អេស្បាញ និងប្រេស៊ីល ប្រកាសពីអ្នកស្លា.ប់ម្នាក់ៗដោយសារជំងឺអ៊ុតស្វា (Monkeypox) ដែលជាករណីស្លា.ប់ដំបូងបង្អស់ទាក់ទងនឹងការផ្ទុះជំងឺឆ្លងដ៏សាហាវនេះដែលចាប់ផ្តើមនៅដើមខែឧសភា។
អេស្បាញជាប្រទេសមួយរងគ្រោះខ្លាំងជាងគេពីជំងឺអ៊ុតស្វា ដោយមានករណីឆ្លងសរុបចំនួន ៤.២៩៨។ នេះបើយោងតាមមជ្ឍមណ្ឌលសម្របសម្រួល និងសង្គ្រោះបន្ទាន់របស់ក្រសួងសុខាភិបាល។
មជ្ឍមណ្ឌលនេះនិយាយកាលពីថ្ងៃសុក្រ ទី ២៩ កក្កដាថា ក្នុងចំណោមអ្នកជំងឺ ៣.៧៥០នាក់ដែលមានព័ត៌មាន មាន ១២០នាក់ត្រូវបានបញ្ជូនទៅកាន់មន្ទីរពេទ្យ និងមួយករណីស្លា.ប់។ ចំណែកនៅប្រេស៊ីលវិញ អ្នកស្លា.ប់ជាបុរសមានវ័យ ៤១ឆ្នាំ។
ក្រសួងសុខាភិបាលប្រទេសនេះបញ្ជាក់ថា អ្នកជំងឺមានជំងឺមហារីកកូនកណ្តុរ និងប្រព័ន្ធភាពស៊ាំចុះខ្សោយ។ ក្រសួងរកឃើញការឆ្លងជំងឺអ៊ុតស្វាសរុបជិត ១.០០០ករណី ដែលភាគច្រើនកើតនៅក្នុងរដ្ឋ Sao Paulo និង Rio de Janeiro។
សូមបញ្ជាក់ថា កាលពីពេលថ្មីៗនេះ អង្គការសុខភាពពិភពលោកបានប្រកាសគ្រោះអាសន្នពីការផ្ទុះវីរុសអ៊ុតស្វា ដោយវាបានឆ្លងរីករាលដាលជាង ២០.៣០០ករណីក្នុងប្រទេសជាង ៧០ជុំវិញពិភពលោក រួមទាំងកម្ពុជាយើងផងដែរ៕ (យោងតាមប្រភព៖ Aljazeera)
ចែករំលែកព័តមាននេះ