កូរ៉េខាងជើងរកមិនឃើញករណីជំងឺគ្រុនក្តៅថ្មីជាលើកដំបូងនៅថ្ងៃសៅរ៍ ទី ៣០ ខែកក្កដានេះ ចាប់តាំងពីរបបកុម្មុយនីស្តនេះទទួលស្គាល់ពីការផ្ទុះកូវីដនៅពាក់កណ្តាលខែឧសភា។ នេះបើយោងតាមការរាយការណ៍របស់ប្រព័ន្ធផ្សព្វផ្សាយរដ្ឋ។
ប្រទេសផ្តាច់ការនេះបាននិយាយកាលពីដើមខែកក្កដាថា ខ្លួនកំពុងស្ថិតនៅលើផ្លូវឆ្ពោះទៅរកការបញ្ចប់វិបត្តិកូវីដ ១៩ ខណៈដែលប្រទេសជិតខាងរបស់ខ្លួនរងការវា.យប្រហារពីរលកឆ្លងថ្មីដែលជំរុញដោយវីរុសបំលែងថ្មី Omicron។
ប្រព័ន្ធផ្សព្វផ្សាយរដ្ឋ KCNA បាននិយាយថា ៩៩,៩៩ភាគរយនៃអ្នកជំងឺគ្រុនក្តៅចំនួន ៤,៧៧លាននាក់ បានជាសះស្បើយ ប៉ុន្តែដោយសារតែខ្វះការធ្វើតេស្តជាក់ស្តែង វាមិនបានបង្ហាញពីតួលេខណាមួយអំពីអ្នកធ្វើតេស្តឃើញវិជ្ជមាននោះទេ។
ទោះយ៉ាងណា អ្នកជំនាញជំងឺឆ្លងមានការសង្ស័យចំពោះការអះអាងរបស់កូរ៉េខាងជើង ដោយអង្គការសុខភាពពិភពលោក (WHO) និយាយកាលពីខែមុនថា ខ្លួនជឿជាក់ថា ស្ថានភាពនៅកូរ៉េខាងជើងកាន់តែអាក្រក់ទៅៗ មិនប្រសើរឡើង ចំពេលគ្មានទិន្នន័យឯករាជ្យ។
អ្នកវិភាគនិយាយថា ការប្រកាសជោគជ័យរបស់ទីក្រុងព្យុងយ៉ាងប្រឆាំងនឹងកូវីដ ១៩ គឺអាចជាផែនការក្នុងការស្តារពាណិជ្ជកម្មឡើងវិញដែលត្រូវបានបំផ្លាញដោយសារការរាតត្បាត។
សូមរម្លឹកថា កាលពីដើមឆ្នាំនេះ កូរ៉េខាងជើងបានបន្តប្រតិបត្តិការដឹកជញ្ជូនតាមរថភ្លើងបណ្តោះអាសន្នជាមួយនឹងប្រទេសចិន ប៉ុន្តែបានផ្អាកជាថ្មីនៅក្នុងខែមេសា ដោយសារភ័យខ្លាចការរាតត្បាតរបស់កូវីដ ១៩៕ (យោងតាមប្រភព៖ Reuters)
ចែករំលែកព័តមាននេះ