រាជធានីភ្នំពេញ ៖ គិតត្រឹមដំណាច់ឆ្នាំ២០១៦នេះ ការនាំចេញអង្កររបស់កម្ពុជាទៅកាន់ទីផ្សារអន្តរជាតិ មានចំនួន៥៤ម៉ឺនតោន កើនឡើងត្រឹម០,៧%ប៉ុណ្ណោះ បើធៀបនឹងរយៈពេលដូចគ្នាកាលពីឆ្នាំ២០១៥ ។
រាជធានីភ្នំពេញ ៖ គិតត្រឹមដំណាច់ឆ្នាំ២០១៦នេះ ការនាំចេញអង្កររបស់កម្ពុជាទៅកាន់ទីផ្សារអន្តរជាតិ មានចំនួន៥៤ម៉ឺនតោន កើនឡើងត្រឹម០,៧%ប៉ុណ្ណោះ បើធៀបនឹងរយៈពេលដូចគ្នាកាលពីឆ្នាំ២០១៥ ។
លោក ហ៊ាន វណ្ណហន ប្រធានលេខាធិការដ្ឋានច្រកចេញចូលតែមួយសម្រាប់បំពេញបែបបទនាំចេញអង្ករ បានថ្លែងនាព្រឹកថ្ងៃទី៤ មករា ម្សិលមិញថា គិតតែក្នុងខែធ្នូ ឆ្នាំ២០១៦កន្លងមក គឺថយចុះ៣០% និងធៀបកាលពីខែធ្នូឆ្នាំមុន ។ ការថយចុះនេះបានធ្វើឲ្យបរិមាណអង្ករនាំចេញមានកំណើនតិចតួចប៉ុណ្ណោះ បើគិតរយៈពេលពេញមួយឆ្នាំ២០១៦ កន្លងមក ។
លោកបន្តថា ៖ « ក្នុងស្ថានភាពនេះគួរតែមានយន្តការរួបរួមគ្នាមួយដែលមានប្រសិទ្ធភាព ដើម្បីជំរុញការនាំចេញនៅឆ្នាំក្រោយឱ្យមានភាពល្អប្រសើរ ហើយការងារនេះសំខាន់ ត្រូវតែកែសម្រួលសកម្មភាពនៃការគាំទ្រគោលនយោបាយនាំចេញអង្ករឡើងវិញ។ ឥឡូវនេះ កម្ពុជាមិនទាន់បានបញ្ចប់ការកែសម្រួលគោលនយោបាយដែលបានអនុម័តកាលពីឆ្នាំ២០១០ នៅឡើយទេ » ។
លោក ហ៊ាន វណ្ណហន បន្ថែមថា ទោះជាយ៉ាងណា គ្រប់គ្នាសង្ឃឹមថា កិច្ចខិតខំប្រឹងប្រែងរបស់រាជរដ្ឋាភិបាលក្នុងការកែសម្រួលគោលនយោបាយខាងលើនេះ នឹងឈានដល់ភាពជោគជ័យជាមិនខាន ។
លោក សុង សារ៉ន អគ្គនាយកក្រុមហ៊ុន Amru Rice Cambodia ថ្លែងថា រយៈពេលពេញមួយឆ្នាំ២០១៦ កម្ពុជាជួបនឹងភាពរាំងស្ងួត ដែលធ្វើឲ្យការនាំចេញមានការខកខានរយៈពេលពីរទៅបីខែ ។ ប្រសិនជាមិនមានបញ្ហានេះ ការនាំចេញអាចមានចំនួនលើសពីតួលេខដែលបានបង្ហាញខាងលើ ។ ចំណុចមួយទៀត តម្លៃស្រូវមានតម្លៃថោក ដូចនេះ តួលេខនាំចេញគិតជាថវិកាតិច មិនដូចកាលពីឆ្នាំ២០១៥ទេ ។ លោកថា ៖ « គោលនយោបាយនាំចេញអង្ករ ត្រូវតែធ្វើការកែសម្រួលច្រើន សំខាន់កុំមានតែទ្រឹស្តី ប៉ុន្តែត្រូវមានស្ថាប័នណាមួយជាអ្នកអនុវត្តផ្ទាល់ឲ្យពិតប្រាកដ និងជាប្រចាំ ទើបអាចដោះស្រាយបាននៅឆ្នាំក្រោយ » ។
លោកបន្ថែមថា ការដែលរាជរដ្ឋាភិបាលចាប់អារម្មណ៍ធ្វើឃ្លាំងស្តុកទុកអង្ករនេះ គឺជារឿងត្រឹមត្រូវហើយ ព្រោះវាជាអាទិភាពទី១ និងទី២ បើសិនជារដ្ឋធ្វើកន្លែងទុកដាក់ស្រូវឲ្យសហគមន៍កសិករបាន វានឹងជួយធ្វើឲ្យតម្លៃស្រូវប្រសើរឡើងវិញផងដែរ ។
បញ្ហាដែលនាំឲ្យកម្ពុជាពិបាកនាំចេញ និងប្រកួតប្រជែងជាមួយប្រទេសក្នុងតំបន់ គឺអង្កររបស់កម្ពុជាមានតម្លៃថ្លៃ បើធៀបជាមួយប្រទេសវៀតណាម និងថៃ ព្រមទាំងបញ្ហាពូជ។
រដ្ឋាភិបាលចិនបានអនុញ្ញាតឲ្យកម្ពុជានាំចេញអង្ករទៅកាន់ប្រទេសចិនចំនួន២០ម៉ឺនតោននៅឆ្នាំនេះ បន្ទាប់ពីដំណើរទស្សនកិច្ចរបស់ប្រធានាធិបតីចិន លោក ស៊ី ជីនពីង នៅកម្ពុជា កាលពីខែតុលា កន្លងមក ។
លោកឧកញ៉ា ភួ ពុយ ប្រធានសម្ព័ន្ធសមាគមរោងម៉ាស៊ីនកិនស្រូវកម្ពុជា ថ្លែងថា ឆ្នាំ២០១៦កន្លងមក ក្រុមហ៊ុនលោកសម្រេចការនាំចេញអង្ករបានជាង៥ម៉ឺនតោនទៅកាន់ទីផ្សារអឺរ៉ុប ម៉ាឡេស៊ី និងចិន ។ លោករំពឹងថា ការនាំចេញឆ្នាំនេះនឹងមានកំណើនខ្ពស់ ប្រសិនជាមានការកែទម្រង់មួយចំនួនពាក់ព័ន្ធនឹងបញ្ហាបច្ចេកទេស ដើម្បីជំរុញធ្វើយ៉ាងណាឲ្យកសិករបានផលខ្ពស់ កាត់បន្ថយការចំណាយ ធ្វើឲ្យទិន្នផលកើនឡើង នឹងធ្វើឲ្យការនាំចេញ និងជីវភាពកសិករកាន់តែប្រសើរឡើង ។ លោកបន្តថា ៖ « បញ្ហាតម្លៃកសិផល វាអាស្រ័យលើទីផ្សារពិភពលោក ប្រសិនជាមានការប្រកួតប្រជែងគ្នាខ្លាំង គឺអាចធ្វើឲ្យតម្លៃធ្លាក់ចុះ ប៉ុន្តែបើមានតម្រូវការច្រើន តម្លៃកសិផលនឹងកើនឡើង » ៕
ចែករំលែកព័តមាននេះ