រាជធានីភ្នំពេញ ៖ ដើម្បីពង្រឹងទំនាក់ទំនង និងកិច្ចសហប្រតិបត្តិការ ព្រមទាំងជំរុញពាណិជ្ជកម្មទ្វេភាគី ពិសេសទាក់ទាញភ្ញៀវទេសចរកម្ពុជា-ឥណ្ឌា ធ្វើដំណើរកម្សាន្តទៅវិញទៅមកឱ្យកើនឡើងថែមទៀត រដ្ឋាភិបាលឥណ្ឌាបានលើកទឹកចិត្តឱ្យវិនិយោគិនក្នុងស្រុកសិក្សា និងពិនិត្យមើលលទ្ធភាពនៃការបើកការហោះហើរត្រង់មកកម្ពុជា ។
ឯកអគ្គរដ្ឋទូតឥណ្ឌាប្រចាំកម្ពុជា លោក Naveen Srivastava មានប្រសាសន៍ថា ៖ «រដ្ឋាភិបាលឥណ្ឌាបានយកចិត្តទុកដាក់លើការធ្វើពាណិជ្ជកម្មជាមួយកម្ពុជា ហើយខ្ញុំផ្ទាល់ ក៏ដូចជាស្ថានទូតឥណ្ឌាប្រចាំនៅកម្ពុជា ព្រមទាំងប្រជាជននៃប្រទេសទាំងពីរ កំពុងខិតខំជំរុញឲ្យមានជើងហោះហើរផ្ទាល់រវាងប្រទេសទាំងពីរនាពេលឆាប់ៗខាងមុខ ។ នៅពេលកំណើននៃអ្នកដំណើរកើនឡើងនោះ ក្រុមហ៊ុនអាកាសចរណ៍នឹងផ្តោតលើការវិនិយោគជើងហោះហើរផ្ទាល់នេះ » ។
អនុរដ្ឋលេខាធិការក្រសួងទេសចរណ៍ លោក សូ វិសុទ្ធី បានឱ្យដឹងថា ក្រសួងទេសចរណ៍ស្នើសុំ និងជំរុញឱ្យមានការតភ្ជាប់ជើងហោះហើរពីឥណ្ឌាមកកាន់កម្ពុជា ។ ប៉ុន្តែតួនាទីនេះ វាអាស្រ័យខាងអាកាសចរណ៍ស៊ីវិល និងក្រុមហ៊ុនអាកាសចរណ៍ជាអ្នកសម្រេចចិត្ត ។
លោក សូ វិសុទ្ធី មានប្រសាសន៍ថា ៖ «ក្នុងនាមក្រសួងទេសចរណ៍ និងភាគី យើងចង់ឱ្យមានការហោះហើរត្រង់រវាងប្រទេសទាំងពីរដើម្បីទាញភ្ញៀវទេសចរឥណ្ឌាចូលមកទស្សនាកម្ពុជាបន្ថែមទៀត ពីព្រោះទីផ្សារទេសចរណ៍ឥណ្ឌានឹងមានកំណើនរហូតដល់៥០លាននាក់នៅឆ្នាំ២០២០ ដែលធ្វើដំណើរទៅក្រៅប្រទេស ខណៈបច្ចុប្បន្ននេះ ភ្ញៀវទេសចរឥណ្ឌាចូលទស្សនានៅកម្ពុជា មានជាង៣ម៉ឺននាក់ក្នុងឆ្នាំ២០១៦ ហើយនៅឆ្នាំ២០២០ កម្ពុជារំពឹងថា នឹងទទួលបានភ្ញៀវទេសចរឥណ្ឌាប្រហែល១១ម៉ឺននាក់ » ។
លោក ឡោ ធូរ៉ា ប្រធាននាយកដ្ឋានសិក្សាទីផ្សារ និងផ្សព្វផ្សាយនៃក្រសួងទេសចរណ៍ មានប្រសាសន៍ថា ៖ « ភ្ញៀវទេសចរឥណ្ឌាមានការកើនឡើងពីមួយឆ្នាំទៅមួយឆ្នាំក្នុងរង្វង់១០% ហើយយើងសង្ឃឹមថា នៅឆ្នាំ២០១៧នឹងកើនឡើង១០%បន្ថែមទៀត បើសិនជាយើងសហការគ្នា និងធ្វើសកម្មភាពផ្សព្វផ្សាយឱ្យបានច្រើនរវាងប្រទេសទាំងពីរកម្ពុជា-ឥណ្ឌា » ។
លោកបន្តថា ៖ « ភ្ញៀវទេសចរកម្ពុជាទៅទស្សនានៅប្រទេសឥណ្ឌាកាលពីឆ្នាំ២០១៥មានប្រហែល៤ពាន់នាក់ ជាភ្ញៀវទេសចរបែបសាសនាដើម្បីទៅឈ្វេងយល់បន្ថែមលើវិស័យព្រះពុទ្ធសាសនា ។ យើងសង្ឃឹមថាបន្ទាប់ពីប្រទេសទាំងពីរកម្ពុជា-ឥណ្ឌា ខិតខំធ្វើសកម្មភាពផ្សព្វផ្សាយផ្សេងៗជាមួយគ្នា នោះការយល់ដឹងរវាងពលរដ្ឋ និងពលរដ្ឋឱ្យយល់ពីគ្នានឹងមើលឃើញសារសំខាន់នៃគោលដៅទេសចរណ៍ ពិសេសផ្នែកសាសនា ។ កាលណាប្រជាពលរដ្ឋឈ្វេងយល់ពីគ្នាហើយនោះ កំណើនភ្ញៀវទេសចរនឹងកើនឡើង » ។
លោកលើកឡើងថា ៖ « បើសិនមានការតភ្ជាប់ជើងហោះហើរកាន់តែរហ័ស កំណើនភ្ញៀវទេសចរកាន់តែច្រើន តែសំខាន់ក្រុមហ៊ុនអាកាសចរណ៍ត្រូវការចំណាយពេលសិក្សាពីតម្រូវការទីផ្សារឱ្យបានច្បាស់ផ្នែកសេដ្ឋកិច្ច មុននឹងសម្រេចចិត្តធ្វើការហោះហើរ ត្រូវការរយៈពេល ហើយពេលណានោះយើងមិនទាន់ដឹងទេ ប៉ុន្តែរដ្ឋាភិបាល និងស្ថាប័នទេសចរណ៍នៃប្រទេសទាំងពីរកំពុងជំរុញការងារនោះ » ។
គួររំឭកថា ដើម្បីបង្កើនកិច្ចសហប្រតិបត្តិការរវាងកម្ពុជា-ឥណ្ឌា ក្នុងន័យទាក់ទាញភ្ញៀវទេសចរ ស្ថានទូតឥណ្ឌាប្រចាំកម្ពុជា គ្រោងរៀបចំមហោស្របឥណ្ឌាបង្ហាញពីការសម្តែងរបាំបុរាណរាមាយណៈ, របាំបុរាណកាតាក់ឥណ្ឌា, របាំប្រពៃណីម៉ានងារ, ពិធីបុណ្យព្រះពុទ្ធសាសនា និងបុណ្យអាហារជាដើម ។
បើតាមការបញ្ជាក់ពីឯកអគ្គរដ្ឋទូតឥណ្ឌាប្រចាំកម្ពុជា នៅក្នុងសន្និសីទកាលពីថ្ងៃទី៤ មករា កន្លងមកថា ទំហំពាណិជ្ជកម្មកម្ពុជា-ឥណ្ឌានៅឆ្នាំ២០១៦ អាចនឹងកើនឡើងលើសពី១១៩លានដុល្លារ ដោយសារមានការយកចិត្តទុកដាក់យ៉ាងខ្លាំងពីរដ្ឋាភិបាលឥណ្ឌា ក្នុងការជំរុញទំនាក់ទំនងសេដ្ឋកិច្ចនៃប្រទេសទាំងពីរ ៕
ចែករំលែកព័តមាននេះ