កីឡា​​គុន​ដា​វ​​​​កម្ពុជា​​​បង្ហាញ​​​​ពី​សកម្ម​ភាព​​​​ប្រចាំ​ឆ្នាំ​​​​​​​ក្រោយ​​ទទួល​ភ្លើងខៀវ​ពី​​ក្រសួង​អប់​រំ​​


រាជ​ធានីភ្នំ​ពេញ​ ៖ ​​ខណៈពេល​​​​ដែល​នៅ​តាម​​​​សហ​ព័ន្ធ​​​​កីឡា​ផ្សេង​ៗ​​​​មាន​ការ​រីក​ចម្រើន​​​​​ និង​​​មាន​កម្មវិធី​​​​ ឬ​ព្រឹតិ្ត​ការណ៍​​ប្រ​កួត​នានា​​​​មិន​សូវ​​​​​អាក់​​ខាន​​​​ មហា​ជន​​​​​​ចាប់​អារម្មណ៍​​​​​ថា ​កីឡា​​​​​​ផ្នែក​គុន​​​​ដាវ​របស់​កម្ពុជា​​​​​ហាក់​មិន​​​​សូវ​លេច​​​​មុខ​មាត់​​​​​បង្ហាញ​ស​កម្មភាព​​​​​​ប្រកួត​ក្នុង​ស្រុក​ណា​​មួយ​ទាល់​តែ​សោះ​​​ ។ ប្រការ​​នេះ​​ស្ទើរ​តែ​​ធ្វើ​ឱ្យបង​ប្អូន​​​​ក៏​ដូច​ជា​​​យុវ​ជន​​​​មួយ​ចំនួន​​មិនដឹង​ថា នៅ​កម្ពុជា​​​មាន​វិញ្ញា​សា​​ផ្នែក​គុន​ដាវ​​​​ឡើយ បើ​ទោះ​​​ជា​មាន​អ្នក​​​​ខ្លះ​នៅ​ស្រពេច​ស្រពឹល​​នៅ​ឡើយ​​ក្តី​ ។​​ ជុំ​វិញ​​មូល​ហេតុ​​​ខាង​លើ​​ត្រូវ​​​​បាន​មន្ត្រី​​​​​ដែល​ទទួល​​​​កាន់​ការ​ងារ​​​​ផ្នែក​កីឡា​​​​នេះ​​​ទទួល​ស្គាល់​​​ពី​កត្តា​​​ដែល​គុន​ដាវ​កម្ពុជា​​​​ស្ងាត់​សកម្មភាព​​​​ ប៉ុន្តែ​​​​សម្រាប់​ឆ្នាំ ​២០១៣​​នេះ​តទៅ​​​​កីឡា​គុន​ដាវ​​​​​កម្ពុជា​នឹង​​​​​បង្ហាញ​​​​សកម្មភាព​វិញ​​​​ជា​ថ្មី​ម្តង​ទៀត​​​​ បន្ទាប់​ពីថ្នាក់​​​​លើ​បាន​​​​ឯក​ភាព​​​​ឱ្យបង្កើត​​​​​កម្មវិធី​​​​ប្រកួត​​ប្រចាំ​​​ឆ្នាំ​ជា​ផ្លូវ​ការ​​​​ឡើង​វិញ​ដូច​​​វិញ្ញា​សា​​​​ផ្សេង​ៗ​​​ដែរ​ ។​​​

​លោក​សុខ អាង​​ ​អគ្គ​លេខា​ធិការ​​​​រង​​កីឡា​គុន​ដាវ​កម្ពុជា​បានថ្លែងប្រាប់កោះស​ន្តិភាព​​ថា កីឡា​គុន​ដាវកម្ពុជាបានអាក់​ខានបង្ហាញ​សកម្មភាព​ប្រកួត​របស់​ខ្លួនយ៉ាង​​ស្ងៀម​ស្ងាត់​​​​តាំង​ពីអំឡុង​ឆ្នាំ​២០០៦​​ម៉្លេះ ។ ការ​​ដែលយើងទាំងអស់​គ្នានៅ​ឆ្ងា​យ​ពីបងប្អូន​ដែលនិយម​គាំ​ទ្រ​កីឡា​គុន​ដាវ​នេះ​ដោយ​សារតែ​​ក្រសួង​អប់​​រំ យុវជន និ​ង​កីឡា​មិន​ទាន់​ទទួល​ស្គាល់​ឲ្យបានពេញលេញ​ដូច​គេ​ ហើយ​កីឡា​គុនដាវបាន​​ទទួលដឹងឮត្រឹម​តែខាង​គណៈ​កម្មការ​កីឡា​អូឡាំ​ពិក​កម្ពុជាប៉ុណ្ណោះ។ ធាតុ​ពិត យើង​តែងតែបង្ហាញពី​គម្រោងជា​ហូរ​ហែ​សម្រាប់​បង្ហាញខាង​ក្រសួងដើម្បី​សុំសិទ្ធិ​​ប្រកួត​ប្រចាំឆ្នាំដូចវិញ្ញា​សាដទៃដែរ។ លោក​អគ្គ​លេខា​ធិការរង​កីឡា​គុនដាវ​​កម្ពុជា​​បានបន្ត​​ទៀត​ថា ទោះ​ជាខាងគុនដាវយើង​ដែលមាន​សមា​ជិក​និង​គ្រូបង្វឹកព្រមទាំង​សិស្សគុនមិនមាន​សកម្មភាព​ក្នុង​ស្រុក​ក៏​យើងតែងតែ​ប្រមូល​គ្នាមកហាត់​រៀន​រកតិចនិក​ជាប្រចាំ ពោល​​​គឺ​មិនអស់​សង្ឃឹម​ឡើយ ដើម្បីការពារ​វិស័យ​កីឡាគុនដាវ​ឲ្យស្ថិត​ស្ថេរ​គង់វង្ស ម្យ៉ាងខ្លាចក្មេងៗ​ខ្លះមិន​ស្គាល់ និង​មិន​ដឹងថា​នៅកម្ពុជាមាន​កីឡាគុន​ដាវ ព្រោះមាន​ទស្សនៈ​​ខ្លះ​យល់ថានៅថ្ងៃណា​មួយគុន​ដាវ​ពិត​ជា​អាច​ដើរ​ទាន់វិញ្ញាសា​ផ្សេងៗ​ដូច​គេដូច​ឯងឲ្យ​តែ​ព្យាយាម​ច្បាស់ជាសម្រេច​មិនខាន។

លោក​​សុខ អាង​ អះអាងទៀតថា ​ថ្វី​ដ្បិ​ត​ខាង​​គុន​​ដាវអត់មានសកម្មភាព​ប្រកួត​ក្នុង​ស្រុក​មែន​តែចំពោះ​ការ​បង្ហាញ​ខ្លួន​នៅ​ក្រៅ​ប្រទេស​យើង​បានបញ្ជូន​កីឡា​ករ​ចូលរួមប្រកួត​ញឹក​ញាប់​ណាស់​មិនដែលដាច់​ទេ ពោល​គឺ​​យើងបែរ​ជា​បង្ហាញ​ខ្លួ​នតែនៅក្រៅ​ប្រទេស​ទៅវិញ ​អីុចឹង​ហើយ​បានជាមហាជនមិន​សូវដឹង​មក​ពី​ស្ងាត់ៗ​យើងប្រកួតដល់​ក្រៅប្រទេសដោយមិនបានផ្សព្វ​ផ្សាយ​ឲ្យ​ទូលំ​ទូលាយមុន។ ដោយសារ​តែការ​ខិតខំ យើង​ចេះតែបន្តស្នើសុំដល់​ក្រសួង​អប់រំ ដើម្បី​អនុញ្ញាត​បានប្រកួតរ​កជើង​ឯក​ប្រចាំ​ឆ្នាំ​ជា​បន្ត​បន្ទាប់​មិនដាច់ឡើយ និងទំនងមកពី​ខាង​កីឡា​គុន​​ដាវ​ឧស្សាហ៍ចេញ​ទៅប្រកួត​ក្រៅស្រុក​ញឹក​ពេក និងមានការទទួល​ស្គាល់ពី​ការដឹក​នាំទើប​នៅឆ្នាំ២០១៣នេះ ខាងគុនដាវបាន​ស្នើសុំ​គម្រោង​ជាថ្មីម្តងទៀតឃើញថា ខាងក្រសួង​បាន​ឲ្យ​សញ្ញាភ្លើងខៀវ​ដោយយើងទទួលបាន​គោល​ការណ៍​មួយចំនួនហើយ​សម្រាប់ការ​ប្រកួត​ជើង​ឯក​នៅឆ្នាំថ្មីនេះ។

លោក​បានបន្ថែមថា តាមរយៈការឲ្យ​តម្រុយ​សម្រាប់ឆ្នាំ២០១៣នេះ ​​រូប​លោក​ដែល​ជា​អ្នក​ដឹក​នាំ​មួយ​រូប និងក្រុមការងារ​ទាំងអស់​ ​បាន​សម្រេច​គិតគ្នាថា​នឹងរៀបចំ​ការ​ប្រកួត​គុន​ដាវ​ជា​បន្តបន្ទាប់តាម​ជំហានៗដែលបាន​គ្រោងទុក ក្នុង​នោះ​យើង​បានគ្រោងរៀបចំ​កម្មវិធី​ប្រកួត​កីឡា​គុន​ដាវ ដើម្បីអបអរសា​ទរទិវា​ខួប​១០០​ឆ្នាំ​របស់​គុនដាវដែល​​គ្រោងដំណើរ​ការ​ចាប់​ពី​ចន្លោះ​ខែកុម្ភៈ ដល់​ខែ​មីនា ​ឆ្នាំ​២០១៣​នេះ។ ក្រៅពីនោះ យើងមានគម្រោង​ប្រកួត​ជើង​ឯក​ថ្នាក់ជាតិនៅខែកក្កដា​ខាងមុខ​ព្រមទាំងមាន​គម្រោង​មួយ​ទៀតគឺនៅចុងឆ្នាំ២០១៣​យើង​ក៏​គ្រោង​រៀបចំប្រកួតជា​លក្ខណៈ​​ពាន​រង្វាន់​ដោយ​សម្រេចដាក់​ឈ្មោះ​​​​​ម្ចាស់​ជំនួយ​តែ​នៅ​មិន​ទាន់​ច្បាស់​ឡើយ​រង់ចាំ​ពិភាក្សា​សិន។

ទោះយ៉ាងណាលោករំពឹងថា កីឡាគុន​ដាវ​របស់​​កម្ពុជាចាប់​ពីឆ្នាំ២០១៣នេះតទៅ​​នឹង​មាន​វត្តមានឡើងវិញ និង​អាចទទួលការចាប់​អារម្មណ៍ពី​គ្រប់​មជ្ឈដ្ឋាន ហើយប្អូនៗដែលមិន ដែល​ឃើញគុនដាវលេង​បែប​ណាអាច​មក​ទស្សនា​នាពេលខាង​មុខដើម្បីលើក​ទឹកចិត្ត​ដល់​កីឡាករក៏​ដូចជាផ្នែកគុន​ដាវទាំងមូល​​ឱ្យ​​មាន​កម្លាំង​ចិត្តនិងខិតខំរិះ​រកកម្មវិធីថ្មីៗ​បន្ថែមទៀត សម្រាប់ដាក់ជា​ការប្រកួតឲ្យបានជាហូរហែ​ ។ យើង​រង់ចាំមើលថាតើកីឡាគុន​ដាវកម្ពុជា​ដែល ទើបតែងើបឡើងវិញនេះនឹងមានភាពទាក់ទាញ​អារម្មណ៍​បែបណា​​ចំពោះ​ប្រជាជន​​កម្ពុជា៕

កីឡាជាតិ

អត្រាប្តូរប្រាក់

អត្រាប្តូរប្រាក់ផ្សេងទៀត

Live

Sponsored News

To Top

ការស្ទង់មតិគេហទំព័រថ្មី




សូម​អរគុណ