វ៉េបសាយ DEFENSE NEWS ដែលដកស្រង់ប្រភពព័ត៌មានក្នុងផ្ទៃកងទ័ពអាមេរិកសរសេរថា ម៉ាស៊ីនមួយក្នុងចំណោមម៉ាស៊ីនរបស់យន្តហោះទម្លាក់គ្រាប់បែកយុទ្ធសាស្ត្រអាមេរិក B-52 បានដាច់ចេញពីតួយន្តហោះ ពេលកំពុងហោះហ្វឹកហ្វឺនជាទម្លាប់នៅភាគខាងជើងសហរដ្ឋអាមេរិក ។
ពេលកំពុងហោះហើរជាទម្លាប់ក្នុងរដ្ឋដាកូតាខាងជើងយន្តហោះ B-52 នេះបានខូចពីលើមូលដ្ឋានយោធា MINOT ហើយម៉ាស៊ីនមួយរបស់យន្តហោះនេះបានដាច់ចេញពីតួពេលកំពុងហោះហើរ ។ ប្រភពនេះបន្តថា ទោះជាខូចម៉ាស៊ីនបែបនេះក្តីយន្តហោះដែលមានទាហាន៥នាក់ជិះក្នុងនោះ នៅតែអាចចុះចតបានដោយពុំមានបញ្ហានៅជិតមូលដ្ឋានយោធានេះ ព្រោះយន្តហោះយុទ្ធសាស្ត្រនោះ មានម៉ាស៊ីនខ្លាំងប្រភេទ TF-33-P-9/103 ដល់ទៅ៨ឯណោះ ។
យោងតាមកងយោធាថា ឧទ្ធម្ភាគចក្រស៊ើបការណ៍មួយគ្រឿងត្រូវបានបញ្ជូនទៅ ហើយរកឃើញដោយឆាប់នូវម៉ាស៊ីនដែលជ្រុះត្រង់កន្លែងមួយចម្ងាយ៤០គីឡូម៉ែត្រភាគឦសានមូលដ្ឋានយោធា MINOT ។ទាក់ទិននឹងមូលហេតុនៃគ្រោះថ្នាក់នោះ សម្រាប់ពេលនេះកងទ័ពនៅពុំទាន់អាចកំណត់ច្បាស់នៅឡើយ ។ កងយោធាគ្រាន់តែបញ្ជាក់ថា ក្នុងយន្តហោះយុទ្ធសាស្ត្រនេះពុំមានផ្ទុកអាវុធឡើយ ពេលហោះហើរហ្វឹកហ្វឺន ។
យន្តហោះ B-52 ផលិតជាខ្សែសង្វាក់កាលពីឆ្នាំ១៩៥២មកម្ល៉េះ ។ កងទ័ពអាមេរិកតែងប្រើវាជាបន្តបន្ទាប់ចាប់តាំងពីឆ្នាំ១៩៥៥មកហើយ ពុំគ្រោងបោះបង់ចោលឡើយមុនឆ្នាំ២០៤០ ជាពេលដែលយន្តហោះទម្លាក់គ្រាប់បែកយុទ្ធសាស្ត្រជំនាន់ថ្មី B-21 ត្រូវដាក់ឱ្យប្រើប្រាស់ដោយទូលំទូលាយ ៕
ចែករំលែកព័តមាននេះ