រាជធានីភ្នំពេញ ៖ នាយកសាខាធនាគារសហពាណិជ្ជ (UCB)ស្ទឹងមានជ័យ លោកថាន់ ច័ន្ទចំរុង បានឱ្យដឹងថា វិស័យហិរញ្ញវត្ថុបានដើរតួយ៉ាងសំខាន់នៅក្នុងកំណើនសេដ្ឋកិច្ច ជាពិសេសការកាត់បន្ថយភាពក្រីក្រ
រាជធានីភ្នំពេញ ៖ នាយកសាខាធនាគារសហពាណិជ្ជ (UCB)ស្ទឹងមានជ័យ លោកថាន់ ច័ន្ទចំរុង បានឱ្យដឹងថា វិស័យហិរញ្ញវត្ថុបានដើរតួយ៉ាងសំខាន់នៅក្នុងកំណើនសេដ្ឋកិច្ច ជាពិសេសការកាត់បន្ថយភាពក្រីក្ររបស់ប្រជាពលរដ្ឋកម្ពុជាប្រមាណ៧០ភាគរយ តាមរយៈការផ្ដល់សេវាកម្មដ៏សម្បូរបែប ធ្វើយ៉ាងណាសម្រួលក្នុងជីវភាពរស់នៅប្រចាំថ្ងៃរបស់ប្រជាពលរដ្ឋ ។
ទន្ទឹមនឹងនេះ លោកបញ្ជាក់ថា ប្រជាពលរដ្ឋដែលមានជីវភាពកម្រិតមធ្យម និងកម្រិតទាបមិនគួរមើលរំលងពីវិស័យមួយនេះឡើយ ។
ការលើកឡើងបែបនេះ បានធ្វើឡើងក្នុងឱកាសដែលលោកបានចូលរួមបើកសម្ពោធសាខាថ្មីរបស់ធនាគារសហពាណិជ្ជសាខាស្ទឹងមានជ័យ កាលពីថ្ងៃទី២៨ ធ្នូ ឆ្នាំ២០១៦កន្លងទៅ ។
លោក ថាន់ ច័ន្ទចំរុង បានបន្ថែមថា ៖ « មកដល់បច្ចុប្បន្ន ប្រជាពលរដ្ឋមានអាយុក្រោម៣០ឆ្នាំបានយល់ដឹងច្រើនពីវិស័យធនាគារ ឬវិស័យហិរញ្ញវត្ថុនេះប្រមាណ៨០% ប៉ុន្តែជាទូទៅ ប្រជាជនដែលមិនទាន់យល់ដឹងពីវិស័យមួយនេះ នៅតែមានឥរិយាបថរក្សាលុយទុកក្នុងស្រោមពូកឬស្រោមខ្នើយនៅឡើយ » ។
បើតាមនាយកសាខាធនាគារសហពាណិជ្ជរូបនេះថា វិស័យហិរញ្ញវត្ថុបានចូលរួមចំណែកយ៉ាងសំខាន់ក្នុងការជួយសម្រួលដល់ជីវភាពរស់នៅរបស់ប្រជាពលរដ្ឋប្រចាំថ្ងៃ ។
ការចូលរួមទាំងនោះ រួមមាន ជួយសម្រួលដល់អ្នកដែលមានតម្រូវការក្នុងការប្រើប្រាស់លុយ ។ ចំណុចនេះមានន័យថា ប្រសិនបើប្រជាពលរដ្ឋមានគំនិតចង់រកស៊ី ប៉ុន្តែខ្វះដើមទុន ដូចនេះអាចរកសេវាធនាគារណាមួយ ដូចជា សេវាកម្ចីសាច់ប្រាក់សម្រាប់រកស៊ី ។ ចំណុចមួយវិញទៀតជួយសម្រួលក្នុងការរក្សាសាច់ប្រាក់របស់ប្រជាពលរដ្ឋឱ្យមានសុវត្ថិភាព តាមរយៈការដាក់ប្រាក់បញ្ញើ និងទទួលបានការប្រាក់ ។
ជាពិសេសវិស័យហិរញ្ញវត្ថុ ដែលរួមមាន ស្ថាប័នមីក្រូហិរញ្ញវត្ថុ ធនាគារពាណិជ្ជ ឬប្រព័ន្ធហិរញ្ញវត្ថុទាំងមូលបានចូលរួមកាត់បន្ថយអតិផរណាផងដែរ ។ ត្រង់ចំណុចនេះ មានន័យថា ប្រជាពលរដ្ឋដែលយល់ដឹងពីវិស័យហិរញ្ញវត្ថុបានយកប្រាក់ទៅផ្ញើនៅធនាគារ បន្ទាប់មកគឺប្រើប្រាស់សេវា អេ ធី អឹម ឬ វីសាកាតផ្សេងៗ ដើម្បីទូទាត់សាច់ប្រាក់ ។
លោកបន្ដថា ការប្រើសេវាកម្មទាំងនេះ បានចូលរួមក្នុងការកាត់បន្ថយបោះពុម្ពលុយ ដែលជាចំណែកធ្វើឱ្យមានអតិផរណា ។ អតិផរណានេះហើយជាចំណែកធ្វើឱ្យប្រជាពលរដ្ឋចំណាយលុយកាន់តែច្រើន ក្នុងការបំពេញតម្រូវការតាមរយៈការទិញទំនិញដែលមានតម្លៃថ្លៃ ។
លោកបន្ថែមថា ៖« ប្រជាពលរដ្ឋដែលមានជីវភាពក្រីក្រ ចង់មានជីវភាពធូរធារ គួរងាកមកទទួលសេវាកម្មដ៏សម្បូរបែបរបស់ធនាគារដែលមានការទទួលស្គាល់ពីធនាគារជាតិនៃកម្ពុជា និងកុំមានការសង្ស័យទៅលើប្រព័ន្ធហិរញ្ញវត្ថុ ព្រោះថាដោយសារការមិនទុកចិត្ត មិនហ៊ានទទួលសេវាកម្មរបស់វិស័យហិរញ្ញវត្ថុនេះហើយ ជាមូលហេតុចម្បងធ្វើឲ្យភាពក្រីក្ររបស់ប្រជាពលរដ្ឋនៅតែមាន » ។
គួបញ្ជាក់ថា រហូតមកដល់បច្ចុប្បន្នធនាគារសហពាណិជ្ជ បានពង្រីកសាខារបស់ខ្លួនបានចំនួន១៣ហើយ ដោយក្នុងនោះ៩នៅរាជធានីភ្នំពេញ និង៤ទៀតមាននៅខេត្តកណ្តាល សៀមរាប បាត់ដំបង និងក្រុងព្រះសីហនុ ។
ជាមួយនឹងសាខាថ្មីនៅស្ទឹងមានជ័យនេះធនាគារសហពាណិជ្ជបានប្រកាសផ្តល់សេវាឥណទានខ្នាតធំចាប់ពី៥០ម៉ឺនដុល្លារឡើងទៅ ដើម្បីជាការសម្របសម្រួលដល់ភាពមមាញឹកដល់ ស្នាក់ការកណ្តាល និងការជំរុញសកម្មភាពឲ្យមានប្រសិទ្ធដល់អតិថិជន ៕
ចែករំលែកព័តមាននេះ