រាជធានីភ្នំពេញ ៖ ណាហ្គាវើល រៀបចំកម្មវិធីស្វាគមន៍ឆ្នាំថ្មី ២០១៧ ប្រមូលផ្តុំដោយកំពូលតារាចម្រៀង និងសិល្បករ សិល្បការិនីកម្ពុជាជាច្រើនរូប រួមគ្នាបង្កើតបរិយាកាសដ៏កក្រើក និងអស្ចារ្យមិនអាចបំភ្លេចបាន កាលពីរាត្រីថ្ងៃទី៣១ ធ្នូ ។ ពិធីជប់លៀងរាត្រីសមោសរនេះ ប្រារព្ធឡើងក្នុងបរិយាកាសបែបទសវត្សរ៍ឆ្នាំ ១៩២០ ដែលមានការច្រៀង សម្តែងផ្ទាល់ ឌីជេ និងការសម្តែងសៀករហ័សកម្ម។
ក្នុងឱកាសចាប់ផ្តើមស្វាគមន៍ឆ្នាំថ្មី២០១៧ ភ្ញៀវកិត្តិយសបានកម្សាន្តជាមួយក្រុមរាំ Sexy Movers និងក្រុម DIP ប្រចាំណាហ្គាវើលជាមួយក្បាច់រាំ Charleston ដែលជាក្បាច់រាំពេញនិយមក្នុងទសវត្សរ៍ឆ្នាំ ១៩២០។ ក្រុមភ្លេង Behi ដែលមាននារីស្រស់ស្អាត៣នាក់មកពីប្រទេសម៉ុងហ្គោលី បានលេងចង្វាក់ភ្លេងដ៏ពីរោះជាមួយឧបករណ៍ភ្លេងប្លែករបស់ពួកគេ។ បន្ថែមលើសពីនេះ មានការសម្តែងសៀករហ័សកម្មពីសាលាសៀករហ័សកម្មកម្ពុជា និងក្រុមកំប្លែងរបស់លោក ខាត់ ចំរើន បានធ្វើឲ្យភ្ញៀវផ្ទុះសំណើចយ៉ាងខ្លាំងជាមួយពាក្យពេចន៍ និងកាយវិការកំប្លែង។
ទន្ទឹមនឹងជិតដល់ពេលទទួលឆ្នាំថ្មី ក្រុមកំពូលតារាចម្រៀងកញ្ញា មាស សុខសោភា, លោក ហេង ពិទូ, អ្នកស្រី ហ៊ឹម ស៊ីវន និងលោក រិន សាវ៉េត បានរួមគ្នាបញ្ចេញសំនៀងដ៏ពីរោះ និងបំពេរអារម្មណ៍ភ្ញៀវក្រោមបរិយាកាសដ៏រីករាយបំផុត។ បន្ទាប់មកក្រុមតារាបានឡើងលើឆាកមុនពេលកណ្តឹងនាឡិកាម៉ោង១២កណ្តាលអធ្រាត្របានរោទ៍ឡើងចូលឆ្នាំ២០១៧ នឹងបានដុតកាំជ្រួច និងបង្ហោះប៉េងប៉ោង។
ចែករំលែកព័តមាននេះ