រាជធានីភ្នំពេញ ៖ កម្មវិធីប្រឡងចម្រៀងលំដាប់ពិភពលោក Cambodian Idol រដូវកាលទី៣ បានធ្វើឲ្យបេក្ខនារីមួយរូបអាចស្វែងរកឃើញម្តាយរបស់ខ្លួនដែលបានបែកគ្នាអស់រយៈពេលជាច្រើនឆ្នាំមកហើយ ក្នុងពេលដែលដំណឹងនេះ បានក្លាយជាការចាប់អារម្មណ៍ និងភ្ញាក់ផ្អើល ជាមួយនឹងក្តីរំភើបសម្រាប់បេក្ខនារីដែលបានចូលរួមប្រកួតរូបនេះផងដែរ។
ស្រីស្រស់ សំ សារ័ត្ន ជាបេក្ខនារីមួយរូប ក្នុងចំណោមបេក្ខជនមួយចំនួនទៀត ដែលអាចឈានដល់វគ្គហ្គ្រីនម៉ាយ ដែលវគ្គមួយនេះបានធ្វើឲ្យនាងអាចស្វែងរកឃើញម្តាយបង្កើតរបស់ខ្លួនដែលបានបែកគ្នាអស់រយៈពេលជាង២០ឆ្នាំ ក្នុងពេលដែលនាងប្រកាសពីការស្វែងរកម្តាយរបស់ខ្លួនតាមរយៈកម្មវិធីខាងលើនេះ។
សំ សារ័ត្ន បានសម្តែងក្តីរំភើបលាយឡំជាមួយនឹងទឹកភ្នែក ក្នុងពេលដែលក្តីស្រមៃរបស់ខ្លួនក្នុងការស្វែងរកម្តាយបង្កើតរបស់នាងបានដូចបំណង បើទោះបីជានាងមិនអាចទៅកាន់វគ្គបន្ទាប់ នៃកម្មវិធីប្រឡងចម្រៀងលំដាប់ពិភពលោកខាងលើនេះក៏ដោយ។
តារាចម្រៀងនាង សំ សារ័ត្ន បានរៀបរាប់ដំណើរដើមទងប្រាប់កោះសន្តិភាពតាមសារអេឡិចត្រូនិចថា កាលពីពេលនាងបានចាប់កំណើតមានអាយុប្រមាណ៣ឆ្នាំ ឪពុកម្តាយរបស់នាងក៏បានចែកផ្លូវគ្នា ហើយឪពុករបស់នាងក៏បានចាកចេញពីខេត្តសៀមរាប មករស់នៅខេត្តកំពង់ឆ្នាំងវិញ។
នាងបញ្ជាក់ថា ក្នុងពេលនោះ ដោយសារឃើញនាងមានអាយុតិច និងជាកូនពៅគេផងនោះ ជីដូនរបស់នាងក៏បាននាំនាងអោយមកនៅជាមួយគាត់នៅឯខេត្តកំពង់ឆ្នាំងដែរ។ នៅពេលនាងរស់នៅខេត្តកំពង់ឆ្នាំង បានអាយុប្រមាណជា១០ឆ្នាំ ជីដូនរបស់នាងក៏បានប្រាប់ឲ្យនាងទៅស្វែងរកម្តាយនៅឯខេត្តសៀមរាប ប៉ុន្តែពេលដែលនាងបានទៅទីនោះ ទីកន្លែងដែលម្តាយនាងធ្លាប់រស់នៅ គឺគេលែងឲ្យនៅទៀតហើយ ហេតុនេះនាងមិនដឹងអាចស្វែងរកម្តាយនៅទីណា ខណៈពេលឪពុក និងជីដូនរបស់នាងក៏មិនដឹងថា ម្តាយនាងស្លា.ប់ឬក៏នៅរស់ឡើយ។ ចាប់ពីពេលនោះមក នាងក៏បាត់ដំណឹងម្តាយសូន្យតែម្តង។
នាងបន្ថែមថា លុះដល់ពេលនាងមានអាយុ២៨ឆ្នាំ នាពេលបច្ចុប្បន្ននាងក៏បានដាក់ពាក្យចូលប្រឡងកម្មវិធី Cambodian Idol រដូវកាលទី៣ នេះ ហើយនៅពេលប្រឡងគណៈកម្មការក៏បានជជីកសួរនាង រហូតដល់រឿងម្តាយនេះ ទើបធ្វើឲ្យនាងប្រកាសដំណឹងនេះតែម្តង។ នាងថា នៅពេលដែលដល់វគ្គដែលគេត្រូវចាក់ឃ្លីបវីដេអូដែលបានថតទុកនោះ គឺមានគេបានផ្ញើរូបថតម្តាយរបស់នាងមក តែនាងមិនស្គាល់មុខម្តាយខ្លួនឡើយ ប៉ុន្តែនាងក៏បានយករូបនោះទៅសួរជីដូន និងឪពុករបស់នាង ពេលនោះពួកគាត់ក៏ឆ្លើយថា នេះហើយជាម្តាយរបស់នាង។
ស្រីស្អាត សំ សារ័ត្ន បញ្ជាក់ទៀតថា ទិដ្ឋភាពបានមកចំពេលដែលនាងឈានដល់វគ្គហ្គ្រីនម៉ាយ ដែលជាវគ្គតម្រូវឲ្យច្រៀងបទបែបសប្បាយៗ តែពេលនេះដោយសារចិត្តរំភើបពេក និងការក្តុកក្តួលខ្លាំងនៅពេលដែលនាងបានឃើញរូបថតម្តាយក្នុងស្ថានភាពពិការជើង ទើបធ្វើឲ្យនាងធ្វើមិនបានល្អ ហើយបានធ្លាក់ត្រឹមវគ្គនេះតែម្តង។
នាងបន្ថែមថា ក្រោយពេលដែលនាងបានបំពេញបេសកកម្មប្រឡងនេះរួចរាល់ហើយ នាងក៏បានស៊ើបអាសយដ្ឋានម្តាយរបស់នាងកំពុងរស់នៅឃើញ ហើយនាងក៏បានធ្វើដំណើរទៅជួបមុខម្តាយដោយផ្ទាល់ និងបានក្រាបសំពះសុំទោសគាត់ទាំងទឹកភ្នែក ហើយអ្វីដែលកាន់តែក្តុកក្តួលខ្លាំងក្នុងពេលឃើញជើងម្តាយពិការដោយរបួសមើលមិនជារាប់ឆ្នាំមកនេះ។ នាងថា ក្រោយឃើញសភាពបែបនេះ នាងក៏បានយកម្តាយមកមន្ទីរពេទ្យ ដើម្បីមើលរបួសជើងម្តាយរបស់នាងដោយសារគ្រោះថ្នាក់ចរាចរណ៍ ដោយការដាក់ដែក។ ការព្យាបាលដោយដាក់ដែកនេះ បានធ្វើឡើងចំនួន៣ដង តែនៅមិនអាចជាដោយសារជើងរបស់ម្តាយនាងមានខ្ទុះ ទើបនាងសម្រេចអោយពេទ្យដកដែកនោះចេញ ដោយព្យាបាលតាមធម្មតា ទើបជើងម្តាយរបស់នាងបានជា តែនៅមិនអាចដើរបានដដែល ដោយសារខ្លីជើងមួយចំហៀង ហេតុនេះគាត់ត្រូវរស់ជាជនពិកា។
យ៉ាងណា បើតាម សំ សារ័ត្ន ថា បើទោះបីជាស្ថានភាពម្តាយរបស់ខ្លួនមានភាពពិការក៏ដោយ ប៉ុន្តែនាងពិតជាសប្បាយរីករាយខ្លាំង ដែលនាងអាចស្វែងរកម្តាយឃើញ ព្រោះនាងបានបែកពីម្តាយអស់ជាច្រើនឆ្នាំ ហើយនាងនឹងព្យាយាមជួយផ្គត់ផ្គង់ម្តាយតាមលទ្ធភាពដែលមាន បើទោះបីជាពេលនេះម្តាយរបស់នាងមានស្វាមីថ្មីក៏ដោយ។ នាងថា ស្វាមីក្រោយរបស់ម្តាយនាងគឺមានការស្រឡាញ់គ្នា និងមើលថែគ្នាណាស់ ហេតុនេះនាងមិនអាចបំបែកពួកគាត់ឲ្យមកនៅជុំជាមួយនាងនោះឡើយ ប៉ុន្តែនាងនឹងផ្តល់ជាថវិកាតាមអ្វីដែលម្តាយរបស់នាងត្រូវការ បើទោះបីជាបច្ចុប្បន្ននាងត្រូវជួយបន្ទុកឪពុក និងជីដូនរបស់នាងក៏ដោយ។
នាងបញ្ជាក់ថា បច្ចុប្បន្នអ្វីដែលនាងត្រូវគិតច្រើនជាងគេនោះ គឺជីដូនរបស់នាងដែលបានមើលថែបីបាច់នាងតាំងពីតូចមក ព្រោះបើគ្មានជីដូនទេ រូបនាងក៏មិនអាចមានដល់ថ្ងៃនេះដែរ ហេតុនេះថវិកាមួយចំនួនដែលនាងរកបាន គឺត្រូវសន្សំទុកពេលជីដូនឈឺ ។
ជាការកត់សម្គាល់ បច្ចុប្បន្នស្រីស្អាត សំ សារ័ត្ន កំពុងប្រកបអាជីពចម្រៀងនៅក្នុងភោជនីយដ្ឋានចំនួន២កន្លែងក្នុងរាជធានីភ្នំពេញ ខណៈពេលនាងក៏ទទួលរៀបចំឆាកតន្ត្រីតតូច-ធំតាមកម្មវិធីនានាផងដែរ៕
ចែករំលែកព័តមាននេះ