CNN កាលពីពេល ថ្មីៗកន្លងមកផ្សាយថា ប្រទេសចិនមានគោលដៅក្លាយជាមហាអំណាចផ្នែកអវកាស ដោយនឹងលុកលុុយនៅភពព្រះចន្ទក្នុងឆ្នាំ២០១៨ និងឆ្លងទៅភពព្រះអង្គារនៅឆ្នាំ២០២០ ។ គម្រោងការផ្នែកទីអវកាសរបស់ចិនមានការរីកចម្រើនយ៉ាងឆាប់រហ័ស និងពោរពេញដោយកិច្ចខំប្រឹងប្រែង ក្នុងទិសដៅរុករកនៅភពព្រះចន្ទ និងភពព្រះអង្គារ ។
លោកអ៊ូ វ៉ានហួ អនុប្រធានអង្គការអវកាសចិនបញ្ជាក់ថា ប៉េកាំងមានទិសដៅបញ្ជូនយានអវកាសមួយគ្រឿងដំបូងទៅភពព្រះអង្គារក្នុងឆ្នាំ២០២០ ដើម្បីគោចរ និងស្រាវជ្រាវទូទៅ ក្រោយមកដំណើរការក្នុងជំហានទី២ រួមមានប្រមូលគំរូនៅលើផ្ទៃភពផ្កាយព្រះអង្គារ ដើម្បីស្រាវជ្រាវ ។
លោកបញ្ជាក់ថា ចិននៅមានផែនការបញ្ចូនយានអវកាសទៅភពព្រហស្បតិ៍ និងផ្កាយជាបរិវារ ហើយនៅក្នុងឆ្នាំ២០៣០ ចិននឹងក្លាយជាមហាអំណាចក្នុងលំហអាកាសលើពិភពលោក ។
ចិនចាប់ផ្ដើមស្រាវជ្រាវនៅទីអវកាសយឺតជាងបណ្ដាប្រទេសមហាអំណាចជាច្រើនទៀត។ ទោះជាយ៉ាងណាក្ដី ក្នុងរយៈពេលជាច្រើនទសវត្សកន្លងមក ចិនបានចំណាយប្រាក់ច្រើនពាន់លានដុល្លារ និងធនធានធម្មជាតិនានា ដើម្បីស្រាវជ្រាវអប់រំមន្ដ្រីនានា និងក្នុងឆ្នាំ២០០៣ ចិនបានបញ្ជូនយានទៅស្រាវជ្រាវក្នុងលំហអវកាស ដោយមានយានមនុស្សយន្ដ «Rover» ចុះចតនៅលើភពព្រះចន្ទ និងបញ្ជូនបន្ទប់ពិសោធន៍ក្នុងលំហអវកាសឡើងទៅរង្វង់គោចរ ជាផ្នែកមួយក្នុងការសាងសង់ស្ថានីយអវកាសរបស់ខ្លួន ។
អនុប្រធានអង្គការអវកាសចិនបញ្ជាក់ថា ប៉េកាំងកំពុងសិក្សាស្រាវជ្រាវដើម្បីបញ្ជូនមនុស្សឡើងទៅភពព្រះចន្ទ ប៉ុន្ដែបច្ចុប្បន្នផ្ដោតជាសំខាន់លើយានជាមនុស្សយន្ដ ។
លើសពីនេះ ចិនកំពុងបង្កើនកិច្ចសហប្រតិបត្ដិការជាមួយអង្គការអវកាសអន្ដរជាតិនានា លើកលែងតែអង្គការអវកាស«NASA» ព្រោះតាំងពីឆ្នាំ២០១១មក សភាអាមេរិក ហាមNASA ធ្វើការជាមួយចិនក្នុងហេតុផលបារម្ភពីសន្ដិសុខជាតិ ៕
ចែករំលែកព័តមាននេះ