សំណុំរឿងគន្លឹះ4នៃឆ្នាំ2017នេះ
អ្នកជំនាញការខាងភូមិសាស្ត្រនយោបាយបារាំងម្នាក់ លោក LIONEL VAIRON ក្នុងបទសម្ភាសន៍មួយនាពេលថ្មីៗនេះ ជាមួយទីភ្នាក់ងារព័ត៌មានចិនស៊ីនហួអះអាងថា លោកដូណាល់ ត្រាំ ភេរវកម្មអន្តរជាតិ
អ្នកជំនាញការខាងភូមិសាស្ត្រនយោបាយបារាំងម្នាក់ លោក LIONEL VAIRON ក្នុងបទសម្ភាសន៍មួយនាពេលថ្មីៗនេះ ជាមួយទីភ្នាក់ងារព័ត៌មានចិនស៊ីនហួអះអាងថា លោកដូណាល់ ត្រាំ ភេរវកម្មអន្តរជាតិ ជម្លោះអីុស្រាអែល-ប៉ាឡេស្ទីន និងសមុទ្រចិនខាងត្បូងជាសំណុំរឿងគន្លឹះ៤នៃឆ្នាំ២០១៧នេះ ។
សម្រាប់លោក LIONEL VAIRON យល់ថា សំណុំរឿងសំខាន់ជាងគេបំផុតគឺការចូលកាន់តំណែងរបស់លោកដូណាល់ ត្រាំ នាថ្ងៃទី២០ មករា ជាមួយរាល់ផលវិបាក ហើយនេះជាសំណុំរឿងអន្តរជាតិ ។ អ្នកជំនាញការរូបនេះនិយាយថា លោកត្រាំ ពេលមិនទាន់ឡើងជាប្រធានាធិបតីនៅឡើយ បានបង្ហាញពីឆន្ទៈផ្លាស់ប្តូររបៀបរបបអន្តរជាតិទាំងឡាយរបៀបសាហាវ និងរ៉ាឌីកាល់ ។ ប្រសិនបើលោកពិតជាធ្វើតាមពាក្យទាំងនេះ នោះសហរដ្ឋអាេមរិកនឹងជាបញ្ហាសំខាន់បំផុតនៃឆ្នាំ២០១៧ ព្រោះប្រទេសនេះនៅតែជាមហាអំណាចទីមួយលើពិភពលោក ហើយនយោបាយការបរទេស និងសេដ្ឋកិច្ចរបស់មហាអំណាចនេះជះឥទ្ធិពលលើរាល់សំណុំរឿងធំៗនៃភពផែនដី ។
សំណុំរឿងធំទី២សម្រាប់ឆ្នាំ២០១៧ គឺអនាគតរបស់ក្រុមរដ្ឋអ៊ិស្លាម ។ តើអង្គការភេរវកម្មនេះនឹងបន្តស្រុតចុះ ឬយ៉ាងណា ហើយប្រសិនបើថយចុះតើមានឥទ្ធិពលបែបណា ពិសេសលើអឺរ៉ុប ព្រោះពួកជីហាដអឺរ៉ុបចាប់ផ្តើមវិលត្រឡប់មកវិញ ហើយចំពោះរុស្ស៊ីក៏ដូច្នេះដែរជាមួយការវិលត្រឡប់របស់ពួកជីហាដឆេតឆេនី ។
សំណុំរឿងទី៣នៃឆ្នាំ២០១៧ គឺជម្លោះអីុស្រាអែល-ប៉ាឡេស្ទីន ព្រោះតែសេចក្តីថ្លែងការណ៍ខ្លាំងៗរបស់លោកត្រាំ ធ្វើឡើងប្រឆាំងលោកអូបាម៉ា ហើយគាំទ្រនាយករដ្ឋមន្ត្រីអីុស្រាអែលលោកនេតាន់ យ៉ាហ៊ូ ។
ចំពោះសមុទ្រចិនខាងត្បូងនឹងជាសំណុំរឿងគន្លឹះទី៤នៃឆ្នាំ២០១៧ ព្រោះវាទាក់ទិននឹងនយោបាយការបរទេសដែលលោកត្រាំ ប្រកាន់យកចំពោះទំនាក់ទំនងជាមួយចិនដែលហាក់ដូចជាស្មុគស្មាញ ។ ដូច្នេះសមុទ្រចិនខាងត្បូងជាសំណុំរឿងស្មុគស្មាញ ពិសេសជាមួយជំហររបស់ហ្វ៊ីលីពីន និងជប៉ុន ។
លោក VAIRON ក៏ឱ្យដឹងដែរថា ទាក់ទិនទំនាក់ទំនងពាណិជ្ជកម្មរវាងសហរដ្ឋអាមេរិក និងចិនវានៅតែមានលទ្ធភាពស្វែងរកដំណោះស្រាយនានា ក៏ប៉ុន្តែទាក់ទិននឹងទំនាក់ទំនងយុទ្ធសាស្ត្រសភាពការណ៍ពិតជាស្មុគស្មាញខ្លាំង និងគ្រោះថ្នាក់ ៕
ចែករំលែកព័តមាននេះ