងផ្លូវអមប្រឡាយបាក់ទូកនេះបាន។
លោក ប៉ា សុជាតិវង្ស អំពាវនាវឲ្យប្រជាពលរដ្ឋចូលរួមថែរក្សាប្រឡាយ និងផ្លូវនេះ ដែលជាសម្បត្តិសាធារណៈ ដើម្បីប្រយោជន៍យើងទាំងអស់គ្នា។ លោកបន្តថា ក្រោយការស្ថាបនាប្រឡាយ និងផ្លូវអមប្រឡាយបាក់ទូកនេះរួច ប្រជាពលរដ្ឋរស់នៅអមប្រឡាយបាក់ទូកនេះនឹងទទួលបានប្លង់កម្មសិទ្ធិស្របច្បាប់ ដូច្នេះសូមឲ្យប្រជាពលរដ្ឋផ្សេងទៀត ដែលរស់នៅអមសងខាងប្រឡាយនេះ រហូតដល់ទំនប់កប់ស្រូវត្រូវចូលរួមជាមួយអាជ្ញាធរ ដើម្បីស្ថាបនាបន្តទៅមុខទៀតឲ្យបានលឿន ចំពោះដីដែលនៅសល់ពីគម្រោងនេះរដ្ឋនឹងប្រគល់កម្មសិទ្ធិស្របច្បាប់ជូនបងប្អូនតែម្តង។
លោក សាំ ពិសិដ្ឋ នាយកមន្ទីរសាធារណការ និងដឹកជញ្ជូន រាជធានីភ្នំពេញបានឲ្យដឹងថា ជញ្ជាំងបេតុងប្រឡាយបាក់ទូក ដែលបើកសម្ពោធដាក់ឲ្យប្រើប្រាស់ជាផ្លូវការនេះមានប្រវែង២១៦ម៉ែត្រ ទំហំប្រឡាយ១០ម៉ែត្រនិងផ្លូវបេតុងអមសងខាងប្រឡាយទទឹង៦ម៉ែត្រសងខាង។ នេះជាជំហានទី១ និងជាគំរូសម្រាប់បងប្អូនប្រជាពលរដ្ឋដែលរស់នៅក្នុងសង្កាត់ទួលសង្កែ ខណ្ឌឬស្សីកែវ។ លោកបន្តថា កន្លងមករដ្ឋបាលរាជធានីភ្នំពេញបានធ្វើការស្ថាបនាជញ្ជាំងបេតុងប្រឡាយជាច្រើនកន្លែងហើយ នៅក្នុងភូមិសាស្ត្ររាជធានីភ្នំពេញ ដូចជាជញ្ជាំងបេតុងប្រឡាយតាមផ្លូវលេខ១០៥ ជញ្ជាំងបេតុងប្រឡាយបឹងត្របែក ហើយថ្មីនេះបាន និងកំពុងស្ថាបនាជញ្ជាំងបេតុងប្រឡាយបឹងសាឡាងផងដែរ។
ក្រៅពីនេះ មានការស្តារ និងអភិវឌ្ឍន៍ប្រព័ន្ធលូ និងការសាងសង់ស្ថានីយ៍បូមទឹកថ្មីបន្ថែមចំនួន៤កន្លែងបាន និងកំពុងស្ថាបនាជិតរួចរាល់ ហើយក្នុងឆ្នាំ២០១៧នេះ រដ្ឋបាលរាជធានីភ្នំពេញនឹងស្ថាបនាស្ថានីយ៍ចំនួន២កន្លែងទៀត គឺស្ថានីយបូមទឹក១០០ខ្នង និងស្ថានីយបូមទឹកលូប្រាំបន្ថែមទៀត៕
ចែករំលែកព័តមាននេះ