រាជធានីភ្នំពេញ ៖ ក្នុងឆ្នាំ២០១៦ ប្រជាពលរដ្ឋកម្ពុជា បានចំណាយប្រាក់៦០០លានដុល្លារអាមេរិក ដើម្បីធ្វើដំណើរទេសចរណ៍ និងពិនិត្យព្យាបាលសុខភាពនៅក្រៅប្រទេស។ នេះបើយោងតាមមន្ត្រីជាន់ខ្ពស់ក្រសួងទេសចរណ៍ ។
លោក ថោង ខុន រដ្ឋមន្ត្រីក្រសួងទេសចរណ៍បានថ្លែងឲ្យដឹងតាមទូរស័ព្ទនាព្រឹកថ្ងៃទី៣០ ធ្នូកន្លងមកថា ប្រជាពលរដ្ឋចេញដំណើរទៅក្រៅប្រទេសនៅឆ្នាំ២០១៦ ស្ថិតក្នុងរង្វង់១,២លាននាក់ កើនឡើងចន្លោះ២៣ទៅ២៥ភាគរយ បើធៀបរយៈពេលដូចគ្នាកាលពីឆ្នាំមុន ។ លោកបន្តថា ក្នុងចំណោមភ្ញៀវក្នុងស្រុកទាំងនោះ មាន៥០ភាគរយ ទៅពិនិត្យសុខភាពនៅប្រទេសថៃ និងវៀតណាម ក្រៅពីនោះពួកគេជាភ្ញៀវទេសចរដែលទៅកម្សាន្ដនៅ ម៉ាឡេស៊ី សិង្ហបុរី ហុងកុង កូរ៉េ ជប៉ុន និងបណ្តាប្រទេសក្នុងនិងក្រៅតំបន់មួយចំនួនទៀត ។
លោកថ្លែងថា ៖ «គិតជាមធ្យមមនុស្សម្នាក់ចំណាយ៥០០ដុល្លារ ដូច្នេះក្នុងចំណោមប្រជាពលរដ្ឋកម្ពុជា១,២លាននាក់ ពួកគេចំណាយប្រាក់សរុបរហូតដល់ប្រមាណ៦០០លានដុល្លារអាមេរិក »។ លោកបន្តថា៖ « កំណើនភ្ញៀវទេសចរទៅទស្សនានៅក្រៅប្រទេសឆ្លុះបញ្ចាំងពីការកើនឡើងនូវកម្រិតជីវភាពរបស់ប្រជាពលរដ្ឋកាន់តែប្រសើរឡើង ព្រោះបើគ្មានប្រាក់ ពួកគេមិនអាចដើរកម្សាន្ដបាននោះទេ »។
លោក ថោង ខុន បានបន្តថា ការកើនឡើងរបស់ភ្ញៀវក្នុងស្រុក ទៅទស្សនានៅក្រៅប្រទេស ជារឿងធម្មតា មិនមែនជាការបង្ហូរឈាមចូលទៅប្រទេសគេនោះទេ ព្រោះភ្ញៀវទេសចរមកពីប្រទេសគេ ក៏បានមកទស្សនាកម្ពុជាច្រើនផងដែរនៅកម្ពុជា ។ នេះជារឿងធម្មតាក្នុងវិស័យទេសចរណ៍ ។
លោក ធួន ស៊ីណាន ប្រធានសហព័ន្ឋទេសចរណ៍កម្ពុជា បានយល់ស្របនឹងការលើកឡើងខាងលើ ដោយលោកបានថ្លែងថា ក្នុងចំណោមពលរដ្ឋកម្ពុជាម្នាក់ ពួកគេចំណាយប្រាក់ចន្លោះពី៥០០ ទៅ៦០០ដុល្លារនៅក្រៅប្រទេស គិតជាមធ្យម ប៉ុន្តែលោកបានគិតថា ចំនួនប្រជាពលរដ្ឋទៅទស្សនានៅក្រៅប្រទេសរហូតដល់១,២លាននាក់ ហាក់ដូចជាមានទំហំធំពេក ។
លោកថា៖ «ខ្ញុំមិនហ៊ាននិយាយថា ការកើនឡើងនៃភ្ញៀវទៅទស្សនានៅក្រៅប្រទេសដោយសារជីវភាពប្រសើរឡើងទេ ប៉ុន្តែកំណើននេះដោយសារការរីកចំរើននៃបច្ចេកវិទ្យា ដែលធ្វើឲ្យប្រជាពលរដ្ឋចង់ស្វែងយល់ និងទៅទស្សនាការរីកចម្រើននៅស្រុកគេ» ។
ប្រធានសមាគមទីភ្នាក់ងារទេសចរណ៍កម្ពុជាលោកស្រី ឆាយ ស៊ីវលីន បានថ្លែងថា ចំនួនភ្ញៀវក្នុងស្រុកទៅទស្សនានៅក្រៅប្រទេស ពិតជាមានការកើនឡើងច្រើន មានន័យថា ពួកគេកាន់តែមានការយល់ដឹងច្រើនជាងមុន ហើយពួកគេទៅស្វែងយល់ពីការរីកចម្រើននៅប្រទេសរបស់គេ និងពិតជាមានប្រយោជន៍ណាស់ ដែលពួកគេអាចទៅមើល និងបានរៀនសូត្រត្រលប់មកវិញថា គេធ្វើអ្វី ដើម្បីកែប្រែឥរិយាបទរបស់ខ្លួន ទាក់ទងនឹងការធ្វើចរាចរណ៍ ក៏ដូចជាកុំបោះចោលសំរាមពាសវាលពាសកាលជាដើម ។
លោកស្រីបន្តថា៖ « ប្រជាពលរដ្ឋអាចមើលឃើញការរីកចម្រើននៅស្រុកគេ និងផ្លាស់ប្តូរឥរិយាបទរបស់ខ្លួន មានស្មារតីគោរពច្បាប់ដោយខ្លួនឯង ជាការប្រសើរណាស់ ព្រោះការឲ្យពួកគេភ្ញាក់រលឹកដោយខ្លួនឯង ប្រសើរជាងចាប់បង្ខំ »។
លោកស្រីបន្តថា៖ «ឥឡូវពួកគេបានផ្លាស់ប្តូរឥរិយាបទច្រើន ប៉ុន្តែលទ្ធផលមិនទាន់បានល្អ ដូចអ្វីដែលយើងរំពឹងទុកនោះទេ »៕
ចែករំលែកព័តមាននេះ