ខេត្តកណ្ដាល ៖ ប្រតិបត្តិការបង្ក្រាបគ្រឿងញៀន កាលពីថ្ងៃទី០៣ មករា របស់កម្លាំងនគរបាលដោយបង្ក្រាបមុខសញ្ញាចែកចាយ និងប្រើប្រាស់គ្រឿងញៀនចំនួន៣ទីតាំង ស្ថិតនៅស្រុកផ្សេងគ្នា ដោយឃាត់ខ្លួនជនសង្ស័យសរុប១២នាក់ និងចាប់បានវត្ថុតាងមួយចំនួន ក្នុងនោះមានមួយករណីលាក់គ្រឿងញៀនក្នុងរន្ធគូទទៀតផង ។
វត្ថុតាងដកហូតបានមានម្សៅក្រាមពណ៌.ស សង្ស័យថា ជាសារធាតុញៀន (ម៉ាទឹកកក)១៣កញ្ចប់ ១កញ្ចប់ធំ និង១២កញ្ចប់តូច ទូរស័ព្ទចំនួន១គ្រឿង ម៉ាកNokia ជញ្ជីង ថ្លឹងគ្រឿងញៀន១ និងឧបករណ៍វេចខ្ចប់មួយចំនួនទៀត។
អ្វីដែលកត់សម្គាល់ គឺមានជនសង្ស័យម្នាក់ ដែលត្រូវនគរបាលស្រុកល្វាឯម បង្ក្រាបបាននៅចំណុចកំពង់ដកោះរះ ក្នុងភូមិកោះរះលើ ឃុំកោះរះ ស្រុកល្វាឯម ខេត្តកណ្តាល បានឆែករកឃើញថ្នាំញៀនមួយកញ្ចប់លាក់ទុកក្នុងរន្ធគូទទៀត ។ ជនសង្ស័យរូបនេះ ឈ្មោះឌី សុភ័ក្ត្រ អាយុ៣០ឆ្នាំ មានទីលំនៅក្នុងភូមិចិន ឃុំបាក់ដាវ ស្រុកខ្សាច់កណ្តាល ខេត្តកណ្តាល ។
ចែករំលែកព័តមាននេះ