រាជធានីភ្នំពេញ ៖ មានប្រជាពលរដ្ឋ១ក្រុមប្រមាណ១៥គ្រួសារ ដែលអះអាងថាពួកគាត់ជាប្រជាពលរដ្ឋរស់នៅក្នុងប្លុកបុរីកីឡា សង្កាត់វាលវង់ ខណ្ឌ៧មករា កាលពីព្រឹកថ្ងៃទី៥ មករា ២០១៧ បាននាំគ្នាឆ្លាក់ធ្វើរូបទីងមោងដេកស្លាប់ និងអំបិលលាយម្ទេស១ថាសដាក់ក្បែរនោះ ព្រមទាំងបដា៤ទៅ៥ផ្ទាំង ដើម្បីបង្ហាញចំពោះអ្នកសារព័ត៌មាន និងមហាជនឲ្យដឹងថា ពួកគេបានរងទុក្ខវេនាបាត់ទីជម្រកស្នាក់នៅដោយសារក្រុមហ៊ុនផានអ៊ីម៉ិច។ សកម្មភាពនោះត្រូវបានក្រុមប្រជាពលរដ្ឋទាំង១៥គ្រួសារនិយាយថា ជាការរៀបចំធ្វើសន្និសិទសារព័ត៌មានបង្ហាញអំពីបញ្ហាសាលារាជធានីភ្នំពេញដោះស្រាយ ដែលពួកគេមិនអាចទទួលយកបាន។
កម្មវិធីនោះដឹកនាំដោយអ្នកស្រី សរ ស៊ន សកម្មជនសហគមន៍បុរីកីឡា និងអ្នកស្រី ប៊ូវ សោភា សកម្មជនសហគមន៍បឹងកក់ និងមានអ្នកចូលរួមប្រមាណ២០នាក់ រៀបចំនៅក្រោមអគារទី៥ និងទី៦បុរីកីឡា។ រូបទីងមោងធ្វើជាមនុស្សស្រីសក់វែងដេកស្លាប់ ដោយគ្របដណ្តប់សំពត់ស និងមានគួរមុខមាត់ហាក់ដូចជាសំដៅទៅលើបុគ្គលណាម្នាក់ ព្រមទាំងនៅលើផ្ទាំងសំពត់ស គេបានបិទបដា១ផ្ទាំងដែលមានក្លឹមសារជាអក្សថា ចោរលួចដីត្រូវទទួលខុសត្រូវតាមច្បាប់។
បដាខ្លះដែលគេឈរកាន់មានពាក្យពេចន៍ខុសៗគ្នាដូចជា ការបណ្តេញប្រជាពលរដ្ឋចេញពីលំនៅដ្ឋាន មិនមែនជាដំណោះស្រាយល្អទេ ក្រុមហ៊ុនផានអ៊ីម៉ិចត្រូវគោរពកិច្ចសន្យាសង់អគារឲ្យបានគ្រប់១០អគារ ទីណាមានសម្តេច ហ៊ុន សែន ទីនោះត្រូមានទីជម្រកប្រជាពលរដ្ឋសមរម្យ។ល។ ជាមួយនោះដែរក៏មានសំឡេងស្រែកបន្លឺឡើងថា ពួកយើងជាប្រជាពលរដ្ឋដែលរស់នៅបុរីកីឡា ត្រូវបានក្រុមហ៊ុនផានអ៊ីម៉ិចបណ្តេចេញ ដោយសំអាងថា ដើម្បីអភិវឌ្ឍន៍តំបន់បុរីកីឡានៅនឹងកន្លែង និងសន្យាសង់អគារឲ្យពួកគាត់ស្នាក់នៅបានសមរម្យ ទីបំផុតច្រើនឆ្នាំហើយមកដល់ពេលនេះនៅមិនទាន់មានដំណោះស្រាយនៅឡើយទេ។
គួរបញ្ជាក់ថា កាលពីថ្ងៃទី៤ មករា ២០១៧ សាលារាជធានីភ្នំពេញ បានហៅប្រជាពលរដ្ឋ១៥គ្រួសារនោះទៅដោះស្រាយ ក្នុងនោះបានសាលារាជធានីបានឲ្យ១គ្រួសារ ៣០០០ដុល្លារអាមេរិក និងដី១កន្លែងនៅភូមិអណ្តូង ជាយក្រុងភ្នំពេញ ប៉ុន្តែដំណោះស្រាយនោះមិនត្រូវបានក្រុមប្រជាពលរដ្ឋ១៥គ្រួសារទទួលយកទេ។ ហេតុនេះទើបព្រឹកថ្ងៃទី០៥ មករា ២០១៧ ពួកគាត់ប្រមូលផ្តុំគ្នាធ្វើសន្និសិទសារព័ត៌មាននេះ ប៉ុន្តែអ្នកស្រី សរ ស៊ន បានប្រកាសចំពោះមុខក្រុមអ្នកគាំទ្រថា នៅព្រឹកថ្ងៃទី៦ មករា នេះនឹងមានប្រជាពលរដ្ឋ១៥០គ្រួសារ មកពីភូមិភ្នំបាទត ដែលសុទ្ធសឹងជាប្រជាពលរដ្ឋរស់នៅបុរីកីឡា រងគ្រោះដោយការបណ្តេញចេញ មកជួបជុំគ្នាដើម្បីតវ៉ាថែមទៀត។
ក្រុមអ្នកតវ៉ានៅតែទាមទារឲ្យសាលារាជធានីភ្នំពេញ ជំរុញទៅក្រុមហ៊ុនផាន អ៊ីម៉ិច សង់អគារឲ្យគ្រប់១០អគារតាមកិច្ចសន្យា ចុងក្រោយពួកគាត់ថា ឲ្យ១គ្រួសារ ៣០០០ដុល្លារយកទៅធ្វើអីបាន មិនស្មើសង់បង្គន់សាលាក្រុង១ផង។ បើតាមប្រភពព័ត៌មានពីអាជ្ញាធរឲ្យដឹងថា ប្រជាពលរដ្ឋ១៥គ្រួសារនេះមិនមានឈ្មោះក្នុងមូលដ្ឋានទេ គាត់ជាមនុស្សស្នាក់នៅបណ្តោះអាសន្ន ដូច្នេះការដោះស្រាយឲ្យ១គ្រួសារ៣០០០ដុល្លារ និងដី១កន្លែងនៅជាងក្រុងនោះ ជាគោលនយោបាយរបស់សាលារាជធានីភ្នំពេញទេ៕
ចែករំលែកព័តមាននេះ