យោងតាម YONHAP ថា នៅមុខក្រុមអ្នកកាសែតកាលពីថ្ងៃទី១ មករា នៅឯកន្លែងបញ្ចុះសពជាតិក្រុងសេអ៊ូលអតីតប្រធានាធិបតីកូរ៉េខាងត្បូង លោក LEE MYUNG BAK បានបង្ហាញពីចេតនារបស់លោកចាកចេញពីគណបក្ស
យោងតាម YONHAP ថា នៅមុខក្រុមអ្នកកាសែតកាលពីថ្ងៃទី១ មករា នៅឯកន្លែងបញ្ចុះសពជាតិក្រុងសេអ៊ូលអតីតប្រធានាធិបតីកូរ៉េខាងត្បូង លោក LEE MYUNG BAK បានបង្ហាញពីចេតនារបស់លោកចាកចេញពីគណបក្ស SAENURI កំពុងកាន់អំណាចនាដើមឆ្នាំ២០១៧នេះ ដើម្បីសម្តែងពីជំហរច្បាស់របស់លោក ។
លោក LEE ក៏ពោលដែរថា លោកពុំគ្រោងបង្កើតគណបក្សថ្មីមួយ ឬក៏ទៅចូលរួមជាមួយពួកអ្នកបំបែកខ្លួនចេញពីគណបក្ស ដើម្បីបង្កើតគណបក្សនយោបាយថ្មីមួយនាដំណាច់ខែមករា ដែរ ។ លោកមានប្រសាសន៍ថា ខ្ញុំគ្រាន់តែចង់ចាកចេញ តែបែបនេះអាចលើកទឹកចិត្តអ្នកឯទៀតៗឱ្យចាកចេញដែរ ។ អាស្រ័យហេតុនេះ ខ្ញុំគ្រោងចាកចេញពីគណបក្សនាដើមឆ្នាំតែម្តង ។
លោក LEE ដែលទៅគោរពវិញ្ញាណក្ខន្ធអ្នកនយោបាយសំខាន់ៗ ដែលបានចែកឋាននៅឯកន្លែងបញ្ចុះសពស្ថិតនៅភាគខាងត្បូងនៃក្រុងសេអ៊ូលបន្តថា ខ្ញុំគិតថា ក្នុងឋានៈជាអតីតប្រធានាធិបតីមួយរូបខ្ញុំបានខិតខំច្រើនគួរសមក្នុងនាមជាសមាជិកគណបក្ស ។ ការចាកចេញរបស់ខ្ញុំសំដៅលុបបំបាត់ចោលបណ្តាការសង្ស័យខាងនយោបាយ ។ លោកក៏សង្ឃឹមដែរថា បណ្តាអ្នកនយោបាយ ទោះបីមានមនោគមន៍វិជ្ជាបែបណាត្រូវសន្យាបំពេញបណ្តាសកម្មភាពនយោបាយដោយស្មោះត្រង់ ដើម្បីអាចបម្រើពលរដ្ឋ ។
លោក CHUNG WOO TAIK ប្រធានក្រុមសមាជិកសភាគណបក្ស SAENURI ក្នុងសភាជាតិបានសម្តែងការខកចិត្តក្រោយការប្រកាសចាកចេញរបស់លោក LEE តែលោកនិយាយថា ការចាកចេញនោះនឹងពុំមានផលប៉ះពាល់ជាអវិជ្ជមានលើគណបក្សអភិរក្សនិយមនេះឡើយ ។
កាលពីសប្តាហ៍មុន សមាជិកសភាគណបក្សនោះប្រមាណជា៣០រូប ដែលចង់ឱ្យលោកស្រីប្រធានាធិបតី PARK GEUN HYE ចាកចេញពីតំណែងបានសម្រេចចាកចេញពីគណបក្ស SAENURI ដើម្បីបង្កើតគណបក្សថ្មីមួយនាថ្ងៃទី២៤ មករា ខាងមុខនេះ ដែលគណបក្សថ្មីនោះមានឈ្មោះបណ្តោះអាសន្នថា គណបក្សអភិរក្សនិយមថ្មីដើម្បីការកែទម្រង់ ៕
ចែករំលែកព័តមាននេះ