ប្រទេសកូរ៉េខាងត្បូង ៖ រដ្ឋាភិបាលកូរ៉េខាងត្បូង និងចិនបានយល់ស្របពង្រឹងលើវិធានការទប់ទល់នឹងទូកនេសាទខុសច្បាប់របស់ជនជាតិចិន ដោយអនុញ្ញាតឲ្យអាជ្ញាធរកូរ៉េដាក់ទោសទូកណាដែលមានអាវុធការពារការត្រួតពិនិត្យ ។
ជាមួយគ្នានេះ ភាគីទាំងពីរក៏បានយល់ស្របថា នឹងអនុញ្ញាតឱ្យមានទូកនេសាទតិចជាងមុនចូលក្នុងដែនទឹករបស់គ្នាទៅវិញទៅមកនៅឆ្នាំថ្មីនេះ ។
ក្រសួងសមុទ្រ និងនេសាទកូរ៉េខាងត្បូង បាននិយាយកាលពីថ្ងៃសុក្រកន្លងមកថា ពួកគេបានយល់ស្របលើវិធានការលម្អិតផ្សេងៗជាមួយភាគីចិន ក្នុងការចរចាប្រចាំឆ្នាំទាក់ទិននឹងច្បាប់នេសាទឆ្នាំថ្មី ដែលបានប្រព្រឹត្តឡើងនៅប៉េកាំង ។
ក្រសួងខាងលើបន្តថា កិច្ចព្រមព្រៀងនេះពិតជាសំខាន់ណាស់ ព្រោះវាអនុញ្ញាតឲ្យអាជ្ញាធរសមុទ្ររបស់កូរ៉េអាចពង្រឹងការដើរល្បាតបាន។ ជាមួយនឹងកិច្ចព្រមព្រៀងថ្មីនេះ ទូកដែលមានឧបករណ៍ទាំងនោះ នឹងត្រូវទទួលការពិនិត្យ ។
គួរបញ្ជាក់ថា កូរ៉េខាងត្បូង និងចិនបានចាប់ផ្តើមបើកកិច្ចប្រជុំប្រចាំឆ្នាំ ដើម្បីពិភាក្សាពីបញ្ហានេសាទក្នុងសមុទ្រខាងលិចតាំងពីឆ្នាំ២០០១មកម្ល៉េះ ។ ប៉ុន្តែកិច្ចប្រជុំឆ្នាំនេះបានជួបបញ្ហាព្រឹត្តិការណ៍លិចទូកដោយសារការបាញ់ប្រហារ ហើយប្រទេសទាំងពីរក៏សម្រេចចេញលក្ខខណ្ឌមុនដាច់ឆ្នាំ២០១៦ ។
សម្រាប់ការកំណត់ចំនួនទូកដែលត្រូវអនុញ្ញាតឲ្យចូលមកនេសាទក្នុងដែនទឹករបស់ខ្លួននៅសមុទ្រខាងលិច ប្រទេសទាំងពីរយល់ស្របថា នឹងអនុញ្ញាតឲ្យទូកចំនួន១.៥៤០ទាំងសងខាង និងចំនួនត្រីអាចនេសាទបានតែ៥៧.៧៥០តោនប៉ុណ្ណោះក្នុងឆ្នាំ២០១៧ ។ នេះជាលើកទី១ហើយ ដែលមានការទម្លាក់ចំនួនទូកតាំងពីឆ្នាំ២០១៣មក ។
មន្ត្រីក្រសួងខាងលើបន្តថា ៖ « កិច្ចព្រមព្រៀងនេះសំខាន់ណាស់ ព្រោះពួកយើងកន្លងមកបានជំរុញរដ្ឋាភិបាលចិន ក្នុងការចាត់វិធានការទប់ទល់នឹងការនេសាទខុសច្បាប់ និងកាត់បន្ថយចំនួនទូកនេសាទរបស់ចិន ក្នុងដែនទឹកហាមឃាត់ » ៕
ចែករំលែកព័តមាននេះ