រាជធានីភ្នំពេញ ៖ ទឹកប្រាក់ឧបត្ថម្ភរបស់សប្បុរសជនតាមរយៈកោះសន្តិភាពត្រូវបានប្រគល់ជូនដល់លោកយាយវ័យ ហេង អាយុ៨២ឆ្នាំ រស់នៅភូមិព្រែកពោធិ៍លើ ឃុំព្រែកពោធិ៍ ស្រុកស្រីសន្ធរ ខេត្តកំពង់ចាម ខណៈដែលលោកយាយស្វែងរកការជួយឧបត្ថម្ភជីវភាពរបស់គាត់បន្តនៅការិយាល័យកោះសន្តិភាពនារសៀលថ្ងៃទី១០ កញ្ញា ពិសេសគឺការចិញ្ចឹមដល់ចៅកំព្រាទាំង៣របស់គាត់ដែលឪពុកម្តាយបានស្លាប់ចោលដោយជំងឺអេដស៍ ។
ថវិកានេះកោះសន្តិភាពទទួលបានពីបុគ្គលិកធនាគារ ABA សាខាបុរីកីឡាចំនួន១១ម៉ឺនរៀល និងអតិថិជនធនាគារ ABA លោកស្រី ហុក សុវណ្ណី ចំនួន៥ដុល្លារ ។ ក្នុងស្បែកជ្រីវជ្រួញបង្កប់ដោយទឹកមុខរំភើបរីករាយ លោកយាយបានជូនពរជ័យដល់សប្បុរជនទាំងអស់ដែលបានផ្តល់ប្រាក់អំណោយដល់រូបលោកយាយ សូមឱ្យជួបតែពុទ្ធពរទាំង៤ប្រការ គឺអាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ ។
កោះសន្តិភាពក៏សូមថ្លែងនូវអំណរគុណចំពោះសប្បុរសជន ដែលជានិច្ចកាលតែងតែផ្តល់ជំនឿមកលើកោះសន្តិភាពក្នុងការជួយទៅដល់បងប្អូនជនរួមជាតិដែលមានជីវិតក្រីក្រលំបាកទុរគតអត់ឃ្លាន ។ សូមឱ្យអំពើល្អទាំងនេះជួយដល់ក្រុមគ្រួសារលោកអ្នកឱ្យជួបតែសេចក្តីសុខ និងសុខភាពល្អ ៕
ចែករំលែកព័តមាននេះ