ខេត្តស្វាយរៀង ៖ រឿងរ៉ាវនឹកស្មានមិនដល់លោកប្រាក់ សារឿន អាយុ៥០ឆ្នាំ និងប្រពន្ធឈ្មោះឡុក សាវ៉េង អាយុ៤៩ឆ្នាំ បាននិងកំពុងនាំគ្នាដាក់ពាក្យប្តឹងទៅសាលាឧទ្ធរណ៍ បន្ទាប់ពីសាលាដំបូងខេត្ត កាត់ឱ្យពួកគាត់ចាញ់ក្តី ហើយប្រគល់ដីលំនៅឋានទំហំ៦០
ខេត្តស្វាយរៀង ៖ រឿងរ៉ាវនឹកស្មានមិនដល់លោកប្រាក់ សារឿន អាយុ៥០ឆ្នាំ និងប្រពន្ធឈ្មោះឡុក សាវ៉េង អាយុ៤៩ឆ្នាំ បាននិងកំពុងនាំគ្នាដាក់ពាក្យប្តឹងទៅសាលាឧទ្ធរណ៍ បន្ទាប់ពីសាលាដំបូងខេត្ត កាត់ឱ្យពួកគាត់ចាញ់ក្តី ហើយប្រគល់ដីលំនៅឋានទំហំ៦០អាទៅឱ្យម្តាយឈ្មោះ ឈុំ ផង់ អាយុ៨៧ឆ្នាំ ជាអ្នកកាន់កាប់ដីនោះ ។ ពួកគាត់ជាកូនបានអះអាងថា ការសម្រេចរបស់សាលាដំបូងខេត្ត គឺអយុត្តិធម៌សម្រាប់ពួកគាត់ និងមិនអាចទទួលយកបាននោះទេ ។
តាមការបញ្ជាក់របស់ប្តីប្រពន្ធទាំង២នាក់ខាងលើបានឱ្យដឹងថា កាលពីឆ្នាំ២០០៦ ដោយសារកូនប្រុសទី៣ជំពាក់លុយគេច្រើន ហើយគេបានតម្រូវឱ្យមានប្រាក់សងគេភ្លាមៗនោះ ម្តាយរបស់គាត់ឈ្មោះ ឈុំ ផង់ បានសម្រេចចិត្តលក់ដីលំនៅឋានរបស់គាត់ទំហំ៦០អាគឺដីកូនប្រុសទី៣ចំនួន៣០អា និងដីលោកយាយ៣០អាក្នុងតម្លៃ១២០០ដុល្លារ ដើម្បីយកលុយទៅសងគេ ហើយបានមកអង្វរឱ្យគាត់ជួយទិញយក ព្រោះស្តាយដីកេរមិនចង់ឱ្យបានទៅអ្នកដទៃ ចំណែករូបគាត់និងប្តី (ប្រាក់ សារឿន-ឡុក សាវ៉េង) គ្មានលុយទិញនោះទេ ប៉ុន្តែដោយសារដីភូមិរបស់គាត់នៅខាងក្រោយ ផ្លូវចេញចូលដើរកាត់តាមដីម្តាយ ហើយបើអ្នកផ្សេងគេទិញយកដីនោះទៅ គេនឹងបិទផ្លូវ ពួកគាត់ច្បាស់ជាគ្មានផ្លូវដើរចូលផ្ទះទេ ។ ដោយហេតុផលនេះហើយ ទើបពួកគាត់បង្ខំចិត្តទៅចងការមាសគេ១តម្លឹងពីបងប្អូនជីដូនមួយឈ្មោះ សោម សុផាន អាយុ៤៤ឆ្នាំ ដែលនៅជិតខាងគ្នាយកមកបង្គ្រប់ជាមួយលុយរបស់គាត់ ក៏ទិញយកដីពីម្តាយតែម្តងទៅ ។
ប្រភពបានបន្តថា ដោយពេលទិញនោះ ពួកគាត់ជាកូន និងលោកយាយជាម្តាយ ព្រមទាំងបងប្អូនប៉ុន្មាននាក់ទៀត បាននាំគ្នាទៅធ្វើឯកសារនៅសាលាឃុំ ដើម្បីឱ្យឃុំជួយដឹងឮ ប៉ុន្តែពេលធ្វើលិខិតស្នាមនោះ ដោយសារតែខ្លាចធ្វើលិខិតទិញ-លក់គេទាមទារឱ្យបង់ពន្ធអស់លុយកាក់ទៀត ទើបពួកគាត់នាំគ្នាធ្វើជាលិខិតផ្ទេរសិទ្ធិជំនួសវិញ ដោយដាក់ថាលោកយាយ ឈុំ ផង់ ជាម្តាយបានផ្ទេរដីភូមិទំហំ៦០អា មកឱ្យកូនឈ្មោះ ប្រាក់ សារឿន និងប្រពន្ធឈ្មោះ ឡុក សាវ៉េង ជាអ្នកកាន់កាប់ដីនោះ ។
ប្រភពដដែលបានបន្តទៀតថា ក្រោយពេលទិញដីពីម្តាយបានហើយ ពួកគាត់មិនបានឱ្យម្តាយចេញពីដីនោះទេ ព្រោះម្តាយចាស់ណាស់ទៅហើយ គឺពួកគាត់បានធ្វើផ្ទះឈើថ្មីនៅលើដីដែលទិញពីម្តាយនោះ ហើយឱ្យម្តាយរស់នៅលើផ្ទះនោះដដែល ជាមួយនឹងចៅប្រុសឈ្មោះសុខ សុភ័ក្រដែលត្រូវជាកូនរបស់ពួកគាត់ទាំង២ ហើយចំណីអាហារផ្សេងៗ គឺពួកគាត់ជាកូនៗជួយផ្គត់ផ្គង់ទំនុក បម្រុង ហើយលោកយាយបានរស់នៅជាមួយចៅរហូតដល់ចៅធំ ពេញកំលោះរៀបការប្រពន្ធ និងយកប្រពន្ធមករស់នៅលើផ្ទះនោះជាមួយជីដូនរហូតបង្កើតបានចៅទួតម្នាក់ទៀត ឱ្យជីដូនជួយមើលទៀតផង ។
ប៉ុន្តែរហូតមកដល់ឆ្នាំ២០១៤ មិនដឹងជាលោកយាយជាម្តាយនឹកឃើញបែបណា ឬមួយក៏មានអ្នកណាផ្លុំត្រចៀកក៏មិនដឹង ស្រាប់តែលោកយាយឡាំប៉ាទាមទារយកដីដែលលក់ឱ្យកូនរួចហើយនោះមកធ្វើជាកម្មសិទ្ធិរបស់ខ្លួនវិញ ដោយអះអាងថា គាត់លក់តែដីរបស់កូន ឯដីរបស់គាត់ គាត់មិនបានលក់ទេ ។ ដោយសារតែពួកគាត់ជាកូនមិនព្រមឱ្យ ទើបលោកយាយឡើងទៅដាក់ពាក្យប្តឹងនៅសាលាឃុំ ចំណែកខាងឃុំពេលដោះស្រាយបានបង្ខំឱ្យកូនប្រគល់ដីនោះមកឱ្យម្តាយវិញ ដោយអះអាងថាឯកសារផ្ទេរសិទ្ធិពីម្តាយទៅកូនដែលបានធ្វើពេលទិញលក់ក្នុងឆ្នាំ២០០៦នោះ មិនអាចយកជាការបានឡើយ ព្រោះវាជាលិខិតបញ្ជាក់ការផ្ទេរមរតក ពេលនេះម្ចាស់មរតកទាមទារយកវិញត្រូវតែឱ្យគាត់វិញ ។
ការសម្រេចរបស់លោកមេឃុំ ពួកគាត់ជាម្ចាស់ដីមិនសុខចិត្តនោះទេ ហើយក៏មិនព្រមប្រគល់ដីនោះទៅឱ្យម្តាយដែរ ទើបបន្តប្តឹងទៅតុលាការខេត្តតែម្តង ហើយនៅខែកុម្ភៈ ឆ្នាំ២០១៦ សាលាដំបូងខេត្តបានកាត់ឱ្យលោកយាយជាអ្នកឈ្នះ ហើយប្រគល់ដីនោះទៅឱ្យលោកយាយគ្រប់គ្រងវិញ តែពួកគាត់២នាក់ប្តីប្រពន្ធនៅតែមិនសុខចិត្តទើបប្តឹងទៅសាលាឧទ្ធរណ៍ទៀត ។
ជុំវិញរឿងរ៉ាវខាងលើនេះ ត្រូវបានស្ត្រីឈ្មោះ សោម សុផាន ដែលត្រូវជាក្មួយលោកយាយ ឈុំ ផង់ និងជាអ្នកឱ្យមាសទៅប្តីប្រពន្ធទាំង២នាក់ចងការបានប្រាប់កោះសន្តិភាពថា លោកយាយ ឈុំ ផង់ គឺពិតជាបានលក់ដីនោះឱ្យកូនពិតមែន ហើយអ្នកស្រុកជិតខាងផ្សេងៗទៀត ក៏បានដឹងឮដែរ រួមទាំងកូនៗរបស់លោកយាយ៣-៤នាក់ទៀតផង ។ លុះ៨ឆ្នាំក្រោយមក មិនដឹងជាមានមូលហេតុអ្វី បានជានៅសុខៗស្រាប់តែលោកយាយដើរប្តឹងទាមទារយកដីនោះមកវិញ ។ ពេលនេះលោកយាយអាយុ៨៧ឆ្នាំទៅហើយ និងកំពុងរស់នៅលើដីនេះស្រាប់ទៀត កូនៗមិនបានដេញគាត់ចេញទេ ថែមទាំងប្រាប់ថា ឱ្យគាត់នៅរហូតអស់១ជីវិតរបស់គាត់ តែលោកយាយនៅតែដើរប្តឹង តើលោកយាយចង់យកដីនោះទៅណា ?
ដោយឡែកលោក សោម ហង់ មេឃុំញរ បានឱ្យដឹងតាមទូរស័ព្ទថា រឿងរ៉ាវម្តាយកូនទាំង២នាក់ខាងលើនេះ គឺម្នាក់ៗដណ្តើមគ្នាដេកកណ្តាល ដណ្តើមគ្នាយកត្រូវរៀងៗខ្លួន ទើបអាជ្ញាធរដោះស្រាយមិនចេញ ហើយភាគីទាំង២ក៏ប្តឹងប្តល់គ្នាឡើងទៅតុលាការទៅ ។ ចំណែករឿងឯកសារវិញលោកអះអាងថា កាលពីពេលដែលម្តាយកូនទាំង២មកឱ្យសាលាឃុំជួយបញ្ជាក់ដឹងឮនោះ គឺគេមិនបានមកជួបមេឃុំទេ គេទៅជួបធ្វើឯកសារតែជាមួយស្មៀន ពេលធ្វើហើយស្មៀនយកមកឱ្យលោកស៊ីញ៉េ លោកក៏ស៊ីញ៉េឱ្យទៅដោយមិនបានពិនិត្យមើលថាជាឯកសារលក់ ឬឯកសារផ្ទេរសិទ្ធិអ្វីនោះទេ ។
ចំពោះរឿងរ៉ាវខាងលើនេះ កោះសន្តិភាពមិនអាចរកការបំភ្លឺពីលោកយាយ ឈុំ ផង់ ដែលជាភាគីវិវាទបាននោះទេ គិតត្រឹមថ្ងៃទី៥ មករា ដោយសារតែលោកយាយត្រូវបានសាលាឧទ្ធរណ៍កោះហៅទៅសាកសួរនៅភ្នំពេញបាត់ហើយ ។ ចំណែកភាគីខាងកូនទាំង២នាក់ប្តីប្រពន្ធបានបញ្ជាក់ប្រាប់ថា ពួកគាត់នៅតែឱ្យផ្ទះនិងដីនោះឱ្យលោកយាយជាម្តាយរស់នៅដដែល គឺឱ្យនៅអស់១ជីវិតរបស់គាត់ ហើយបើលោកយាយត្រូវការលុយកាក់ទៀតនោះ ពួកគាត់ក៏ស្ម័គ្រចិត្តជូនគាត់ទៀតដែរ ឬមួយលោកយាយចង់បានពាក្យថា ដីនោះជាដីរបស់គាត់ដូចដើមនោះ ពួកគាត់ក៏ស្ម័គ្រចិត្តឱ្យដែរ ប៉ុន្តែពួកគាត់សុំឱ្យលោកយាយធ្វើលិខិតបញ្ជាក់ផ្លូវការ ដោយមានការដឹងឮពីអ្នកស្រុក និងអាជ្ញាធរថា លោកយាយនឹងមិនលក់ដីនេះ ហើយក៏មិនប្រគល់ដីនេះទៅឱ្យកូន ឬសាច់ញាតិណាទៀតដែរ គឺមានន័យថា ពេលម្តាយនៅរស់ ដីនេះជារបស់គាត់ តែបើពេលណាគាត់លែងនៅ ដីនេះត្រូវតែជារបស់ពួកគាត់២នាក់ប្តីប្រពន្ធ ព្រោះពួកគាត់បានទិញពីម្តាយរូចហើយ ៕
ចែករំលែកព័តមាននេះ