ព្រួតគ្នាឆក់ទូរស័ព្ទដៃ លុះ១០ថ្ងៃក្រោយត្រូវអស់លក្ខណ៍ជាបន្តបន្ទាប់
- បាត់ដំបង
កម្លាំងជំនាញ នៃការិយាល័យព្រហ្មទណ្ឌកំរិតស្រាល បាននិងកំពុងសួរចម្លើយក្រុមជនដៃស្អិតមួយហ្វូង (ចោរឆក់) ដើម្បីកសាងសណុំរឿងបញ្ជូនទៅតុលាការ ក្រោយពី
ខេត្តបាត់ដំបង ៖ កម្លាំងជំនាញ នៃការិយាល័យព្រហ្មទណ្ឌកំរិតស្រាល បាននិងកំពុងសួរចម្លើយក្រុមជនដៃស្អិតមួយហ្វូង (ចោរឆក់) ដើម្បីកសាងសណុំរឿងបញ្ជូនទៅតុលាការ ក្រោយពីតាមឃាត់ខ្លួនបានជាបន្តបន្ទាប់ កាលពីរសៀលថ្ងៃទី២៨ ខែកក្កដា ឆ្នាំ២០២២ នៅឃុំពាមឯក ស្រុកឯកភ្នំ ពាក់ព័ន្ធនឹងបទល្មើស «ឆក់» យកទូរស័ព្ទដៃមួយគ្រឿងពីអ្នកដំណើរ។
តាមរយៈរបាយការណ៍ នាយការិយាល័យព្រហ្មទណ្ឌកំរិតស្រាល លោក ឈឿង គឹមសុង បានឲ្យដឹងថា ជនសង្ស័យទាំង០៤នាក់ខាងលើនោះមាន ៖ ១- ឈ្មោះ ដួង ឃីម អាយុ១៧ឆ្នាំ នៅភូមិករហាល ឃុំពាមឯក, ២- ឈ្មោះ រស់ បញ្ញា ហៅ ខ្លឹង អាយុ១៧ឆ្នាំ នៅភូមិពាមឯក ឃុំពាមឯក, ៣- ឈ្មោះ ឃឿន សុជាតិ អាយុ១៧ឆ្នាំ នៅភូមិពាមឯក ឃុំពាមឯក និង៤- ឈ្មោះ ណាន ណេត អាយុ១៧ឆ្នាំ នៅភូមិតាគម ឃុំពាមឯក ស្រុកឯកភ្នំ។
បើតាមលោក ឈឿង គឹមសុង បានបញ្ជាក់នៅក្នុងរបាយការណ៍ថា ក្រុមជនដៃស្អិតទាំង០៤នាក់នេះ បានជិះម៉ូតូ០២គ្រឿង ហើយបានធ្វើសកម្មភាព «ឆក់» យកទូរស័ព្ទដៃម៉ាក OPPO មួយគ្រឿងពីយុវជនម្នាក់កាលពី១០ថ្ងៃមុន នៅក្នុងក្រុងបាត់ដំបង។ ក្រោយពីទទួលបានបណ្ដឹងជនរងគ្រោះ លោកស្នងការ បានបញ្ជាឲ្យលោកដឹកនាំកម្លាំងធ្វើការស្រាវជ្រាវរហូតកំណត់បាននូវមុខសញ្ញាក្រុមជនដៃដល់ ទើបឈានដល់ការឃាត់ខ្លួនក្រុមនេះ បានជាបន្តបន្ទាប់ចំនួន០៤នាក់តែម្តង។
នៅក្នុងរបាយការណ៍ ជនរងគ្រោះឈ្មោះ សុន សុភី អាយុ១៨ឆ្នាំ រស់នៅភូមិកម្មករ សង្កាត់ស្វាយប៉ោ ក្រុងបាត់ដំបង ត្រូវក្រុមចោរជិះម៉ូតូដេញតាម «ឆក់» យកទូរស័ព្ទដៃមួយគ្រឿង នៅចំណុចខាងមុខសាលាខេត្តបាត់ដំបង កាលពីយប់ថ្ងៃទី១៨ ខែកក្កដា។ ក្រោយធ្វើសកម្មភាព «ឆក់» យកទូរស័ព្ទពីជនរងគ្រោះបានសម្រេច ក្រុមនេះបានជិះគេចខ្លួនបាត់ស្រមោល។ ប៉ុន្តែប៉ុន្មានថ្ងៃក្រោយ ក៏ត្រូវកម្លាំងការិយាល័យព្រហ្មទណ្ឌកំរិតស្រាល ធ្វើការស្រាវជ្រាវរហូតកំណត់មុខសញ្ញាក្រុមចោរទាំងនេះបាន ទើបកម្លាំងជំនាញតាមចាប់ខ្លួនបានជាបន្តបន្ទាប់ដល់កាំជណ្ដើរផ្ទះតែម្ដង។
បើតាមលោក ឈឿង គឹមសុង បានបញ្ជាក់ថា ពេលធ្វើសកម្មភាព «ឆក់» ក្រុមនេះ បានប្រើយុទ្ធសាស្ត្រមានអ្នកជិះ «ឆក់» និងមានអ្នកជិះបិទគូទ។ បើតាមព្រឹត្តិហេតុ ដែលលោកទទួលបាន គឺក្រុមជនដៃស្អិតដែលមានវ័យប្រហែលគ្នា និងមានសមាសភាពមកពីស្រុកឯកភ្នំដូចគ្នាខាងលើនេះ ធ្លាប់ធ្វើសកម្មភាព «ឆក់»ដូចគ្នាម្ដងដែរ នៅស្រុកថ្មគោល។ បន្ទាប់ពីបញ្ចប់ នៃការសួរចម្លើយ លោកស្នងការខេត្ត បានបញ្ជាឲ្យកម្លាំងជំនាញរបស់លោក រៀបចំសំណុំរឿងបញ្ជូនជនសង្ស័យទាំង០៤នាក់នេះ ទៅសាលាដំបូងខេត្ត នៅរសៀលថ្ងៃទី២៩ ខែកក្កដា នេះហើយ៕
ចែករំលែកព័តមាននេះ