ជំនន់ទឹកភ្លៀងដែលមន្ត្រីជំនាញបើកបង្ហូរចេញពីអាចស្ដុកទឹក «ទំនប់បាសាក់» នៅស្រុករុក្ខគិរី បាននិងកំពុងជន់លិចលង់យ៉ាងខ្លាំង នៅក្នុងទីប្រជុំជនស្រុកមោងឬស្សី ជាពិសេស
ខេត្តបាត់ដំបង ៖ ជំនន់ទឹកភ្លៀងដែលមន្ត្រីជំនាញបើកបង្ហូរចេញពីអាចស្ដុកទឹក «ទំនប់បាសាក់» នៅស្រុករុក្ខគិរី បាននិងកំពុងជន់លិចលង់យ៉ាងខ្លាំង នៅក្នុងទីប្រជុំជនស្រុកមោងឬស្សី ជាពិសេសជន់លិចនៅក្នុង «ផ្សារមោងឬស្សី» តែម្ដង នៅព្រឹកថ្ងៃទី២៩ ខែកក្កដា ដោយសារជំនន់ទឹកនេះ កក់ស្ទះត្រឹមការដ្ឋានស្ពានផ្លូវជាតិលេខ៥ ដែលកំពុងសាងសង់។ នេះបើតាមសេចក្ដីរាយការណ៍ពីមន្ត្រីរដ្ឋបាលស្រុកមោងឬស្សី។
មន្ត្រីស្រុកមោងឬស្សី បាននិយាយថា ទឹកជំនន់ដែលកំពុងលិចលង់ហេដ្ឋារចនាសម្ព័ន្ធមួយចំនួននៅក្នុងស្រុកមោងឬស្សីខាងលើនេះ គឺដោយសារតែមន្ត្រីជំនាញ បានបើកបង្ហូរទឹកចេញពីអាងស្ដុកទឹកនៅ «ទំនប់បាសាក់» ស្ថិតនៅឃុំព្រែកជីក ស្រុករុក្ខគិរី ដែលអាងស្ដុកទឹកមួយនេះកំពុងលិចលង់ដែរ ដោយសារទឹកភ្លៀង។
មន្ត្រីដដែលបានប្រាប់ថា គេបានបើកបន្ធូរទឹកចេញពី «ទំនប់បាសាក់» កាលពីយប់ថ្ងៃទី២៨ ខែកក្កដា បង្ហូរទម្លាក់មកតាមដងស្ទឹងមោង រហូតមកដល់កណ្ដាលទីប្រជុំជន ស្រុកមោងឬស្សី ហើយទឹកក៏កកស្ទះត្រឹមស្ពានផ្លូវជាតិលេខ៥ ដែលគេកំពុងសាងសង់។ ការដ្ឋានស្ពានដែលកំពុងសាងសង់នោះ បើកមុខទឹកហូរតូចពេក រំដោះទឹកមិនទាន់ ទើបធ្វើឲ្យកម្លាំងទឹកហូរហៀរបែកធ្លាយតាមប្រព័ន្ធលូ ហូរលើផ្លូវចេញទៅតាមភូមិ និងជន់លិចពេញក្នុង «ផ្សារមោងឬស្សី» តែម្ដង។
អភិបាលស្រុកមោងឬស្សី លោក ទេព ហន ត្រូវបានគេស្រង់សំដីពាក់ព័ន្ធនឹងទឹកជំនន់នេះថា ទឹកជំនន់ដែលលិចលង់ផ្សារមោងឬស្សី លំនៅឋាន និងផ្លូវមួយចំនួននៅក្នុងរដ្ឋបាលស្រុក របស់លោកនេះ គឺជាជំនន់ទឹកដែលបានបង្ហូរចេញពី «ទំនប់បាសាក់» នៅប៉ែកខាងលើ នៃស្រុករុក្ខគិរី។
លោកអភិបាលបាននិយាយថា ភ្លៀងបានធ្លាក់ខ្លាំងស្ទើររាល់ថ្ងៃ ទើបធ្វើឲ្យទឹកនៅក្នុង «ទំនប់បាសាក់» ហក់ឡើងខ្លាំង។ ដូច្នេះអាជ្ញាធរ និងមន្ត្រីជំនាញ ដែលគ្រប់គ្រងអាងស្ដុកទឹកដ័រធំសម្បើមមួយនេះ ត្រូវតែបើកបង្ហូរចេញខ្លះ ចៀសវាងបង្កគ្រោះមហន្តរាយធ្ងន់ធ្ងរដល់សំណង់(ទំនប់)។ ប៉ុន្តែនៅពេលកម្លាំងទឹកហូរតាមដងស្ទឹងមកដល់ស្រុកមោងឬស្សី ក៏ស្ទះត្រឹមការដ្ឋានសាងសង់ស្ពានផ្លូវជាតិលេខ៥ ចំកណ្ដាលស្រុកមោងឬស្សី ដោយសារតែស្ពានដែលកពុងសាងសង់នោះ បើកមុខទឹកតូចពេកត្រឹម១ភាគ៣ នៃមុខទឹក។
លោក ទេព ហន បានបញ្ជាក់ដែរថា លោកបានស្នើសុំអន្តរាគមន៏ពីថ្នាក់លើ មន្ត្រីជំនាញ និង ក្រុមហ៊ុនសាងសង់ស្ពាន ដើម្បីជួយសម្រួលបើកមុខទឹកបន្ថែមនៅកន្លែងការដ្ឋានស្ពានឲ្យទឹកហូរបានលឿន តែមិនទាន់ទទួលបានចម្លើយពីថ្នាក់លើ ឬមន្ត្រីជំនាញនៅឡើយទេ គិតត្រឹមម៉ោង១រសៀលថ្ងៃទី២៩ ខែកក្កដា នេះ។
លោកបានបន្ថែមថា ពេលនេះជំនន់ទឹកបាននិងកំពុងជន់លិចផ្សារមោង លិចលំនៅឋានមួយចំនួន លិចមន្ទីរពេទ្យបង្អែកស្រុក លិចសាលាស្រុក និងលិចផ្លូវថ្នល់មួយចំនួនផង ហើយបើមេឃនៅតែមានធ្លាក់ភ្លៀងនៅប៉ែកខាងលើបន្ថែមទៀត ជំនន់ទឹកភ្លៀងនេះ រដ្ឋបាលស្រុកមោងឬស្សី ប្រឈមមហន្តរាយកាន់តែខ្លាំងហើយ។ ប៉ុន្តែយ៉ាងណា បើតាមសេចក្ដីរាយការណ៍ចុងក្រោយ នៅរសៀលថ្ងៃទី២៩ ខែកក្កដា នេះ កំពស់ទឹកនៅក្នុងអាងស្ដុកទឹក «ទំនប់បាសាក់» បានថយចុះច្រើនហើយ តែវានឹងហក់ឡើងវិញ ប្រសិនបើមានភ្លៀងធ្លាក់បន្ថែមនៅប៉ែកខាងលើៗ នៃតំបន់នោះ៕
ចែករំលែកព័តមាននេះ