រាជធានីភ្នំពេញ ៖ ដើម្បីដោះស្រាយបញ្ហាផលិតផល និងទីផ្សារនៅក្នុងវិស័យកសិកម្ម ក្រសួងកសិកម្ម និងស្ថាប័នពាក់ព័ន្ធគ្រោងនឹងបង្កើតតំបន់សេដ្ឋកិច្ចពិសេសសម្រាប់វិស័យកសិកម្ម ដើម្បីកែច្នៃផលិតផលកសិកម្ម និងដោះស្រាយទីផ្សារជូនប្រជាកសិករ ។
មន្ត្រីតំណាងក្រសួងកសិកម្ម រុក្ខាប្រមាញ់ និងនេសាទ លោកស្រី វុទ្ធី បានឱ្យដឹងកាលពីពេលថ្មីៗនេះថា ក្រសួងកសិកម្ម និងអាជ្ញាធរពាក់ព័ន្ធបានសហការគ្នាចុះត្រួតពិនិត្យដោះស្រាយបញ្ហាទីផ្សារជូនកសិករ ។ ចំណុចគន្លឹះសំខាន់សម្រាប់ដោះស្រាយបញ្ហាទីផ្សារកសិកម្មនេះ ក្រសួងបានរៀបចំកិច្ចប្រជុំជាមួយសហព័ន្ធស្រូវអង្ករ និងវិស័យឯកជន ។ ក្រសួងបានលើកឡើងនូវចំណុចគន្លឹះសំខាន់ធ្វើម៉េចឱ្យកើតចេញនូវតំបន់សេដ្ឋកិច្ចពិសេសសម្រាប់វិស័យកសិកម្ម ។
តំណាងរូបនេះបញ្ជាក់ថា ៖ « ការជំរុញការធ្វើតំបន់សេដ្ឋកិច្ចពិសេសសម្រាប់កែច្នៃផលិតផលកសិកម្ម គឺជាចំណុចគ្រឹះដែលយើងដោះស្រាយបញ្ហាទីផ្សារ ។ ឥឡូវនេះ ក្រសួងកសិកម្មបានចុះ MOU ជាមួយក្រុមហ៊ុនធំមួយរបស់ចិន ដើម្បីបង្កើតតំបន់សេដ្ឋកិច្ចពិសេសនៅខេត្តកំពង់ស្ពឺ ដោយដំណើរការកែច្នៃ ហើយផលិតផលកសិកម្មទាំងអស់នឹងបុកទៅរកការកែច្នៃនៅតំបន់នោះដើម្បីសម្រួលពាណិជ្ជកម្ម និងការនាំចេញផលិតផលកសិកម្ម » ។
លោកស្រី វុទ្ធី បន្តថា ៖ «យើងសង្ឃឹមថា ទីផ្សារប្រទេសចិននឹងអាចស្រូបយកទំនិញកសិផលយើងបានច្រើន ក្រោយពេលអនុវត្តពិធីសារចំនួន៤ ដែលបានចុះហត្ថលេខារួចហើយរវាងកម្ពុជា និងចិន ។ ពិធីសារទាំងនោះពាក់ព័ន្ធនឹងអង្ករ ពោត ចេក និងដំឡូងមី ។ ទៅមុខទៀត យើងអាចបើកច្រកកសិផលនេះទៅកាន់ទីផ្សារចិន ។ ដោយឡែក ទីផ្សារកូរ៉េ យើងធ្វើប្រូតូកូលជាមួយកូរ៉េ គឺនាំចេញផ្លែស្វាយ » ។
លោកសង្កត់ធ្ងន់ថា ការងារអភិវឌ្ឍន៍វិស័យកសិកម្ម គឺត្រូវចាប់យកនូវកាលានុវត្តភាពនេះឱ្យបាន ជាពិសេស ធ្វើឱ្យកម្ពុជាមានឧត្តមភាពប្រកួតប្រជែងទីផ្សារក្នុងស្រុក និងការនាំចេញទីផ្សារកសិកម្មនៅក្នុងតំបន់ និងពិភពលោក ព្រមទាំងកាត់បន្ថយការនាំចូលពីបរទេស ។ លើសពីនេះទៀត ដើម្បីទ្រទ្រង់កំណើនសេដ្ឋកិច្ច សន្តិសុខស្បៀង និងជំរុញការអភិវឌ្ឍសេដ្ឋកិច្ចជនបទ ជាពិសេស ការផ្សារភ្ជាប់គោលនយោបាយថវិកាក្នុងការកែទម្រង់ហិរញ្ញវត្ថុសាធារណៈរបស់រាជរដ្ឋាភិបាល ក្រសួងបានអនុវត្តនូវយុទ្ធសាស្ត្រ និងកម្មវិធីអាទិភាពធំៗចំនួន៥ សម្រាប់ការអភិវឌ្ឍវិស័យគឺ ១-ការបង្កើនផលិតភាពកសិកម្ម ២-ជំរុញការធ្វើពាណិជ្ជកម្មសត្វ និងសុខភាពសត្វ ៣-ការគ្រប់គ្រងជលផលប្រកបដោយចីរភាព ៤-ការគ្រប់គ្រងធនធានព្រៃឈើប្រកបដោយចីរភាព និង៥-ការពង្រឹងស្ថាប័នបង្កើននូវសមត្ថភាព សេវាកម្មគាំទ្រ ការអភិវឌ្ឍធនធានមនុស្សនៅក្នុងវិស័យកសិកម្ម ។
ក្រសួងកសិកម្ម រុក្ខាប្រមាញ់ និងនេសាទបាននិងកំពុងបន្តអនុវត្តយ៉ាងសកម្មនូវកម្មវិធីកំណែទម្រង់ស៊ីជម្រៅវិស័យព្រៃឈើ ជលផលក៏ដូចជាកំណែទម្រង់ដីធ្លី ដែលជាមូលដ្ឋានគ្រឹះអាទិភាពមួយក្នុងយុទ្ធសាស្ត្រចតុកោណដំណាក់កាលទី៣ របស់រាជរដ្ឋាភិបាលកម្ពុជា ។ លើសពីនេះ រាជរដ្ឋាភិបាលបានដាក់ចេញនូវគោលនយោបាយអភិវឌ្ឍន៍ឧស្សាហកម្មកម្ពុជា ឆ្នាំ២០១៥-២០២៥ ដែលមានគោលដៅសំខាន់ពាក់ព័ន្ធនឹងវិស័យកសិកម្ម ដោយជំរុញការនាំចេញទំនិញកែច្នៃកសិកម្មឱ្យបានដល់១២% នៃបរិមាណនាំចេញសរុបនៅឆ្នាំ២០២៥ ៕
ចែករំលែកព័តមាននេះ