ខេត្តក្រចេះ ៖ ដូចតាមការសន្និដ្ឋានពីនគរបាល ក៏ដូចពលរដ្ឋថា ការបាត់ខ្លួនរបស់បុរសជាអ្នកនេសាទនិងកូនប្រុសអាយុ៤ឆ្នាំម្នាក់ពិតជាត្រូវលង់ទឹកទន្លេស្លាប់ ព្រោះក្រោយការបាត់ខ្លួនអ្នកភូមិ និងនគរបាលបានដើររកគ្រប់ច្រកល្ហកទាំងនៅលើគោក និងលើកោះ មិនប្រទះឃើញ ចំណែកឯសាកសពក៏ត្រូវបានគេរុករកឃើញអណ្តែតទឹកជាបន្តបន្ទាប់។ នគរបាលស្រុកសំបូរ បានឲ្យដឹងថា សាកសពរបស់បុរសជាឪពុកឈ្មោះ ណុយ សុផា អាយុ៣៨ឆ្នាំ រស់នៅភូមិចារថ្នោល ឃុំសំបូរ ស្រុកសំបូរ ត្រូវបានគេប្រទះឃើញស្លាប់ អណ្តែតទឹកនៅល្ងាចថ្ងៃទី៥ ខែមករា ខណៈដែលសាកសពកូនប្រុសអាយុ៤ឆ្នាំ ត្រូវបានគេប្រទះឃើញស្លាប់ងណ្តែតទឹកមុននេះ២ថ្ងៃ។
អធិការរងនគរបាលស្រុកសំបូរ លោកវរសេនីយ៍ត្រី ណយ ស៊ីថាច បានឲ្យដឹងថា ជនរងគ្រោះពីរនាក់ឪពុក និងកូន បានបាត់ខ្លួនកាលពីថ្ងៃទី២ មករា និងបានបង្កឲ្យមានការភា្ញក់ផ្អើលដល់អ្នកភូមិ ក៏ដូចជានគរបាល ក្រោយពីបុរសរូបនេះ បាននាំកូនប្រុសតូចម្នាក់ទៅសាមង នៅកន្ទុយកោះក៏បានបានដំណឹងឃើញតែទូកអណ្តែតទឹក។ លោកអធិការរងបានបញ្ជាក់ថា ក្រោយការបាត់ខ្លួនអ្នកទាំងពីរ នគរបាលក៏ដូចជាអ្នកភូមិបានសន្និដ្ឋានថា ពួកគេអាចជួបហេតុការណ៍លង់ទឹកទន្លេស្លាប់ដោយប្រការណាមួយ។ ព្រោះនៅគ្រប់ច្រកល្ហក នៅលើកោះ និងនៅលើគោក ត្រូវបានធ្វើការរុករកតែមិនត្រូវបានប្រទះឃើញ។
ហើយមូលហេតុការលង់ទឹកស្លាប់របស់ជនរងគ្រោះពីរនាក់ឪពុក និងកូន ក៏ត្រូវបានគេសន្និដ្ឋានថា ទំនងកូនតូចធ្លាក់ទឹក ហើយបុរសជាឪពុកបានចុះទៅតាម ទើបបណ្តាលឲ្យលង់ស្លាប់ទាំងពីរនាក់ ព្រោះតំបន់កន្ទុយកោះដែលពួកគេបានទៅធ្វើនេសាទនោះ សន្ធឹកទឹកទន្លេហូរខ្លាំង និងមានវិសាលភាពល្វឹងល្វើយ។ បើតាមអ្នកភូមិនិយាយថា មូលហេតុដែលបុរសរូបនេះ ចេញទៅធ្វើនេសាទនៅវេលាទាបភ្លឺ និងបានយកកូនតូចទៅជាមួយរហូតជួបគ្រោះអកុលសបែបនេះ ក៏ដោយសារតែកូនយំតាម ខណៈដែលបុរសរងគ្រោះសពថ្ងៃរស់នៅតែពីនាក់ឪពុក និងកូន ប្រកបរបរនេសាទ ដើម្បីចិញ្ចឹមឆ្នាំងព្រោះស្ត្រីជាប្រពន្ធមានមុខរបរជាអ្នកបំរើការងារនៅកាស៊ីណូ ក្រុងបាវិត
។ យ៉ាងណាក៏ដោយ ក្រោយការបាត់ខ្លួនរបស់ឪពុកកូនទាំងពីរ លោកឧត្តមសេនីយ៍ លន់ សុផាត ស្នងការនគរបាលខេត្ត បានចាត់ឲ្យមន្ត្រីនគរបាលជាច្រើននាក់បន្តការរុករកឲ្យអស់លទ្ធភាព និងផ្តល់នូវអំណោយមួយចំនួន និងថវិកាជាង១លានរៀល ដល់ក្រុមគ្រួសារ សាច់ញាតិបុរសរងគ្រោះផងដែរ៕
ចែករំលែកព័តមាននេះ