រាជធានីភ្នំពេញ ៖ ចំណងស្នេហ៍អាពាហ៍ពិពាហ៍រវាងពិធីការិនីដ៏ល្បីឈ្មោះ អ្នកនាងគង់ សុជាតិ ជាមួួយលោកជា វិបុល កាន់តែមានភាពរឹងមាំមួយកម្រិតទៀត បន្ទាប់ពីអ្នកទាំងពីរទទួលបាននូវចំណងដៃកូនស្រីម្នាក់ ដែលបានចាប់កំណើត កាលពីថ្ងៃទី៤ មករា ម្សិលមិញ ។
ទាំងលោកជា វិបុល ក៏ដូចជាក្រុមគ្រួសាររបស់អ្នកនាង គង់ សុជាតិ បានសម្តែងការអបអរសាទរ និងសប្បាយរីករាយជាមួយនឹងការបង្ហោះរូបថតជាច្រើនសន្លឹក តាមបណ្តាញសង្គមហ្វេសបុក ។
ពិធីករលោកជា វិបុល ត្រូវបានគេមើលឃើញបានបង្ហោះរូបជាច្រើនសន្លឹក តាមហ្វេសប៊ុករបស់ខ្លួនបង្ហាញពីសកម្មភាពភរិយាអ្នកនាងគង់ សុជាតិ ទាំងមុនពេលសម្រាល និងក្រោយពេលសម្រាល។ លោកបញ្ជាក់ថា ភរិយារបស់លោកបានធ្វើការសម្រាលកូនស្រីហើយនៅវេលាព្រឹកថ្ងៃទី៤ ធ្នូ ឆ្នាំ២០១៧ ក្នុងនោះក៏បានថ្លែងការអរគុណដល់ក្រុមគ្រូពេទ្យនៅក្នុងមន្ទីរពេទ្យកំពូលពេជ្រ ដែលបានខិតខំធ្វើកិច្ចការងារប្រកបដោយជោគជ័យ ។
កូនស្រីរបស់អ្នកនាងគង់ សុជាតិ មានឈ្មោះថា ដូរី (Dory) បានសម្រាលមកដោយជោគជ័យ និងមានសុខភាពល្អទាំងកូន និងម្តាយ។ បន្ទាប់ពីសម្រាលបានកូនស្រីម្នាក់ជាចំណងដៃនេះរួចមក ទាំងក្រុមគ្រួសារ មិត្តភក្កិ និងប្រិយមិត្តគាំទ្រជាច្រើននាក់បាននាំគ្នាផ្ញើសារសម្តែងការអបអរសាទរយ៉ាងច្រើនកុះករទៅកាន់ភរិយាស្វាមីមួយគូនេះ ។
ចំណងដៃកូនស្រីដ៏ស្រស់សោភានាពេលនេះត្រូវបានគេគិតថា ចំណងស្នេហ៍រវាងលោកជា វិបុល និងអ្នកនាង គង់ សុជាតិ កាន់តែផ្អែមល្ហែម និងបន្ថែមភាពរឹងមាំថែមមួយកម្រិតទៀតរវាងអ្នកទាំងពីរ។
ជាការកត់សម្គាល់ មុនពេលសម្រាលកូនស្រីនាពេលនេះអ្នកនាងគង់ សុជាតិ ហាក់មិនបានចំណាយពេលច្រើន ដើម្បីឈប់សម្រាកពីការងារឡើយ ពោលរូបនាងនៅតែបន្តការងាររបស់ខ្លួនទាំងពពោះ និងឆ្លៀតពេលចូលរួមកម្មវិធីផ្សេងរបស់អ្នកសិល្បះដូចគ្នាផងដែរ។លោកជា វិបុល និងពិធីការិនីមេម៉ាយអ្នកនាងគង់ សុជាតិ បានសម្រេចចូលរោងការជាមួយគ្នា កាលពីថ្ងៃទី៩ វិច្ឆិកា ២០១៣។
បើទោះបីជាស្នេហាមួយនេះហាក់ខុសវ័យគ្នា និងក្នុងនាមជាស្ត្រីមេម៉ាយលែងប្តីក៏ដោយ ប៉ុន្តែក្នុងពិធីមង្គលនាពេលនោះនៅចំពោះមុខភ្ញៀវកិត្តិយសច្រើនកុះករ គូអាពាហ៍ពិពាហ៍នេះបានសច្ចានឹងមើលថែគ្នា និងរួមសុខទុក្ខមិនបោះបង់គ្នាឡើយ ទោះជាក្នុងកាលៈទេសៈណាក៏ដោយ ។
លោកជា វិបុល ថ្លែងវាចាមនោសញ្ចេតនាថា «ខ្ញុំសន្យាមើលថែភរិយារបស់ខ្ញុំឱ្យអស់ពីចិត្ត អស់ពីបេះដូង ។ ទោះជាក្នុងកាលៈទេសៈណាក៏ដោយ ខ្ញុំនៅរួមសួខទុក្ខជាមួយគ្នាមិនដោះដៃឡើយ ។ចំណែកអ្នកនាងគង់ សុជាតិ ដែលមានសំណាងបានរៀបការទាំងមានកូន២នាក់ទៅហើយនោះថ្លែងថា «នាងខ្ញុំមានថ្ងៃនេះដោយសារតែការចំណាយពេលមើលចិត្តគ្នាយូរដែរ ។
ពេលនេះ អ្វីៗបានឆ្លងដល់ភាពល្អអស់ហើយ ព្រោះទឹកចិត្តស្វាមីរបស់នាងខ្ញុំបែបណា នាងខ្ញុំពិតជាអាចទទួលយកបាន បូករួមទាំងឧបនិស្ស័យក៏មានភាពត្រូវគ្នាច្រើន ។
ចែករំលែកព័តមាននេះ