ទាល់តែមានភ្លើងឆេះទើបដឹងការពិត
ខេត្តកណ្តាល ៖ អគ្គិភ័យឆេះទីតាំងសិប្បកម្មមួយកន្លែងនៅភូមិពពាលខែ២ ឃុំដីឥដ្ឋ ស្រុកកៀនស្វាយបង្កឲ្យមានការភ្ញាក់ផ្អើលកាលពីវេលាម៉ោង២ និង២០នាទីរសៀល …
ខេត្តកណ្តាល ៖ អគ្គិភ័យឆេះទីតាំងសិប្បកម្មមួយកន្លែងនៅភូមិពពាលខែ២ ឃុំដីឥដ្ឋ ស្រុកកៀនស្វាយបង្កឲ្យមានការភ្ញាក់ផ្អើលកាលពីវេលាម៉ោង២ និង២០នាទីរសៀល ថ្ងៃទី៤ ខែមករា ឆ្នាំ២០១៧ តែមិនរងការខូចខាតធ្ងន់ធ្ងរទេ ប៉ុន្តែអ្វីដែលគួរឲ្យកត់សម្គាល់នោះគឺថា ក្រោយពីមានភ្លើងឆេះនេះទើបដឹងថា ទីតាំងសិប្បកម្មខាងលើជាទីតាំងលួចចម្រាញ់ប្រេងខ្មៅដោយខុសច្បាប់ ដែលបង្កផលប៉ះពាល់ដល់ប្រជាពលរដ្ឋជាយូរឆ្នាំមកហើយ ។
ម្ចាស់ទីតាំងលួចចម្រាញ់ប្រេងខ្មៅអត់ច្បាប់នេះត្រូវបានគេស្គាល់ថាឈ្មោះ ច្រិក វ៉ាន់ថន ភេទប្រុស អាយុ៥៦ឆ្នាំជនជាតិខ្មែរ ជាមន្ត្រីយោធា មានទីលំនៅភូមិសំរោង ឃុំតាខ្មៅ ក្រុងតាខ្មៅ ដោយបានលួចដំណើរការដោយអត់ច្បាប់រយៈពេលយូរឆ្នាំមកហើយ ទាល់តែកើតមានករណីអគ្គិភ័យឆាបឆេះទើបបែកធ្លាយរឿងអត់ច្បាប់ ។
លោក ប៉ា សំអិត អធិការនគរបាលស្រុកកៀនស្វាយ បានឲ្យដឹងថា ក្រោយទទួលបានដំណឹងពីករណីអគ្គិភ័យភ្លាម រូបលោកក៏បានរាយការណ៍ទៅខេត្ត ហើយលោក អ៊ាវ ចំរើន ស្នងការនគរបាលខេត្ត បានឲ្យរថយន្តពន្លត់អគ្គិភ័យចំនួន៣គ្រឿង រួមជាមួយរថយន្តពន្លត់អគ្គិភ័យស្រុក១គ្រឿងទៀត សរុប៤គ្រឿង ដើម្បីមកជួយអន្តរាគមន៍បាញ់ទឹកពន្លត់អណ្តាតភ្លើងកុំឲ្យឆេះរាលដាលដល់ផ្ទះប្រជាពលរដ្ឋជិតខាង ប៉ុន្តែពេលរថយន្តពន្លត់អគ្គិភ័យមិនទាន់មកដល់ផង ក៏ត្រូវបានកម្មករ រួមជាមួយកងកម្លាំងដាក់ម៉ាស៊ីនបូមទឹកបាញ់ពន្លត់រហូតគ្រប់គ្រងស្ថានការណ៍បានទាំងស្រុង ហើយរថយន្តពន្លត់អគ្គិភ័យក៏បានបត់ត្រឡប់ទៅវិញទាំងមកដល់ពាក់កណ្តាលផ្លូវ ។
លោក ប៉ា សំអិត បញ្ជាក់បន្ថែមថា ការឆេះនេះគឺបណ្តាលមកពីទុស្សេចរន្តអគ្គិសនី ហើយពុំបង្កឲ្យមានមនុស្សគ្រោះថ្នាក់ របួស ឬរាលដាលដល់ផ្ទះអ្នកជិតខាងនោះទេ គ្រាន់តែខូចខាតស៊ីទែនផ្ទុកប្រេងស្លរួច២ និងពុយផ្ទុកប្រេង៣ប៉ុណ្ណោះ ។
ពាក់ព័ន្ធការចម្រាញ់ប្រេងខ្មៅអត់ច្បាប់របស់ឈ្មោះ ច្រិក វ៉ាន់ថន នេះលោក ស៊ុត តូ មេឃុំ បានឆ្លើយយ៉ាងខ្លីថានឹងបិទចាប់ពីថ្ងៃនេះទៅហើយ ។ រីឯលោក សុខ សារ៉ាត់ មន្ត្រីឧស្សាហកម្មស្រុក ក៏បានប្រាប់យ៉ាងខ្លីដែរថា ចំពោះសិប្បកម្មចម្រាញ់ប្រេងខ្មៅនេះ រូបលោកក៏មិនទាន់បានជួបសួរនាំរឿងមានច្បាប់អត់ច្បាប់ដែរ ។ ចំណែកលោក អ៊ួ ឈាង អភិបាលស្រុក ប្រាប់ថា រូបលោកជាប់ប្រជុំនៅទីស្តីការគណៈរដ្ឋមន្ត្រី ។
ប្រជាពលរដ្ឋបានលើកឡើងថា ចំពោះសិប្បកម្មចម្រាញ់ប្រេងខ្មៅនេះបានបង្កការប៉ះពាល់ដល់សុខភាពរបស់ពួកគាត់រយៈពេលយូរឆ្នាំហើយ ដោយសារតែការជះក្លិនស្អុយឈ្ងៀមឈួលពេញភូមិ មិនតែប៉ុណ្ណោះថែមទាំងបង្ហូរទឹកកាកសំណល់ចូលប្រឡាយទឹកប្រើប្រាស់មិនកើតទៀតផង ។
ពលរដ្ឋបញ្ជាក់ថា រឿងប៉ះពាល់នេះពួកគាត់បានប្រាប់ទៅអាជ្ញាធរភូមិ-ឃុំញឹកញាប់ហើយ តែមិនមានដំណោះស្រាយសោះ ស្ងាត់ឈឹងរហូតធ្វើឲ្យពួកគាត់ម្ចាស់សន្លឹកឆ្នោតអស់ជំនឿងទៅលើអាជ្ញាធរភូមិ-ឃុំទៀតផង ៕
ចែករំលែកព័តមាននេះ