រាជធានីភ្នំពេញ ៖ ស្របពេលនិន្នាការភ្ញៀវទេសចរវ័យចំណាស់ និងចូលនិវត្តន៍កើនឡើងនៅទូទាំងពិភពលោក ប្រទេសកម្ពុជាកំពុងចាប់ផ្តើមរៀបចំយុទ្ធសាស្ត្រដើម្បីទាក់ទាញភ្ញៀវទេសចរប្រភេទនេះឲ្យបានកាន់តែច្រើន ។
លោក ថោង ខុន រដ្ឋមន្ត្រីក្រសួងទេសចរណ៍បានថ្លែងនៅព្រឹកថ្ងៃទី២ មករា ថា បច្ចុប្បន្នមនុស្សចាស់ៗចូលចិត្តដើរលេងច្រើនខុសពីពេលមុន ដែលពួកគាត់និយមស្នាក់នៅផ្ទះ ។ ប៉ុន្តែពេលនេះពួកគាត់ចាប់ផ្តើមចេញដើរកម្សាន្តនៅក្រៅប្រទេស ។ ហេតុនេះ ក្រសួងបាននិងកំពុងធ្វើយ៉ាងណា ទាក់ទាញភ្ញៀវទេសចរប្រភេទនេះឲ្យបានច្រើនតាមរយៈការវិនិយោគផ្ទះទី២ ឬផ្ទះស្នាក់សម្រាប់មនុស្សចាស់ ។
លោកបន្តថា ៖ « និន្នាការភ្ញៀវទេសចរប្រភេទនេះកំពុងកើនឡើងនៅទូទាំងពិភពលោក ដែលប្រទេសនានាបាននិងកំពុងចាប់អារម្មណ៍ទាក់ទាញយកភ្ញៀវទេសចរប្រភេទនេះ ព្រោះជាភ្ញៀវស្នាក់នៅយូរ និងចំណាយប្រាក់ច្រើន។ បច្ចុប្បន្ន កម្ពុជាកំពុងរៀបចំខ្លួនជាបណ្តើរៗ និងរៀបចំហេដ្ឋារចនាសម្ព័ន្ធដើម្បីទាក់ទាញភ្ញៀវទេសចរចូលនិវត្តន៍ និងទេសចរវ័យចំណាស់ មកស្នាក់នៅកម្ពុជាឲ្យបានច្រើន » ។
លោក ហ៊ិន សុជាតិ ប្រធានផ្នែកអភិវឌ្ឍន៍អាជីវកម្មនៃក្រុមហ៊ុន A2A Town Cambodia ដែលបាននិងកំពុងវិនិយោគរមណីយដ្ឋាន V Kirirom Pine Resort នៅលើឧទ្យានជាតិព្រះកុសុមៈគិរីរម្យ ថ្លែងថា ក្រុមហ៊ុនលោកមានគោលដៅធ្វើការអភិវឌ្ឍរមណីយដ្ឋាន សម្រាប់មនុស្សចាស់ និងអ្នកទេសចរចូលនិវត្តន៍ ដោយសារទីតាំងរមណីយដ្ឋាននេះមានភាពស្រដៀងគ្នានឹងតំបន់មួយចំនួននៅប្រទេសជប៉ុន ។ ប៉ុន្តែទោះជាយ៉ាងណា រមណីយដ្ឋាននេះទាក់ទាញភ្ញៀវទេសចរជាតិ និងអន្តរជាតិមានកម្រិតនៅឡើយ ជាពិសេស ទេសចរចូលនិវត្តន៍ ។
លោកបន្តថា ៖ « យើងមានបំណងធ្វើយ៉ាងណា ឲ្យភ្ញៀវទេសចរមកស្នាក់នៅទីនេះមានអារម្មណ៍ថា ទីនេះជាផ្ទះទី២របស់ពួកគេ តាមរយៈការសាងសង់ផ្ទះតង់ ផ្ទះបែបខ្មែរ ផ្ទះប្រអប់ និងវីឡាប្រណីតជាច្រើនប្រភេទទៀត។ យើងរំពឹងថា ចំនួនភ្ញៀវទេសចរវ័យចំណាស់ និងចូលនិវត្តន៍មកទស្សនាកម្ពុជាកាន់តែច្រើន និងមកសម្រាកលំហែនៅភោជនីយដ្ឋាននេះកាន់តែច្រើននាពេលអនាគត » ។
លោក ធួន ស៊ីណាន ប្រធានសហព័ន្ធទេសចរណ៍កម្ពុជា ថ្លែងថា កម្ពុជាមានឱកាស និងសក្តានុពលច្រើនដើម្បីទាក់ទាញភ្ញៀវទេសចរចូលនិវត្តន៍ និងទេសចរណ៍វ័យចំណាស់ ហើយអ្វីដែលរាជរដ្ឋាភិបាលបានរក្សាទុក និងរៀបចំគោលនយោបាយដើម្បីរៀបចំផ្ទះទី២ជាការប្រសើរ ដោយសារកម្ពុជានៅមានកន្លែងច្រើនសម្រាប់ទាក់ទាញ និងមានកម្លាំងពលកម្មច្រើនដើម្បីធ្វើការងារនេះ ។
លោកបន្តថា ៖ « ដើម្បីធ្វើការទាក់ទាញភ្ញៀវទេសចរបែបនេះឲ្យបានច្រើន ទាមទារឲ្យមានការវិនិយោគពីវិស័យឯកជនដើម្បីផ្តល់កន្លែងស្នាក់នៅដល់ភ្ញៀវទេសចរប្រភេទនេះ។ ប៉ុន្តែដើម្បីទាក់ទាញការវិនិយោគបន្ថែម ក៏ទាមទារឲ្យរាជរដ្ឋាភិបាលមានគោលនយោបាយលើកទឹកចិត្តផ្នែកឯកជន តាមរយៈការធ្វើយ៉ាងណា ឲ្យបរិយាកាសវិនិយោគកាន់តែមានភាពល្អប្រសើរផងដែរ » ។
លោក ធួន ស៊ីណាន បន្ថែមថា ទោះជាយ៉ាងណា ការចំណាយនៅកម្ពុជាមានតម្លៃថ្លៃ បើធៀបជាមួយប្រទេសជិតខាង ។ ធនធានមនុស្សរបស់កម្ពុជាលើផ្នែកនេះ ក៏ទាមទារឲ្យមានការបណ្តុះបណ្តាលឲ្យបានល្អផងដែរ ព្រោះទេសចរណ៍វ័យចំណាស់ និងទេសចរណ៍ចូលនិវត្តន៍ ត្រូវការសេវាថែទាំប្រកបដោយវិជ្ជាជីវៈមានភាពល្អប្រសើរផងដែរ ។ ហេតុនេះ ក្រសួងការងារគួរតែចូលរួមបណ្តុះបណ្តាលធនធានមនុស្សលើជំនាញផ្នែកនេះឲ្យបានទូលំទូលាយបន្ថែមទៀត ៕
ចែករំលែកព័តមាននេះ