រាជធានីភ្នំពេញ ៖ នារីម្នាក់ដោយខឹងសង្សារក្បត់ចិត្តភ្ជាប់ពាក្យជាមួយស្រីផ្សេង ក៏បានទូរស័ព្ទណាត់ពួកគេទាំងនាក់ជួបគ្នា ហើយយកទឹកអាស៊ីតចាក់លើសង្សារនិងគូដណ្តឹងនោះ បណ្តាលឱ្យរលាករលះរលួយ ហើយភ្លាមៗត្រូវសមត្ថកិច្ចឃាត់ខ្លួនបាន ដែលហេតុការណ៍បង្កការភ្ញាក់ផ្អើល កាលពីវេលាម៉ោង០៤ និង៤៥នាទីល្ងាចថ្ងៃ០២ មករា ស្ថិតនៅចំណុចផ្លូវបេតុង ក្នុងភូមិច្រេស
រាជធានីភ្នំពេញ ៖ នារីម្នាក់ដោយខឹងសង្សារក្បត់ចិត្តភ្ជាប់ពាក្យជាមួយស្រីផ្សេង ក៏បានទូរស័ព្ទណាត់ពួកគេទាំងនាក់ជួបគ្នា ហើយយកទឹកអាស៊ីតចាក់លើសង្សារនិងគូដណ្តឹងនោះ បណ្តាលឱ្យរលាករលះរលួយ ហើយភ្លាមៗត្រូវសមត្ថកិច្ចឃាត់ខ្លួនបាន ដែលហេតុការណ៍បង្កការភ្ញាក់ផ្អើល កាលពីវេលាម៉ោង០៤ និង៤៥នាទីល្ងាចថ្ងៃ០២ មករា ស្ថិតនៅចំណុចផ្លូវបេតុង ក្នុងភូមិច្រេស សង្កាត់ភ្នំពេញថ្មី ខណ្ឌសែនសុខ ។
នារីដៃដល់ខាងលើឈ្មោះប៉ែត សេរីរ័ត្ន អាយុ២៥ឆ្នាំ ស្នាក់នៅភូមិច្រេស សង្កាត់ភ្នំពេញថ្មី ខណ្ឌសែនសុខ ។ រីឯជនរងគ្រោះឈ្មោះ គា សំណាង ភេទប្រុស អាយុ២៥ឆ្នាំ ជាជាងដែក ស្នាក់នៅភូមិទួលសង្កែ សង្កាត់ទួលសង្កែ ខណ្ឌឬស្សីកែវ និងម្នាក់ទៀតជាគូដណ្តឹងស្រីឈ្មោះសាន សុខា អាយុ១៨ឆ្នាំ ជាសិស្សសាលាវិចិត្រសិល្បៈ ស្នាក់នៅភូមិទួលសង្កែ សង្កាត់ទួលសង្កែ ខណ្ឌប្ញស្សីកែវ ត្រូវជាគូដណ្តឹង ។
យោងតាមរបាយការណ៍របស់សមត្ថកិច្ចឱ្យដឹងថា កាលដើមឡើយ ជនរងគ្រោះជាបុរសធ្លាប់មានទំនាក់ទំនងស្នេហាជាមួយនារីសង្ស័យនេះ ជាយូរឆ្នាំមកហើយ ។ កាលពីខែតុលា បុរសរងគ្រោះ (ជាអតីតសង្សារ) បានលបទៅភ្ជាប់ពាក្យជាមួយនារីម្នាក់ទៀតដែលជាជនរងគ្រោះឈ្មោះសាន សុខា ធ្វើឱ្យនារីសង្ស័យមានការគ្រាំគ្រាចិត្ត រហូតគុំគួនជាមួយអ្នកទាំងពីរនាក់នោះ រហូតដល់ថ្ងៃកើតហេតុ ត្រូវនារីសង្ស័យបានទូរសព្ទ័ទៅជនរងគ្រោះ ដែលជាសង្សារ ។
ពេលនោះ ជនរងគ្រោះបុរសបានប្រាប់ថា រូបគេកំពុងនៅជាមួយគូដណ្ដឹង នៅឯសង្កាត់គោករកា ខណ្ឌព្រែកព្នៅ ស្រាប់តែនារីសង្ស័យ បានជិះម៉ូតូឌុបពីផ្ទះជួលរបស់គេ ស្កាត់ទៅជួបជនរងគ្រោះទាំងពីរនាក់ ហើយបានធ្វើល្បិចឱ្យជនរងគ្រោះឌុបរូបគេត្រលប់ទៅផ្ទះរបស់គេវិញ ។ ពេលនោះ ជនរងគ្រោះដែលជាគូដណ្តឹងនោះ មិនបានដឹងថា ជនសង្ស័យធ្លាប់មានទំនាក់ទំនងស្នេហាជាមួយគ្នានោះទេ នាងស្មានថា ជាមិត្តភក្ដិរបស់គូដណ្ដឹងខ្លួន ទើបព្រមអោយឌុបជូនត្រលប់ទៅផ្ទះរបស់គេ ។
ខណៈពេលជិះតាមផ្លូវដល់កន្លែងកើតហេតុ ស្រាប់តែជនសង្ស័យដកដបដែលដាក់ទឹកអាស៊ីត ដែលទុកក្នុងកាបូបស្ពាយចំហៀងរបស់នាងនោះ មកស្រោចពីលើក្បាលនារីរងគ្រោះ ហើយពេលនោះទឹកអាស៊ីតបានខ្ទាតទៅប៉ះជនរងគ្រោះ ដែលជាអ្នកឌុបផងដែរបណ្ដាលឱ្យដួលម៉ូតូ ដោយសារតែទឹកអាស៊ីតធ្វើឱ្យក្ដៅពេញរាងកាយរបស់អ្នកទាំងបីនាក់ ធ្វើឲ្យពួកគេរត់សំដៅទៅចូលក្នុងទឹកដែលនៅក្បែរនោះ បានស្រែកឆោឡោផ្អើលអ្នកភូមិម្ដុំនោះចេញមកមើល និងរាយការណ៍ទៅសមត្ថកិច្ចមូលដ្ឋានឱ្យចុះមកអន្តរាគមន៍ និងឃាត់ខ្លួនជនសង្ស័យយកទៅសាកសួរ និងកសាងសំណុំរឿងបញ្ជនទៅកាន់តុលាការ រង់ចាំការចាត់ការណ៍តាមនីតិវិធី ។ ចំណែកជនរងគ្រោះទាំងពីរនាក់វិញ ត្រូវបានក្រុមគ្រួសាររបស់គេដឹកយកទៅសង្គ្រោះ នៅមន្ទីរពេទ្យព្រះកុសុមៈ ៕
ចែករំលែកព័តមាននេះ