ការរៀនពីភាពបរាជ័យ ឬកំហុសឆ្គង គឺជាអ្វីដែលយើងតែងនិយាយជាញឹកញាប់ដើម្បីឆ្ពោះទៅរកភាពជោគជ័យ ព្រោះសូម្បីតែមនុស្សដែលឆ្លាតៗ ឬទទួលបានជោគជ័យក្នុងថ្ងៃនេះ ក៏សុទ្ធតែធ្លាប់ឆ្លងកាត់ភាពបរាជ័យដែរ ប៉ុន្តែការរៀនសូត្រទាំងនោះមានច្រើនបែប បើរៀនមិនល្អក៏អាចបាត់បង់ឱកាសដូចគ្នា ដូចជា អនុវត្តហើយមិនដំណើរការ ឬធ្លាប់សាកល្បងរួចមកហើយ ។ ការមិនទទួលបានជោគជ័យក្នុងអតីតកាល ទើបបុគ្គលខ្លះសម្រេចចិត្តមិនធ្វើ ឬមើលរំលងនូវវិធីខាងលើ ។
ជាការពិត ការមិនធ្វើតាមភាពបរាជ័យក្នុងអតីតកាលជារឿងល្អហើយ ប៉ុន្តែតើវានឹងបែបនោះគ្រប់រឿងឬ? រឿងខ្លះអាចមិនមែនថា មិនដំណើរការរហូតនោះទេ គ្រាន់តែវាខ្វះកត្តាអ្វីម្យ៉ាង ដែលយើងគួរតែរៀនសូត្រឱ្យបានច្រើន ខុសពីគំនិតដំបូងថា នឹងមិនធ្វើវាជាលើកទី២ ឡើយ ។
១-មូលហេតុរបស់ភាពបរាជ័យ ៖
កុំទៅសម្លឹងលើលទ្ធផលតែម្យ៉ាង ប៉ុន្តែសាកល្បងមើលពីមូលហេតុដែលនាំឱ្យបរាជ័យនោះ។ ពេលខ្លះ វិធីដែលយើងជ្រើសរើសនឹងមិនអាក្រក់អ្វី ប៉ុន្តែវាអាចខុសទីកន្លែង ខុសពេលវេលា ឬខ្វះខាតកត្តាបន្ថែមអ្វីម្យ៉ាងដើម្បីទទួលលទ្ធផលដូចផែនការក៏ថាបាន ។
២-កត្តាក្បែរខាងចូលមកពាក់ព័ន្ធ ៖
យើងតែងនិយាយជាញឹកញាប់ថា ជាច្រើនយ៉ាងដែលធ្លាប់ដំណើរការ និងទទួលភាពជោគជ័យនៅទីកន្លែងមួយ ប៉ុន្តែបែរជាមកបរាជ័យនៅកន្លែងមួយទៀត សូម្បីតែធ្វើតាមអ្វីដែលសរសេរទុកក៏ដោយ ។ ការងារផ្សេងៗនឹងទទួលបានជោគជ័យនោះ គឺមិនអាស្រ័យលើតែយុទ្ធសាស្ត្រ ឬវិធីតែប៉ុណ្ណោះទេ គឺនៅមានកត្តាជុំវិញទៀតដូចជា ពេលវេលា វប្បធម៌ ជំនឿ និងស្ថានការណ៍ ។ល។ នេះជាព័ត៌មានដែលអ្នកធ្វើត្រូវយកទៅជាមួយការរៀនសូត្រផងដែរ ព្រោះការធ្វេសប្រហែស ពេលខ្លះអ្វីដែលយើងធ្វើអាចដំណើរការបានហើយ គ្រាន់តែខុសពេលវេលា ឬមិនត្រូវចង្វាក់ដែលប្រើប៉ុណ្ណោះ ។
៣-អ្វីនឹងធ្វើឱ្យវាដំណើរការបាន ៖
ពេលដែលជួបនឹងកំហុសឆ្គង គឺវាមិនប្លែកទេ ដែលយើងមានអារម្មណ៍មិនល្អ និងមិនចង់ធ្វើតាមវិធីដើម ។ ពេលខ្លះការធ្វេសប្រហែសខ្លួនឯងដោយប្រាប់ថា វាជាគំនិតមិនល្អ ប៉ុន្តែការពិតបើយើងបើកទស្សនៈ ហើយបង្កើតជាសំណួរឡើងថា ធ្វើដូចម្តេចដើម្បីឱ្យវាដំណើរការបាន។ យើងអាចនឹងទទួលបានការអភិវឌ្ឍគំនិតច្រើនថែមទៀត ដែលជួនកាល វិធីដើមធ្លាប់ខុសឆ្គង តែបើសិនជាយកមកកែលម្អផ្នែកខ្លះ និងកែប្រែចំណុចខ្លះ ក៏អាចក្លាយជាវិធីល្អប្រសើរដូចគ្នា ។
អ្នកណាក៏មិនចង់ជួបភាពបរាជ័យ ឬកំហុសឆ្គងជាញឹកញាប់នោះទេ នៅពេលយើងឈឺចាប់ យើងនឹងចងចាំ ហើយមិនចង់ឱ្យវាកើតឡើងទៀត ។ ជាច្រើនលើក យើងតែងប្រើប្រាស់វិធីកាត់ផ្តាច់ ឬមិនរវល់ពាក់ព័ន្ធនឹងវិធីខាងលើទៀតឡើយ ។ ការរៀបរាប់មកខាងដើមបង្ហាញថា រឿងជាច្រើននឹងមានឱកាសល្អដូចគ្នា គ្រាន់តែយើងត្រូវរៀនសូត្រពីវាឱ្យត្រូវវិធីប៉ុណ្ណោះ ៕
ចែករំលែកព័តមាននេះ