រាជធានីភ្នំពេញ ៖ មន្ត្រីជំនាញសុខាភិបាល និងកាំកុងត្រូលបានបដិសេធមិនមានករណីផ្ទុកមេរោគអេដស៍ក្នុងកំប៉ុងផ្លែឈើដែលផលិតនៅប្រទេសថៃនោះទេ វាគ្រាន់តែជាពាក្យចចាមអារ៉ាមគ្មានមូលដ្ឋានប៉ុណ្ណោះ ។
រាជធានីភ្នំពេញ ៖ មន្ត្រីជំនាញសុខាភិបាល និងកាំកុងត្រូលបានបដិសេធមិនមានករណីផ្ទុកមេរោគអេដស៍ក្នុងកំប៉ុងផ្លែឈើដែលផលិតនៅប្រទេសថៃនោះទេ វាគ្រាន់តែជាពាក្យចចាមអារ៉ាមគ្មានមូលដ្ឋានប៉ុណ្ណោះ ។
លោក គីម មាសសុខសីហា អគ្គនាយករងនៃអគ្គនាយកដ្ឋានកាំកុងត្រូលនៃក្រសួងពាណិជ្ជកម្ម បានថ្លែងកាលពីរសៀលថ្ងៃទី៣ មករា ម្សិលមិញ ដោយបានបដិសេធនឹងការលើកឡើងខាងលើនេះ ហើយចាត់ទុកការបំផុសព័ត៌មាននេះ ជាវិទ្ធង្សនាសេដ្ឋកិច្ច(ការប្រើឧបាយកល) ព្រោះតាមធម្មតា មេរោគអេដស៍មិនអាចចម្លងមកខ្លួនមនុស្ស ក្រៅពីតាមរយៈទឹករំអិល និងឈាមនោះទេ ។ លោកបន្តថា ៖ « វាជារឿងមិនពិតទាំងស្រុង ព្រោះមេរោគអេដស៍អាចរស់នៅក្នុងលំហប៉ុន្មានវិនាទីប៉ុណ្ណោះ វាមិនអាចយកទៅដាក់ក្នុងកំប៉ុងទឹកផ្លែឈើនោះឡើយ » ។
ចំណែកស្ថានទូតថៃនៅកម្ពុជា កាលពីពេលថ្មីៗនេះ ក៏បានចេញសេចក្តីជូនដំណឹងបដិសេធនឹងព័ត៌មាននេះផងដែរ ។
ក្នុងរយៈពេលប៉ុន្មានថ្ងៃមកនេះ មានពាក្យចចាមអារ៉ាមថា វិទ្យុប៉ុស្តិ៍លេខ១ថៃដែលថា រដ្ឋាភិបាលថៃបានបញ្ជាក់អះអាងនៅក្នុងសេចក្តីជូនដំណឹងបន្ទាន់មួយ មានន័យថា កុំឲ្យបរិភោគ ឬទទួលទានគ្រឿងកំប៉ុង ជាពិសេសអាហារ ផ្លែឈើកំប៉ុងដែលផលិតនៅប្រទេសថៃតែម្តង ដោយសារមនុស្សផ្ទុកមេរោគអេដស៍២០០នាក់បានទទួលការណែនាំពីប្រធាន ឬមេដឹកនាំរបស់ពួកគេ ដែលមានផ្ទុកមេរោគអេដស៍ ចូលទៅក្នុងរោងចក្រផលិតអាហារកំប៉ុងទាំងនោះ ។
គ្រឿងកំប៉ុងដែលលើកឡើងក្នុងពាក្យចចាមអារ៉ាម រួមមាន កំប៉ុងទឹកគូលែន ផ្លែមៀន ផ្លែស្វាយ និងផ្លែសាវម៉ាវជាដើម ។
លោកវេជ្ជបណ្ឌិត លី សុវណ្ណ អ្នកនាំពាក្យក្រសួងសុខាភិបាល បានថ្លែងឲ្យដឹងថា លោកសូមបដិសេធទាំងស្រុងនូវព័ត៌មាននេះ ហើយសូមបញ្ជាក់ថា មេរោគអេដស៍ ជំងឺអេដស៍មិនអាចរស់នៅក្រៅខ្លួនមនុស្ស ឬរស់នៅក្នុងកំប៉ុងភេសជ្ជៈដែលបានលើកឡើងដោយពាក្យចចាមអារ៉ាមទាំងនោះទេ ។ លោកបន្តថា មេរោគអេដស៍អាចរស់បានតែក្នុងឈាម និងទឹករំអិលរបស់មនុស្សប៉ុណ្ណោះ វាមិនអាចរស់បាននៅក្រៅខ្លួនមនុស្ស ឬកំប៉ុងទឹកផ្លែឈើឡើយ ។
លោកបន្តថា ៖ « ខ្ញុំសូមបដិសេធទាំងស្រុងនូវព័ត៌មាននេះ ព្រោះមេរោគអេដស៍ពេលចេញមកក្រៅរាងកាយ វារស់បានតែប៉ុន្មានវិនាទីប៉ុណ្ណោះ ។ ប្រសិនជាប្រជាពលរដ្ឋចង់ដឹងព័ត៌មាននេះលម្អិត សូមទូរស័ព្ទទៅលេខ១១៥ ដែលជាលេខប្រចាំការ២៤ម៉ោងរបស់ក្រសួងសុខាភិបាល » ៕
ចែករំលែកព័តមាននេះ