រន្ធត់ ! ម៉ូតូបុកម៉ូតូរបួសរដូករណែលពេញផ្លូវ
ខេត្តកណ្តាល ៖ គ្រោះថ្នាក់ចរាចរណ៍ដ៏រន្ធត់មួយបានកើតឡើងរវាងម៉ូតូ២គ្រឿងបណ្ដាលឲ្យរងរបួសធ្ងន់ស្រាល៥នាក់ដេករដូករណែកពេញផ្លូវកាលពីវេលាម៉ោង៥ និង១៥នាទី…
ខេត្តកណ្តាល ៖ គ្រោះថ្នាក់ចរាចរណ៍ដ៏រន្ធត់មួយបានកើតឡើងរវាងម៉ូតូ២គ្រឿងបណ្ដាលឲ្យរងរបួសធ្ងន់ស្រាល៥នាក់ដេករដូករណែកពេញផ្លូវកាលពីវេលាម៉ោង៥ និង១៥នាទីល្ងាច ថ្ងៃទី៥ ខែកមរា ឆ្នាំ២០១៧ នៅលើកំណាត់ផ្លូវជាតិលេខ១ ចន្លោះបង្គោលគីឡូម៉ែត្រលេខ២៨-២៩ ស្ថិតក្នុងភូមិខ្សុំ ឃុំបន្ទាយដែក ស្រុកកៀនស្វាយ ខេត្តកណ្តាល ។
យោងតាមរបាយការណ៍របស់លោកវរៈសេនីយ៍ត្រី ព្រំ សំណាង អធិការរង ទទួលផែនចរាចរណ៍ បានឲ្យដឹងថាមុនពេលកើតហេតុគេឃើញភាគីម៉ូតូសេ១២៥ ពណ៌ខ្មៅ ស៊េរីឆ្នាំ២០០៨ ពាក់ស្លាកលេខ ភ្នំពេញ 1AC-2343 បើកបរដោយឈ្មោះ ចាម ថារះ ភេទប្រុស អាយុ១៧ឆ្នាំ ជនជាតិខ្មែរ និងអ្នករួមដំណើរពីក្រោយម្នាក់ទៀតឈ្មោះ លីនភេទប្រុស មិនដឹងអាយុពិតប្រាកដ មានទីលំនៅភូមិកណ្តាល ឃុំបន្ទាយដែក ស្រុកកៀនស្វាយជាមួយគ្នា បានបើកបរក្នុងទិសដៅអ្នកលឿង-ភ្នំពេញ ពេលមកដល់ចំណុចខាងលើក៏មានម៉ូតូ១គ្រឿងទៀតម៉ាក ស៊ុយស៊ូគីឡេត ពណ៌ស ពាក់ផ្លាកលេខ ភ្នំពេញ 1DD-4762 បើកបរដោយឈ្មោះ វីរៈបុត្រ ភេទប្រុស អាយុ១៩ឆ្នាំ ជនជាតិខ្មែរ ជិះឌុបគ្នា២នាក់ ម្នាក់ឈ្មោះ ឌុក រតនា ភេទប្រុស អាយុ១៩ឆ្នាំ ជនជាតិខ្មែរ និងម្នាក់ទៀតឈ្មោះ ជន វិច្ឆិកា ភេទប្រុស អាយុ១៩ឆ្នាំ ជនជាតិខ្មែរ អ្នកទាំង៣មានទីលំនៅឃុំបន្ទាយដែក ស្រុកកៀនស្វាយជាមួយគ្នា បានបើកម៉ូតូវ៉ាជែងរថយន្ត១គ្រឿងមិនស្គាល់ម៉ាកដែលបើកស្របទិសគ្នាពីភ្នំពេញទៅអ្នកលឿងក្នុងល្បឿនយ៉ាងលឿន ក៏បានជ្រុលចង្កូតទៅបុកភាគីម៉ូតូដែលកំពុងជិះឌុបគ្នា២នាក់នៅខាងស្តាំដៃទាំងកំរោលពេញទំហឹង បណ្តាលឲ្យរងរបួសទាំងសងខាង ធ្ងន់៣នាក់ ស្រាល២នាក់ ដោយឈ្មោះចាម ថារៈ របួសបាក់ជើងខាងឆ្វេង ចំណែកឈ្មោះ វីរៈបុត្រ របួសបាក់ជើងខាងស្តាំ បាក់ដៃខាងស្តាំ និងបែកប្រអប់ជើងខាងស្តាំនិងអ្នករួមដំណើរឈ្មោះ ឌុក រតនា រងរបួសធ្ងន់ដែរ ។
ក្រោយពេលកើតហេតុ ជនរងគ្រោះត្រូវបានក្រុមគ្រួសារដឹកយកទៅសង្គ្រោះនៅមន្ទីរពេទ្យរាជធានីភ្នំពេញរៀងៗខ្លួន ។ ចំណែកមធ្យោបាយម៉ូតូទាំង២គ្រឿងត្រូវបាននគរបាលចរាចរណ៍សហការជាមួយនគរបាលប៉ុស្តិ៍ចុះអន្តរាគមន៍ធ្វើការវាស់វែង រួចយកទៅរក្សាទុកបណ្តោះអាសន្ននៅអធិការដ្ឋាននគរបាលស្រុកកៀនស្វាយ ដើម្បីកសាងសំណុំរឿងចាត់ការបន្តតាមនីតិវិធីច្បាប់ចរាចរណ៍ផ្លូវគោក ៕
ចែករំលែកព័តមាននេះ