ខេត្តបាត់ដំបង ៖ ជនសង្ស័យម្នាក់ដែលលួចយកម៉ូតូគេមួយគ្រឿងពីស្រុកបវេលនោះ ត្រូវបានកម្លាំងស្នងការខេត្ត និងកម្លាំងមូលដ្ឋាន តាមចាប់ខ្លួនបានហើយនៅក្រុងប៉ោយប៉ែត ខេត្តបន្ទាយមានជ័យ កាលពីវេលាថ្ងៃត្រង់ថ្ងៃទី៣០ ខែកក្កដា ឆ្នាំ២០២២ ដោយមានកិច្ចសហការពីកម្លាំងនគរបាលមូលដ្ឋានផងដែរ។
លោក សុខ សារិន អធិការស្រុកបវេល បានឲ្យដឹងថា ជនសង្ស័យឈ្មោះ ផល រិទ្ធិ ហៅ ខ្លា ភេទប្រុស អាយុ៣២ឆ្នាំ ស្នាក់នៅមិនពិតប្រាកដ។ ជននេះត្រូវកម្លាំងរបស់លោក សហការជាមួយកម្លាំងការិយាល័យព្រហ្មទណ្ឌកំរិតស្រាល នៃស្នងការខេត្តបាត់ដំបង តាមចាប់ខ្លួនបានដល់ក្រុងប៉ោយប៉ែត បន្ទាប់ពីលួចម៉ូតូនៅស្រុកបវេល ហើយជិះគេចខ្លួនទៅសម្ងំលាក់ខ្លួននៅទីនោះ។
លោកបានបញ្ជាក់ថា កិច្ចប្រតិបត្តិការនេះ ក៏មានកិច្ចសហការពីកម្លាំងអធិការក្រុងប៉ោយប៉ែត ផងដែរ ហើយបាននាំខ្លួនជននេះមកកាន់ស្នងការខេត្ត ចាត់ការតាមនីតិវិធី។ ជនសង្ស័យរូបនេះមានឈ្មោះ ផល រិទ្ធិ ហៅ ខ្លា ត្រូវបានសង្ស័យថា បានធ្វើសកម្មភាពលួចយកម៉ូតូមួយគ្រឿងម៉ាក ហុងដាឌ្រីម សេ១២៥ ពណ៌ខ្មៅ ស៊េរីឆ្នាំ២០២២ ពាក់ស្លាកលេខ កំពង់ចាម 1AB-7749 របស់ជនរងគ្រោះឈ្មោះ ឆុន រីមឆេង ភេទប្រុស អាយុ៣៧ឆ្នាំ ស្នាក់នៅភូមិបវេល១ ឃុំបវេល ស្រុកបវេល កាលពីយប់ថ្ងៃទី២៧ ខែកក្កដា។ ក្រោយពីលួចបានម៉ូតូ ជននេះបានជិះគេចខ្លួនទៅសម្ងំលាក់ខ្លួននៅក្រុងប៉ោយប៉ែត ខេត្តបន្ទាយមានជ័យ។
កម្លាំងការិយាល័យព្រហ្មទណ្ឌកំរិតស្រាល នៃស្នងការខេត្តបាត់ដំបង និង កម្លាំងជំនាញអធិការស្រុកបវេល បានធ្វើការស្រាវជ្រាវ រហូតកំណត់មុសសញ្ញាបាន និងកន្លែងលាក់ខ្លួនរបស់ជនសង្ស័យនៅក្រុងប៉ោយប៉ែត ទើបលោកស្នងការបញ្ជាឲ្យកម្លាំងការិយាល័យជំនាញទៅកាន់ក្រុងប៉ោយប៉ែត ដើម្បីចាប់ខ្លួនជនសង្ស័យ ដោយមានកិច្ចសហការពីកម្លាំងក្រុងប៉ោយប៉ែតផងដែរ។
បើតាមរបាយការណ៍ នៃកិច្ចប្រតិបត្តិការខាងលើនេះ ជាមួយនឹងការឃាត់ខ្លួនជនដៃដល់ឈ្មោះ ផល រិទ្ធិ ហៅ ខ្លា កម្លាំងជំនាញដកហូតបានម៉ូតូចំនួន០២គ្រឿងពីជនសង្ស័យ ក្នុងនោះមួយគ្រឿងជាម៉ូតូជនរងគ្រោះ ដែលជននេះលួចយកទៅពីស្រុកបវេល។
លោក ឈឿង គឹមសុង ប្រធានការិយាល័យព្រហ្មទណ្ឌកំរិតស្រាល បានប្រាប់ថា ពេលនេះកម្លាំងជំនាញបានបញ្ជូនជនសង្ស័យមកកាន់ការិយាល័យជំនាញហើយ និងកំពុងសួរនាំ ដើម្បីកសាងសំណុំរឿងបញ្ជូនទៅកាន់សាលាដំបូងខេត្ត៕
ចែករំលែកព័តមាននេះ