ខេត្តបាត់ដំបង ៖ ប្រភពបានឱ្យដឹងថា មានកម្លាំងយោធាក្នុងអង្គភាពស៊ើបការណ៍របស់យោធភូមិភាគទី៥មួយក្រុម បានចុះទៅរារាំងប្រជាកសិករមិនឱ្យដាំដុះដំណាំលើដីអាស្រ័យផលរបស់ពួកគាត់មួយកន្លែង ស្ថិតនៅជាប់ព្រំប្រទល់ឃុំបាសាក់ ស្រុករុក្ខគិរី និង
ខេត្តបាត់ដំបង ៖ ប្រភពបានឱ្យដឹងថា មានកម្លាំងយោធាក្នុងអង្គភាពស៊ើបការណ៍របស់យោធភូមិភាគទី៥មួយក្រុម បានចុះទៅរារាំងប្រជាកសិករមិនឱ្យដាំដុះដំណាំលើដីអាស្រ័យផលរបស់ពួកគាត់មួយកន្លែង ស្ថិតនៅជាប់ព្រំប្រទល់ឃុំបាសាក់ ស្រុករុក្ខគិរី និងឃុំព្រះផុស ស្រុកគាស់ក្រឡ កាលពីវេលាម៉ោង០៨ និង៣០នាទីព្រឹកថ្ងៃទី០៣ មករា រហូតឈានដល់ការអន្តរាគមន៍ពីសមត្ថកិច្ច និងអាជ្ញាធរមូលដ្ឋាន ។
កម្លាំងអាវុធហត្ថបានរាយការណ៍ថា កម្លាំងយោធាក្នុងអង្គភាពស៊ើបការណ៍របស់យោធភូមិភាភទី៥ចំនួន៥នាក់ ដឹកនាំដោយលោកឈឹម សារ៉ន បានចុះទៅរារាំងប្រជាពលរដ្ឋនៅឃុំបាសាក់ ស្រុករុក្ខគិរី មិនឱ្យបង្កបង្កើនផលលើដីរបស់ពួកគាត់ ដែលពួកគាត់ធ្លាប់អាស្រ័យផលជារៀងរាល់ឆ្នាំ។ សេចក្ដីរាយការណ៍បន្តថា ដីដែលកម្លាំងយោធាចុះទៅរារាំងនោះ ស្ថិតនៅត្រង់ព្រំប្រទល់ឃុំបាសាក់ ស្រុករុក្ខគិរី និងឃុំព្រះផុស ស្រុកគាស់ក្រឡ។
គេនៅមិនទាន់ដឹងពីគោលបំណងរបស់ក្រុមយោធា ដែលចុះទៅរារាំងប្រជាពលរដ្ឋមិនឲ្យបង្កបង្កើនផលខាងលើនេះនៅឡើយទេ។ ប៉ុន្តែបើតាមប្រភពពីអាជ្ញាធរបានអះអាងថា ដីដែលកម្លាំងយោធាចុះរារាំងមិនឲ្យពលរដ្ឋដាំដុះនោះ គឺជាដីរបស់ប្រជាពលរដ្ឋដែលតែងអាស្រ័យផលរាល់ឆ្នាំ តែបែរជាមានកម្លាំងយោធាកងស៊ើបការណ៍របស់ភូមិភាគ៥ ចុះទៅហាមឃាត់ប្រជាពលរដ្ឋមិនឲ្យដាំដុះទៅវិញ។
ប្រភពដដែលបញ្ជាក់ថា ការរារាំងរបស់កម្លាំងយោធាខាងលើ បានបង្កឲ្យមានការប្រឈមមុខដាក់គ្នាយ៉ាងតឹងតែងរវាងកម្លាំងយោធា៥នាក់ ជាមួយប្រជាកសិករ ដែលមានដីនៅទីនោះ រហូតមានការអន្តរាគមន៍ពីកម្លាំងចម្រុះរបស់អាជ្ញាធរស្រុកទាំង២ ទើបស្ថានភាពធូរស្រាលវិញ ។ ប្រភពបានបន្ថែមថា រហូតមកដល់ពេលនេះ អាជ្ញាធរកំពុងធ្វើការស្រាវជ្រាវលើបញ្ហានេះ ដើម្បីស្វែងរកមូលហេតុ ដែលកម្លាំងយោធាមួយក្រុមខាងលើ ចុះទៅរារាំងប្រជាកសិករមិនឲ្យបង្កបង្កើនផលលើដីរបស់ខ្លួន (ដីពលរដ្ឋ) ៕
ចែករំលែកព័តមាននេះ