អ្នកភូមិលើកគ្នាតវ៉ាចោទអ្នកវេរលុយ«ឆបោក»
ខេត្តបាត់ដំបង ៖ ស្ត្រីម្នាក់ដែលជាម្ចាស់ទីតាំងវីងវេរលុយដ៏ធំមួយកន្លែងនៅស្រុកមោងឫស្សី ត្រូវលោកព្រះរាជអាជ្ញាអមសាលាដំបូងខេត្ត បញ្ជាឲ្យឃាត់ខ្លួន
ខេត្តបាត់ដំបង ៖ ស្ត្រីម្នាក់ដែលជាម្ចាស់ទីតាំងវីងវេរលុយដ៏ធំមួយកន្លែងនៅស្រុកមោងឫស្សី ត្រូវលោកព្រះរាជអាជ្ញាអមសាលាដំបូងខេត្ត បញ្ជាឲ្យឃាត់ខ្លួន កាលពីវេលាម៉ោង៨និង៥០នាទីព្រឹកថ្ងៃទី២មករា ក្រោយពីមានសេចក្ដីរាយការណ៍ថា ស្ត្រីរូបនេះមិនព្រមបើកលុយឲ្យអតិថិជនរាប់សិបនាក់ ដែលកំពុងចោមរោមបើកលុយដែលកូនចៅរបស់ពួកគាត់ផ្ញើមកពីប្រទេសថៃ ។
អធិការស្រុកមោងឫស្សី លោក គិត ហ៊ាង បានឲ្យដឹងថា ស្ត្រីដែលត្រូវឃាត់ខ្លួននោះឈ្មោះជា សុម៉ាលី អាយុ៣២ឆ្នាំ ជាម្ចាស់ទីតាំងវីងវេរលុយយីហោ«ចំរើន សុម៉ាលី»នៅភូមិពោធិ១ ឃុំគារ ស្រុកមោងឫស្សី ។ លោកថា នៅព្រឹកកើតហេតុ មានប្រជាពលរដ្ឋជាច្រើននាក់បាននាំគ្នាទៅបើកលុយពីស្ត្រីរូបនេះ ដែលកូនចៅពួកគាត់ផ្ញើមកពីប្រទេសថៃ ។ ប៉ុន្តែបែរជាស្ត្រីរូបនេះបដិសេធមិនព្រមបើកឲ្យ ទើបលោករាយការណ៍ទៅលោក នួន សាន ព្រះរាជអាជ្ញាអមសាលាដំបូងខេត្ត ហើយលោកក៏សម្រេចបញ្ជាឲ្យសមត្ថកិច្ចឃាត់ខ្លួនស្ត្រីម្ចាស់ផ្ទះនេះជាបណ្ដោះអាសន្នតែម្ដងដើម្បីសួរនាំ ។
ប្រជាពលរដ្ឋរាប់សិបនាក់ដែលកំពុងចោមរោមនៅកន្លែងកើតហេតុបាននិយាយប្រាប់សមត្ថកិច្ចថា ពួកគេម្នាក់ៗបានមកបើកលុយដែលកូនចៅធ្វើកម្មករនៅឯប្រទេសថៃផ្ញើមកឲ្យ តែត្រូវស្ត្រីម្ចាស់ឈ្មោះ ជា សុម៉ាលី បដិសេធថាមិនមានទឹកប្រាក់ដែលត្រូវផ្ញើពីប្រទេសថៃមកឲ្យពួកគាត់ទេ ។ ពួកគាត់និយាយថា អ្នកមកបើកលុយខ្លះមានទឹកប្រាក់ដែលកូនចៅខ្លួនផ្ញើមកឲ្យដែរ តែស្ត្រីម្ចាស់ផ្ទះនេះហាក់ព្យាយាមគេចវែសមិនព្រមបើកឲ្យឡើយ ក្រោមហេតុផលផ្សេងៗតាមតែស្ត្រីរូបនេះចង់និយាយ ។
បើតាមការបញ្ជាក់ពីក្រុមអ្នកបើកលុយបានប្រាប់ថា មានអ្នកខ្លះត្រូវកូនចៅផ្ញើលុយមកឲ្យច្រើនថ្ងៃហើយ តែស្ត្រីរូបនេះនៅតែគេចវែសមិនព្រមបើក ដោយសន្យាថ្ងៃនេះ ថ្ងៃនោះមិនឈប់ ។ ដូច្នេះហើយ ទើបនៅព្រឹកថ្ងៃទី២ មករា អតិថិជនទាំងអស់លើកគ្នាមកតវ៉ាដល់ខាងមុខផ្ទះជាថ្មី ដើម្បីសុំបើកលុយ តែម្ចាស់ផ្ទះនៅតែមិនព្រម ទើបពួកគេប្ដឹងទៅសមត្ថកិច្ចឲ្យជួយអន្តរាគមន៍តែម្ដង ។
ជុំវិញករណីនេះ កោះសន្តិភាពមិនទាន់ទទួលបានចម្លើយបំភ្លឺពីស្ត្រីឈ្មោះ ជា សុម៉ាលី បែបណានៅឡើយទេ ក្រោយពីត្រូវសមត្ថកិច្ចឃាត់ខ្លួន ។ រីឯសាច់ញាតិស្ត្រីរូបនេះក៏មិនទាន់អាចទំនាក់ទំនងសុំការបំភ្លឺបានដែរ រហូតដល់ពេលនេះ ប៉ុន្តែបើតាមសមត្ថកិច្ចស្រុកមោងឫស្សីបានបង្ហើបឲ្យដឹងថា បើតាមចម្លើយបឋមពីអតិថិជនដែលមានឈ្មោះត្រូវបើកលុយពីស្ត្រីខាងលើនេះ គឺអាចមានទំហំទឹកប្រាក់រហូតដល់រាប់លានបាត(ប្រាក់ថៃ)ឯណោះ ។ មន្ត្រីដដែលបញ្ជាក់ថា ទឹកប្រាក់ដ៏ច្រើនសន្ធឹកសន្ធាប់នេះ ទំនងមិនមែនទើបនឹងផ្ញើមកក្នុងពេលថ្មីៗនេះទេ គឺអាចផ្ញើមកជាបន្តបន្ទាប់ តែស្ត្រីរូបនេះ មិនព្រមបើកឲ្យអតិថិជនរបស់ខ្លួន ដែលទំនងជាចង់ស៊ីដាច់ប្រាក់អតិថិជន ។ នេះបើតាមការអះអាងរបស់អតិថិជនដែលកំពុងចោមរោមបើកលុយ ។
ទោះជាយ៉ាងណា បើតាមលោកគិត ហ៊ាង អធិការស្រុកមោងឫស្សី បានថ្លែងថា ស្ត្រីឈ្មោះជា សុម៉ាលី ត្រូវបានឃាត់ខ្លួនតាមបញ្ជាលោកនួន សាន ព្រះរាជអាជ្ញាអមសាលាដំបូងខេត្ត ដោយជាប់សង្ស័យពីបទ«ឆបោក»និងបាននាំមកកាន់អធិការដ្ឋាននគរបាលស្រុកមោងឫស្សី ដើម្បីសួរនាំមុនពេលកសាងសំណុំរឿងបញ្ជូនទៅកាន់តុលាការចាត់វិធានការតាមនីតិវិធីច្បាប់ ។
តាមប្រភពព័ត៌មានចុងក្រោយពីក្រុមហ៊ុនវីង បានឲ្យដឹងថា ករណីនេះមិនពាក់ព័ន្ធនឹងសេវាផ្ទេរ ប្រាក់របស់ក្រុមហ៊ុនវីងនោះទេ តែអាចជាការផ្ទេរប្រាក់មកគណនីផ្ទាល់ខ្លួនរបស់ស្ត្រីឈ្មោះ ជា សុម៉ាលី នេះ ។
តំណាងក្រុមហ៊ុនវីង បាននិយាយថា ៖ « យើងមានសេវាផ្ទេរប្រាក់ពីប្រទេសថៃមកកម្ពុជា មែន ដោយផ្ទេរចូលក្នុងកុងផ្ទាល់ខ្លួនរបស់អតិថិជន ហើយអតិថិជនដែលនៅកម្ពុជាទាំងនោះ អាចទៅបើកប្រាក់នៅភ្នាក់ងារវីងណាមួយក៏បាន មិនចាំបាច់តែទីតាំងរបស់ស្ដ្រីខាងលើនោះទេ ។ រឿងនេះ ខ្ញុំគិតថាអាចជាករណីបុគ្គលដែលមានគំនិតមិនល្អ ព្រោះប្រជាជនដែលត្រូវទៅបើកលុយនោះ ពួកគាត់អាចពុំមានកុងផ្ទាល់ខ្លួននោះទេ ចំណែកអ្នកផ្ទេរប្រាក់ពីប្រទេសថៃ អាចផ្ទេរចូលក្នុងកុងរបស់ស្ត្រីឈ្មោះ ជា សុម៉ាលី នេះ » ៕
ចែករំលែកព័តមាននេះ