រាជធានីភ្នំពេញ ៖ ក្នុងមួយរយៈចុងក្រោយនេះ គេកត់សម្គាល់ថា កីឡាករជើងខ្លាំងបានបាត់មុខពីលើសង្វៀនប្រដាល់ច្រើនឡើង ខណៈដែលការបាត់មុខហាក់ធ្វើឱ្យមហាជនសង្វេគចិត្តជាខ្លាំងបន្ទាប់ពីមានដំណឹងថា កីឡាករល្អៗទាំងនោះបានធ្លាក់ខ្លួនជ្រើសយកការងារសំណង់ធ្វើជាត្រីមុខ ។ មុននេះមានការទម្លាយថា ជើងខ្លាំង ឡេះ តើក បានក្លាយជាកម្មករសំណង់ហើយពេលនេះកីឡាករជើងខ្លាំងអន ឈុនហេង បានក្លាយជាសមាសភាពថ្មីដែលត្រូវចាប់យកមុខរបរសំណង់ម្នាក់ទៀត ។
លោកអះអាងថា ខ្លួនលែងចង់ឡើងប្រដាល់ទៀតហើយដោយសារតែឡើងរេញម្ដងៗឈឺខ្លួនច្រើនថ្ងៃ ហើយមិនអាចធ្វើសំណង់បានជាប់លាប់ដែលតម្រូវដោយម្ចាស់ការដ្ឋាន ទើបខ្លួនចាត់ទុកការប្រដាល់ជាមុខរបរទី២វិញ ។
កីឡាករ អន ឈុនហេង និយាយថា ដោយសារតែការប្រដាល់យូរៗទើបមានការផ្គូផ្គងម្ដងបានធ្វើឱ្យលោកងាកទៅចាប់អារម្មណ៍សំណង់ធ្វើជាជំនាញឆ្នាំងបាយវិញដើម្បីដោះទ័ល ។ អាជីពសំណង់ដ្បិតថាហត់តែមិនឈឺខ្លួន ឬត្រូវដេកថ្ងូរដូចពេលឡើងវ៉ៃនោះទេ ហើយបើនិយាយពីប្រាក់ចំណូលវិញក៏ជាប់លាប់ជាងការប្រដាល់ដែរ ទើបលោកសម្រេចចិត្តធ្វើសំណង់ដើម្បីជីវភាពប្រចាំថ្ងៃ ហើយលុះត្រាតែមានការផ្គូផ្គងទើបត្រលប់មកហ្វឹកហាត់ និងឡើងប្រដាល់វិញ ។
លោកថា ការងារសំណង់ដែលលោកប្រឡូកជាប់លាប់ គឺការងារជាកូនជាងផ្នែកអគ្គិសនីសំណង់ និងកម្មករសំណង់បើទោះជាការងារទាំងនោះទទួលបានកម្រៃមិនច្រើនដូចគ្នានឹងឡើងប្រដាល់មួយលើកក្ដី ។ ក្នុងមួយខែលោកមានឱកាសបានឡើងប្រកួតតែ២ដងប៉ុណ្ណោះ ដោយក្នុងខែខ្លះគឺមិនមានការផ្គូផ្គងក៏មានដែរ ទើបការងារសំណង់ជាមុខសញ្ញាតែមួយដែលលោកអាចទប់ចំណូលដែលត្រូវការប្រចាំថ្ងៃបាន ។ លោកថា ក្នុងការឡើងប្រដាល់មួយលើកលោកទទួលបានប្រាក់តែរង្វង់ជាង៣០ម៉ឺនទៅ៤០ម៉ឺនរៀលប៉ុណ្ណោះ ខណៈដែលប្រាក់តម្លៃខ្លួនទាំងនោះក៏ត្រូវបែងចែកអ្នកឱ្យទឹក និងគ្រូបង្វឹកទៀតគឺមិនសល់ច្រើននោះទេ ។ លោកមិនទាន់រាប់បញ្ចូលថ្លៃមើលខ្លួនក្រោយពេលប្រដាល់ដែលតម្រូវឱ្យលោកបែងចែកចំណូលដែលបានពីការប្រដាល់មិនអាចបំពេញតម្រូវការបាននោះផង ។ លោកថា ភរិយាមិនឱ្យលោកបន្តការប្រដាល់ច្រើនលើកមកហើយ ដោយសារតែការឡើងប្រដាល់មួយលើកៗ ត្រូវខាតថ្ងៃធ្វើសំណង់យូរៗពិបាកស្វែងរកកន្លែងធ្វើ ។
ចំពោះរឿងប្រដាល់លុះត្រាតែមានការផ្គូផ្គងទើបសម្រេចចិត្តឡើងតែក៏មិនសូវចង់ឡើងប៉ុន្មានដែរ ដោយសារតែមុនពេលឡើងយ៉ាងហោចក៏ផ្អាកធ្វើសំណង់ដាច់លុយអស់មួយ
អាទិត្យដើម្បីហ្វឹកហាត់ ហើយក្រោយចុះពីរេញក៏ត្រូវសម្រាកមើលខ្លួនយ៉ាងហោចមួយអាទិត្យទៀតទម្រាំតែអាចទទួលធ្វើសំណង់ទៀតបាន ។
លោកបង្ហាញភាពស្ទាក់ស្ទើរបន្ទាប់ពីអាជីពប្រដាល់លែងជាជម្រើសទី១របស់ខ្លួនហើយក៏បានបង្ហាញថា ជីវិតក្រៅកីឡារបស់អ្នកប្រដាល់ល្បីៗ គឺសុទ្ធតែស្ថិតក្នុងស្ថានភាពលំបាក ។ លោកនិយាយថា អត់ដឹងពេលណានឹងឡើងបង្ហាញមុខលើសង្វៀនទៀតនោះទ ដោយសារតែរាល់ថ្ងៃឱ្យតែខានធ្វើសំណង់គឺមកវិញពិបាករកកន្លែងធ្វើ ហើយបើចេះតែសុំឈប់ច្រើនក៏កន្លែងសំណង់ផ្សេងៗមិនចង់ទទួលដែរ ។ លោកថា សំណង់គឺជាប្រភពបង់ថ្លៃផ្ទះជួល និងតម្រូវការលើកូនប្រពន្ធរបស់ខ្លួន ប៉ុន្តែមិនមានន័យថាលោកចង់លាចេញពីការប្រដាល់នោះទេ គឺគ្រាន់តែលោកយល់ថាស្ថានភាពរស់នៅរបស់លោកនៅក្នុងពេលនេះមានភាពស្មុគស្មាញពិបាកមានពេលហ្វឹកហាត់ និងឡើងរេញបានច្រើនដូចអំឡុងពេលមុនប៉ុណ្ណោះ ។ លោកថា សំណង់ក្នុងមួយថ្ងៃយ៉ាងហោចណាស់ក៏បាន២ម៉ឺនរៀលដែរហើយបើធ្វើជាមួយមេល្អៗ គឺបាន២៥.០០០ទៅ២៨.០០០រៀល ដែលជាចំនួនគួរសមផងដែរ នៅពេលធ្វើបានជាប់លាប់ហើយមិនសូវឈប់ឱ្យមេកាត់លុយ ។
លោកថា ការប្រដាល់ខ្លួននៅតែស្រឡាញ់តែបើឱ្យឡើងប្រដាល់ហើយត្រូវខ្ចីលុយគេដើម្បីបំប៉នខ្លួនហ្វឹកហាត់ លោកថា ជារឿងពិបាករបស់ជីវភាព ។ លោកថា ខ្លួនត្រូវរកប្រាក់ឱ្យបានរាល់ថ្ងៃក្នុងពេលតម្រូវការលើម្ហូបអាហារ ថ្លៃផ្ទះជួល និងការចំណាយលើភរិយាដែលមិនអាចចេះតែពីបំពេញបំណងចង់ប្រដាល់ ហើយឱ្យប្រពន្ធកូនដាច់បាយទៀតទេ ។ លោកថា ក្នុងពេលប្រឡូកប្រដាល់ជាប្រចាំ លោកថាពេលខ្លះប្រឈមនឹងការខ្វះខាតច្រើនដោយសារតែប្រដាល់ដ្បិតថាបានលុយ៣០ម៉ឺនទៅ៤០ម៉ឺនរៀល ប៉ុន្តែហុចលិចហុចកើតគឺសល់ដល់ផ្ទះតែប្រមាណ២០ម៉ឺនរៀលក្នុងមួយលើក ហើយមិនដែលរួចផុតពីឈឺខ្លួននោះទៅទៀត ។ ក្រៅពីអាជីពសំណង់ លោកត្រូវឆ្លៀតជួយកិច្ចការផ្ទះទៀតទើបលោកបញ្ជាក់ថា វាពិបាកបើលោកចប់ម៉ោងសំណង់ហើយទៅហ្វឹកហាត់ដើម្បីឡើងរេញ ។
កីឡាករ អន ឈុនហេង អាចនឹងត្រូវបាត់មុខពីការប្រដាល់តាមលំនាំកីឡាករផ្សេងៗ ដោយសារតែយោងតាមហេតុផលជាប់រវល់ធ្វើសំណង់មិនមានពេលបង្កើនសមត្ថភាពក្នុងការហ្វឹកហាត់ផង និងវ័យកាន់តែច្រើនផង ។ លោកគឺជាកីឡាករប្រដាល់សេរី និងប្រដាល់ដាក់ទ្រុងមានកេរ្តិ៍ឈ្មោះបោះសំឡេងទើបមានការសោកស្ដាយប្រសិនបើធនធានកីឡាកររូបនេះត្រូវបានបាត់បង់ពីក្នុងពិភពប្រដាល់ ។ លោកថា ជារឿងពិបាកដែលលោកឡើងប្រដាល់ហើយពេលបរាជ័យក៏ត្រូវអ្នកទស្សនារិះគន់ ។ អ្នកគាំទ្រមិនដឹងពីស្ថានភាពលំបាករបស់កីឡាករម្នាក់ៗនោះទេដោយដឹងតែពីថា ប្រកួតមិនកើត ឡើងរេញមិនហាត់ វ៉ៃលក់ខ្លួន ឬប្រកួតដូរបាយប៉ុណ្ណោះ អ៊ីចឹងហើយទើបលោកនឿយណាយនឹងការប្រដាល់ ហើយសឹងតែបាត់មុខទាំងស្រុងនៅក្នុងពេលនេះ ។
ទោះបីយ៉ាងណាលោកក៏អះអាងថា នឹងនៅតែបន្តឡើងប្រដាល់មិនថាប្រដាល់នៅលើកញ្ចក់ទូរទស្សន៍ និងប្រដាល់ដាក់ទ្រុងឱ្យតែមានការអញ្ជើញ ដើម្បីរំលឹកក្បាច់គុនផង និងដើម្បីកុំឱ្យមហាជនភ្លេចមុខផង ។ លោកមិនមានគម្រោងថា លាឈប់ពីការប្រដាល់នោះទេ បើទោះជាស្ថានភាពក្នុងការឡើងរេញបានផ្ដល់សម្ពាធឱ្យលោកកាន់តែច្រើនទៅៗស្របគ្នាដែលភរិយាក៏លែងគាំទ្រ ។ លោកនិយាយថា លោកមិនចង់ឮពាក្យឡើងប្រដាល់ដូរបាយនោះទេ ទើបលោកសម្រេចចិត្តមិនទទួលឡើងរេញក្នុងពេលលោកក៏មិនមានពេលហ្វឹកហាត់គ្រប់គ្រាន់ក្នុងការបំប៉នសមត្ថភាព ។ លោកទទូចកុំឱ្យមហាជនរិះគន់អ្នកប្រដាល់ធា្លក់ដៃដោយសារតែភាពជាក់ស្ដែង គឺអ្នកប្រដាល់ដែលខ្វះសមត្ថភាពរឹងមាំ គឺសុទ្ធតែលំបាកដូចជាលោកជាដើម ៕
ចែករំលែកព័តមាននេះ