រាជធានីភ្នំពេញ ៖ ស្ត្រីម្នាក់ដែលទើបសម្រាលកូនបាន៨ខែប៉ុណ្ណោះ ក៏ត្រូវបានប្ដីវាយក្បាលនឹងវែកសម្ល បណ្ដាលឱ្យរបួសយ៉ាងធ្ងន់ធ្ងរ ដែលផ្ដើមចេញពីរឿងទំនាស់ជំពាក់លុយគេបន្តិចបន្តួចប៉ុណ្ណោះ ហើយប្ដីបានផឹកស្រាស្រវឹង ក៏បានវាយប្រពន្ធជាច្រើនវែក ព្រមទាំងចាប់បោចសក់នាងបោកក្បាលផ្ទប់ទៅនឹងជញ្ជាំងផ្ទះជួល បណ្ដាលឲ្យរងរបួសយ៉ាងធ្ងន់ធ្ងរនោះ ។
បន្ទាប់ពីវាយរួចជននោះមិនបាននាំប្រពន្ធទៅសង្គ្រោះនោះឡើយ គឺបានទុកនាងនៅផ្ទះអស់មួយយប់ទាំងនាងសន្លប់ស្ដូកស្ដឹង។មិនតែប៉ុណ្ណោះ ជននោះថែមទាំងបានប្រើល្បិចធ្វើជាកោសខ្យល់ឱ្យនាងជាំពេញខ្លួន ហើយជាអកុសល នាងបានស្លាប់ រីឯជននោះបានធ្វើជាបីសាកសពប្រពន្ធនៅក្នុងរង្វង់ដៃរបស់ខ្លួនដឹកបញ្ជូនតាមម៉ូតូរ៉ឺម៉កកង់១គ្រឿង ទៅកាន់មន្ទីរពេទ្យបង្អែកពោធិ៍ចិនតុង ធ្វើជានាំទៅដើម្បីសង្គ្រោះបន្ទាន់ ។
ល្បិចកលទាំងអស់នោះ ក្នុងបំណងបង្វែងដាន និងបំភាន់ភ្នែកសមត្ថកិច្ច ជាការបិទបាំងរាល់ទង្វើ និងសារជាតិជាឃាតកររបស់ខ្លួនតែប៉ុណ្ណោះ ប៉ុន្តែពេលដឹកទៅដល់មន្ទីរពេទ្យ មិនទាន់ទាំងបានដាក់សពប្រពន្ធ ចុះពីម៉ូតូរ៉ឺម៉កកង់បីផង ក្រុមគ្រូពេទ្យនៅទីនោះ
បានពិនិត្យមើលថា នាងបានស្លាប់បាត់ទៅហើយ ។
ចំណែកប្ដីប្រុងដឹកសពប្រពន្ធត្រឡប់ទៅផ្ទះវិញ ដោយបានអះអាងប្រាប់គ្រូពេទ្យថា ប្រពន្ធរបស់ខ្លួន ទើបសម្រាលកូនបាន៨ខែ ដើរមិនប្រយ័ត្ន ក៏ដួលបោក្បាល នៅក្នុងបន្ទប់ទឹកនាពេលយប់ ហើយខ្លួនសង្ស័យថា នាងខ្យល់គទើបកោសខ្យល់ឱ្យនាង។ ពេលនោះគ្រូពេទ្យមិនបានជឿទេ ព្រោះឃើញក្បាលនាងជាប្រពន្ធនោះ មានស្នាមប៉ោងច្រើនកន្លែងគួរឱ្យសង្ស័យ និងបានឃាត់មិនឲ្យដឹកសពចេញឡើយ បន្ទាប់មកក្រុមគ្រូពេទ្យ បានរាយការណ៏ជូនកម្លាំង នគរបាលឲ្យបានដឹងនិងចុះទៅពិនិត្យភ្លាមៗផងដែរ ។
ហេតុការណ៏នោះ បានកើតឡើងតាំងពីវេលាម៉ោង១១យប់ថ្ងៃទី៥ មករា ប៉ុន្តែបានបង្កឲ្យមានការភ្ញាក់ផ្អើល នៅវេលាម៉ោង១០និង១៥នាទីព្រឹកថ្ងៃទី៦ ខែមករា ឆ្នាំ២០១៧ ក្រោយពេលដែលជននោះ ដឹកសពប្រពន្ធទៅសង្គ្រោះនៅមន្ទីរពេទ្យបង្អែកពោធិ៍ចិនតុង ស្ថិតនៅក្នុងភូមិតាងួន សង្កាត់កាកាប ខណ្ឌពោធិ៍សែនជ័យ រាជធានីភ្នំពេញ ។
ស្ត្រីដែលស្លាប់នោះឈ្មោះខេន ស្រីខួច អាយុ២៧ឆ្នាំ មានស្រុកកំណើតនៅក្នុងភូមិប្រាសាទ ឃុំភ្នំសន្ទុក ស្រុកភ្នំសន្ទុក ខេត្តកំពង់ធំ។ ដោយឡែកបុរសជាប្តីឈ្មោះស អឿន អាយុ៣៨ឆ្នាំ មុខរបររត់ម៉ូតូឌុប មានស្រុកកំណើត នៅក្នុងភូមិកំពង់ក្តី ឃុំកំពង់រាប ស្រុកកោះសូទិន កំពង់ចាម ហើយអ្នកទាំងពីរនាក់នោះ មានកូនប្រុស២នាក់និងស្រីម្នាក់ ហើយសព្វថ្ងៃស្នាក់នៅផ្ទះជួលក្នុងភូមិចោមចៅ សង្កាត់ចោមចៅ ខណ្ឌពោធិ៍សែនជ័យ។
ក្រោយទទួលបានព័ត៌មាន កម្លាំងនគរបាលប៉ុស្ដិ៍កាកាប រួមជាមួយកម្លាំង នគរបាល ប៉ុស្ដិ៍ចោមចៅនិង នគរបាលផ្នែកបច្ចេកទេសខណ្ឌពោធិ៍សែនជ័យ បានចុះទៅកាន់ទីនោះ ដើម្បីពិនិត្យមើលពីស្ថានភាពជាក់ស្ដែង រួចកម្លាំងនគរបាលបាននាំខ្លួនបុរសជាប្ដីទៅ ធ្វើការសាកសួរនៅប៉ុស្ដិ៍ចោមចៅ និងបាននាំយកសាកសពនាងជាប្រពន្ធទៅកាន់វត្តពោធិ៍ចិនតុង ដើម្បីឲ្យនគរបាលការិយាល័យបច្ចេកទេសនៃស្នងការដ្ឋាននគរបាលរាជធានីភ្នំពេញ ធ្វើកោសល្យវិច័យព្រោះសង្ស័យថា ការស្លាប់នោះមានការពាក់ព័ន្ធ និងការប្រើអំពើហឹង្សាពីសំណាក់បុរសជាប្ដីនោះ ។
អ្វីដែលជាការភ្ញាក់ផ្អើលនោះ បន្ទាប់ពីនគរបាលធ្វើការសាកសួរតាមជំនាញ អស់រយៈពេលប្រមាណ៣ម៉ោងរួចមក ដោយមិនអាចលាក់លៀមបាន ជននោះបានសារភាពថាខ្លួន ពិតជាបានវាយសម្លាប់ប្រពន្ធរបស់ខ្លួនពិតមែន គឺបានវាយក្បាល និងវែកសម្លរចំនួន៣ទៅ៤វែក ព្រមទាំងចាប់បោចសក់បោកផ្ទប់ទៅនឹងជញ្ជាំងផ្ទះជួល ក្នុងពេលមានទំនាស់គ្នាកើតឡើង ។
ក្រោយពេលទទួលបានចម្លើយសារភាព ហើយនគរបាលបាននាំជននោះទៅកាន់ផ្ទះជួលដែលជាកន្លែងកើតហេតុនោះ រកវត្ថុតាង និងធ្វើត្រាប់ពីសកម្មភាពវាយសម្លាប់ប្រពន្ធរបស់ខ្លួនទៀតផង ។ ជនជាឃាតករខាងលើបាននិយាយប្រាប់នគរបាលថា ប្រពន្ធរបស់ខ្លួនទើបសម្រាលកូនទី៣ បានរយៈពេល៨ខែប៉ុណ្ណោះ ហើយខ្លួននិងប្រពន្ធបានមានភាពរកាំរកូស ជាមួយគ្នាអស់រយៈពេល មួយអាទិត្យមកហើយ គឺមានទំនាស់គ្នាផ្ដើមចេញពីរឿងជំពាក់លុយគេនៅឯស្រុក ។
ដោយឡែក នៅវេលាម៉ោង១១យប់ថ្ងៃទី៥ ធ្នូ ខ្លួនបានផឹកស្រាស្រវឹង និងបានមានទំនាស់គ្នាជាមួយប្រពន្ធ រឿងជំពាក់លុយនោះជាថ្មីម្ដងទៀត ។ នៅលើកចុងក្រោយនោះដែរ ទំនាស់បានឈានដល់យការវាយតប់គ្នាទៅវិញទៅមក ដោយខណៈនោះស្ត្រីជាប្រពន្ធ បានក្រញ៉ីខ្លួន ទើបខ្លួនទាញបានវែកសម្លវាយទៅលើនាងនិងចាប់សក់បោកក្បាលនាង ផ្ទប់ទៅនឹងជញ្ជាំងផ្ទះជួលដែលខ្លួនស្នាក់នៅថែមទៀត បណ្ដាលឲ្យនាងដួលសន្លប់ស្ដូកស្ដឹង បាត់មាត់បាត់ កឈឹងលែងដឹងខ្លួនរហូត ខណៈនោះខ្លួនបានកោសខ្យល់ឲ្យនាង រហូតដល់ព្រឹកឡើងថ្ងៃទី៦ មករា នាងនៅតែមិនដឹងខ្លួនទៀត ទើបខ្លួនដឹកនាងទៅកាន់ មន្ទីពហុព្យាបាលចោមចៅ ប៉ុន្តែពេលទៅដល់គ្រូពេទ្យ បានប្រាប់ថា ប្រពន្ធបានស្លាប់ហើយ ។
ជននោះសារភាពបន្តទៀតថា ក្រោយមកខ្លួនបានដឹកនាងតាមម៉ូតូរ៉ឺម៉កកង់បី ទៅកាន់មន្ទីរពេទ្យបង្អែក ពោធិ៍ចិនតុងទៀត ធ្វើជានាំទៅសង្គ្រោះនៅទីនោះទៀត ដើម្បីបង្វែងដានសមត្ថកិច្ច ហើយពេលទៅដល់ក្រុម គ្រូពេទ្យបានប្រាប់ថា ប្រពន្ធរបស់ខ្លួនស្លាប់ហើយ ខណៈនោះខ្លួនប្រុងដឹកសពចេញ ក៏ត្រូវបានគ្រូពេទ្យឃាត់ និងរាយការណ៏ប្រាប់ឲ្យនគរបាលចុះទៅពិនិត្យមើល។
បន្ទាប់មកនគរបាល បានទៅដល់ឲ្យខ្លួនបីសាកសព នាងជាប្រពន្ធចុះពីលើម៉ូតូរ៉ឺម៉កកង់បី នាំយកទៅធ្វើការពិនិត្យកោសល្យវិច័យ ចំណែកខ្លួនក៏ត្រូវបាននគរបាល នាំទៅសាកសួរនិងឃាត់ខ្លួនតែម្ដង ។
ចែករំលែកព័តមាននេះ