ស្ត្រីម្នាក់ស្រែកយំបណ្តើររត់ទៅប្តឹងសមត្ថកិច្ចបណ្ដើរ
រាជធានីភ្នំពេញ ៖ ស្ត្រីម្នាក់បានស្រែកយំបណ្ដើររត់មកប្តឹងសមត្ថកិច្ចបណ្ដើរ បន្ទាប់ពីបុរសជាប្តីបានវាយហែកហោប៉ៅយកលុយដែលផ្ញើត្រឡប់ទៅវិញ ។ ហេតុការណ៍ …
រាជធានីភ្នំពេញ ៖ ស្ត្រីម្នាក់បានស្រែកយំបណ្ដើររត់មកប្តឹងសមត្ថកិច្ចបណ្ដើរ បន្ទាប់ពីបុរសជាប្តីបានវាយហែកហោប៉ៅយកលុយដែលផ្ញើត្រឡប់ទៅវិញ ។ ហេតុការណ៍កើតឡើងកាលពីវេលាម៉ោង៨ និង៣០នាទីយប់ ថ្ងៃទី៤ ខែមករា ឆ្នាំ២០១៧ ស្ថិតនៅភូមិអង្គ សង្កាត់ចោមចៅ ខណ្ឌពោធិ៍សែនជ័យ។
ស្ត្រីជាប្រពន្ធឈ្មោះ ឈៀវ ង៉ា អាយុ២៥ឆ្នាំ ឯបុរសជាប្តីឈ្មោះ ញ៉ែម ម៉ៅ អាយុ២៧ ឆ្នាំមុខរបរបើកបររថយន្តដឹកដី រស់នៅភូមិកើតហេតុខាងលើ ។
ស្ត្រីជាប្រពន្ធបានរៀបរាប់ប្រាប់សមត្ថកិច្ចឲ្យដឹងថា តាំងពីរៀបការជាមួយគ្នាមក៧ឆ្នាំហើយ ដែលពេលនេះមានកូនស្រីម្នាក់អាយុ៥ឆ្នាំ គាត់មិនដែលមានសេចក្តីសុខឡើយ ដោយបុរសជាប្តីទុកដាក់លុយដែលរកបានមកដោយខ្លួនឯង ហើយក៏មិនដែលឲ្យលុយគាត់ចាយវាយដែរ ។ កាលកូនស្រីទើបមានអាយុប្រហែល១ឆ្នាំ ប្តីចិត្តសាវារបស់នាងនេះបានរត់ចោលនាងទៅរស់នៅជាមួយស្ត្រីមេម៉ាយម្នាក់បាត់ ទើបតែរយៈពេល២ឆ្នាំក្រោយនេះគាត់ត្រឡប់មករស់នៅជាមួយគាត់វិញ ស្មានថាគាត់កែប្រែចិត្តហើយ ការពិតគាត់នៅតែដដែលគឺនៅតែដើរផឹកស៊ី ជក់ថ្នាំញៀន មិនដែលគិតពីប្រពន្ធកូនឡើយ ។
ស្ត្រីជាប្រពន្ធបញ្ជាក់ថា នៅល្ងាចថ្ងៃកើតហេតុ ប្តីរបស់នាងបានយកលុយមកផ្ញើ៣៨៥.០០០រៀលរួចចេញទៅក្រៅបាត់ លុះមួយសន្ទុះក្រោយមកស្រាប់តែត្រឡប់មកទារលុយវិញ តែនាងមិនព្រមឲ្យ ស្រាប់តែចាប់នាងវាយហែកហោប៉ៅខោយកលុយវិញ រួចចាកចេញទៅបាត់តែម្តង ។
ក្រោយពេលកើតហេតុ ស្ត្រីជាប្រពន្ធបានរត់ទៅប្តឹងសមត្ថកិច្ចឲ្យជួយអន្តរាគមន៍ និងប្តឹងលែងលះបុរសជាប្តីចិត្តសាវានេះភ្លាមៗផងដែរ តែត្រូវសមត្ថកិច្ចប្រាប់ថា បើចង់លែងលះចាំព្រឹកចាំទៅប្តឹងសុំលែងលះនៅសាលាសង្កាត់ទៅ ខាងសាលាសង្កាត់ទើបគេមានសិទ្ធិក្នុងការដោះស្រាយរឿងលែងលះនេះ ៕
ចែករំលែកព័តមាននេះ