រាជធានីភ្នំពេញ ៖ ជារៀងរាល់ឆ្នាំ ក្រុម ហ៊ុនលីហួរគ្រុប តែងតែរៀបចំពិធីបូកសរុបការងារប្រចាំឆ្នាំ និងជួបជុំបុគ្គលិករបស់ខ្លួន ហើយឆ្នាំនេះ ក៏មិនខុសពីឆ្នាំមុនៗដែរ ក្រុមហ៊ុនបានរៀបចំពិធីបូកសរុបការងារប្រចាំឆ្នាំរបស់ក្រុមហ៊ុនដែលជាបុត្រសម្ព័ន្ធនៃក្រុម ហ៊ុនលីហួរគ្រុប និងដាក់ផែនការថ្មីសម្រាប់ក្រុមហ៊ុនក្រោមបុត្រសម្ព័ន្ធទាំងនោះ ។
ពិធីនេះធ្វើឡើងកាលពីថ្ងៃទី ៣១ ធ្នូ ២០១៦ នៅសាលរបស់ក្រុមហ៊ុនលីហួរ ផ្លូវជាសុផារ៉ា ដោយមានការចូលរួមពីលោកឧកញ៉ា លី ហួរ អគ្គនាយកក្រុមហ៊ុនលីហួរគ្រុប និងថ្នាក់ ដឹកនាំក្រុមហ៊ុនបុត្រសម្ព័ន្ធទាំងអស់ផងដែរ ។
នៅក្នុងពិធីបូកសរុបនោះ អគ្គនាយកគ្រប់គ្រងក្រុមហ៊ុននីមួយៗ ដូចជាបុរីវិមានភ្នំពេញថ្មី អគារលីហួរប្តូរប្រាក់ ក្រុមហ៊ុនលីហួរវេរលុយ មីក្រូហិរញ្ញវត្ថុលីហួរ ភីអិលស៊ី និងលីហួរគ្រឿងអលង្ការជាដើម បានធ្វើរបាយការណ៍ជូនអគ្គនាយក ក៏ដូចជាអ្នកចូលរួមទាំងអស់បានជ្រាប ដោយក្រុមហ៊ុនខ្លះបានជម្រាបពីកំណើនខ្ពស់នៅក្នុងឆ្នាំ២០១៦ និងក្រុមហ៊ុនខ្លះទៀតមានកំណើនដែរ តែមានកំណើនតិចតួច តែយ៉ាងណាការបូកសរុបបានបញ្ជាក់ថាឆ្នាំនេះលទ្ធផលមានភាពល្អប្រសើរ ។
លោកឧកញ៉ា លី ហួរ អគ្គនាយកក្រុមហ៊ុនលីហួរ គ្រុប បានមានប្រសាសន៍ថា ពិធីបូកសរុបរបស់ក្រុមហ៊ុនលីហួរគ្រុប បានធ្វើឡើងជារៀងរាល់ឆ្នាំ និងដើម្បីជួបជុំបុគ្គលិក និងថ្នាក់ដឹកនាំតាមបណ្ដាក្រុមហ៊ុននានា ដែលជាបុត្រសម្ព័ន្ធរបស់លីហួរគ្រុប ។ តែសម្រាប់ឆ្នាំនេះ ក្រុមហ៊ុនបានរៀបចំពិធីធំជាងឆ្នាំមុនៗ ដោយមានផ្តល់រង្វាន់លើកទឹកចិត្តបុគ្គលិកឆ្នើមរបស់ក្រុមហ៊ុនដូចជារថយន្តចំនួន៥គ្រឿង និងម៉ូតូជាច្រើនគ្រឿងទៀតផងដែរ ។
លោកឧកញ៉ាបន្តថា សម្រាប់លទ្ធផលសរុបប្រចាំឆ្នាំ២០១៦របស់ក្រុមហ៊ុនបុត្រសម្ព័ន្ធទាំងអស់ យើងមានការពេញចិត្តខ្លាំង ដែលបានរីកធំធាត់គ្រប់កន្លែង ។ ចំពោះបុគ្គលិកដែលក្រុមហ៊ុនលីហួរមានវិញ បើធៀបនឹងឆ្នាំ២០១៥មានការកើនឡើងច្រើន ហើយបើរាប់ទាំងកម្មកររបស់ក្រុមហ៊ុនលីហួរគ្រុបទៀតនោះ មានច្រើនណាស់ អាចថារាប់ពាន់នាក់ឯណោះ ដូចជាកម្មករសំណង់នៅក្នុងបុរីវិមានភ្នំពេញ និងកម្មករនៅតាមក្រុមហ៊ុនផ្សេងៗទៀត ។ បើសរុបទាំងកម្មករ និងបុគ្គលិកដែលកំពុងបម្រើការនៅក្នុងក្រុមហ៊ុនលីហួរទាំងអស់មានប្រមាណជាង ៣.០០០នាក់ ដែលសុទ្ធតែជាកម្មករនិយោជិតខ្មែរទាំងអស់ ដោយមិនមាននាំកម្មករបរទេសមកនោះទេ ។
លោកបន្ថែមថា សម្រាប់ឆ្នាំបន្ទាប់ទៀតនេះ ក្រុមហ៊ុនក៏បានរៀបចំផែនការមួយចំនួនសម្រាប់ពង្រីកទីផ្សាររបស់ក្រុមហ៊ុននីមួយៗ ហើយការប្រកួតប្រជែងនៅក្នុងទីផ្សាររបស់ក្រុមហ៊ុននីមួយៗក៏កាន់តែមានច្រើន ។ ដូចនេះហើយតម្រូវឱ្យយើងត្រូវមានយុទ្ធសាស្ត្រច្បាស់លាស់ និងត្រឹមត្រូវ ដើម្បីប្រកួតប្រជែងប្រកបដោយតម្លាភាពជាមួយក្រុមហ៊ុនផ្សេងៗទៀតនៅក្នុងប្រទេស និងក្នុងតំបន់ ។
លោកឧកញ៉ាបញ្ជាក់ថា ដោយសារតែឆ្នាំនេះទទួលបានលទ្ធផលគួរជាទីពេញចិត្តខ្លាំងនោះ ទើបកម្មវិធីជប់លៀងនិងជួបជុំបុគ្គលិកក៏ត្រូវធ្វើឱ្យធំ បើគិតជាទឹកប្រាក់ដែលក្រុមហ៊ុនបានត្រៀមរៀបចំជួបជុំបុគ្គលិកបូកជាមួយរង្វាន់លើកទឹកចិត្តដល់បុគ្គលិកឆ្នើម អស់ប្រមាណជាង៤០ម៉ឺនដុល្លារអាមេរិក ហើយបុគ្គលិកឆ្នើមរបស់យើងទៀតសោត ក៏មិនសំដៅដល់បុគ្គលិកជាន់ខ្ពស់ដែរ ។
ឆ្នាំនេះ យើងផ្ដោតលើបុគ្គលិកថ្នាក់ក្រោម ព្រោះយើងគិតថាបុគ្គលិកជាន់ក្រោមមានសារសំខាន់ណាស់សម្រាប់ពង្រីកវិសាលភាពក្រុមហ៊ុនរបស់យើង ៕
ចែករំលែកព័តមាននេះ