រាជធានីភ្នំពេញ ៖ តារាចម្រៀងកញ្ញាខេមរៈ ស្រីពៅ បានចេញមុខប្រកាសការធូរស្បើយពីជំងឺបន្ទាប់ពីនាងបាត់មុខមួយរយៈពេលវែង ក្រោមព័ត៌មានប្រតិកម្មស្បែកយ៉ាងធ្ងន់។
ខណៈខេមរៈ ស្រីពៅ បាត់មុខឈឹងពីអាជីពសិល្បៈចម្រៀងដោយមិនដឹងមូលហេតុច្បាស់លាស់ នោះមានការអះអាង ផ្សេងៗគ្នា ។
ទើបតែពេលនេះកញ្ញាខេមរៈ ស្រីពៅ ចេញមុខដោយផ្ទាល់ និងអះអាងថានាងធូរស្បើយពីជំងឺហើយ ក្នុងនោះនាងបានថ្លែងអរគុណដល់ប្រិយមិត្តអ្នកគាំទ្រនាងដែលជួយបន់ស្រន់ឲ្យរូបនាងឆាប់ជាពីជំងឺ ។
វីដេអូឃ្លីបរបស់ខេមរៈ ស្រីពៅ បង្ហោះតាមហ្វេសប៊ុកឈ្មោះ«ខេមរៈ សិរីមន្ត កម្ពុជា»កាលពី ពេល ថ្មីៗកន្លងមកជាមួយសារដែលសរសេរថា «ប្អូនស្រីរបស់ខ្ញុំបានធូរស្បើយហើយ អរគុណបងប្អូនដែលបានជូនពរប្អូនស្រីខ្ញុំឱ្យជាសះស្បើយកន្លងមក ។ ឆ្នាំថ្មី២០១៧សូមឱ្យបងប្អូនមានសុខភាពល្អសុភមង្គលទាំងអស់គ្នា» ។
តាមរយៈវីដេអូឃ្លីបនោះ ខេមរៈ ស្រីពៅបញ្ជាក់ថាពេលនេះជំងឺរបស់នាងបានធូរស្បើយហើយ ។ នាងអរគុណចំពោះប្រិយមិត្តទាំងអស់ដែលតែងតែយកចិត្តទុកដាក់ទៅលើសុខភាពរបស់នាង ហើយនាងក៏មានការនឹករលឹកដល់ប្រិយមិត្តទាំងអស់គ្នាដែរ ។
តាមរយៈវីដេអូឃ្លីបនោះខេមរៈ ស្រីពៅ មិនបញ្ជាក់ប្រាប់ថានាងមានជំងឺអ្វីពិតប្រាកដទេបើទោះជាមានការអះអាងថានាងប្រតិកម្មស្បែកយ៉ាងធ្ងន់ក៏ដោយ ។ វីដេអូដែលបង្ហោះនោះគេនៅមិនទាន់ប្រាកដនៅឡើយទេថាជាវីដេអូទើបថត ឬក៏ជាវីដេអូចាស់ ដ្បិតមិនទាន់មានការបំភ្លឺពីក្រុមគ្រួសាររបស់នាងនៅឡើយ ។
បន្ទាប់ពីវីដេអូឃ្លីបនោះបង្ហោះរួចមក មានប្រិយមិត្តជាច្រើនបានសម្តែងការអបអរសាទរនិងជូនពរដល់ខេមរៈ ស្រីពៅ ក្នុងនោះក៏មានការចង់ឃើញវត្តមានរបស់នាងច្រៀងតាមឆាកតន្ត្រីនានាឡើងវិញផងដែរ ។
ខេមរៈ ស្រីពៅ បានចូលប្រឡូកក្នុងវិស័យសិល្បៈចម្រៀងតាំងពីឆ្នាំ២០០៧មកម្ល៉េះដោយនាងត្រូវគេស្គាល់តាមរយៈផលិតកម្មU2 និងចុងក្រោយមកនៅផលិតកម្មសាន់ដេ ។ កន្លងមកតារាចម្រៀងសម្បុរស្រអែមត្រកូលខេមរៈរូបនេះមិនធ្លាប់មានរឿងអាស្រូវពាក់ព័ន្ធនឹងស្នេហាឡើយព្រោះតែទៅណាមកណាគឺបានតាមស្អិតជាមួយបងប្រុសនាងតារាចម្រៀងលោកខេមរៈ សិរីមន្ត ។
គេសង្កេតឃើញថាបើទោះបីជានៅក្នុងផលិតកម្មសាន់ដេមានតារាចម្រៀងស្រី ល្បីៗដូចជា កញ្ញាសុខ ពិសី និងកញ្ញាអុីវ៉ា ហាក់លេចធ្លោនាំមុខគេក៏ដោយ ប៉ុន្តែខេមរៈ ស្រីពៅ នៅតែមានលំនឹង និងឈរយ៉ាងរឹងមាំនៅក្នុងផលិតកម្មមួយនេះ ៕
ចែករំលែកព័តមាននេះ