គ្រោះថ្នាក់ចរាចរណ៍ឆ្នាំ២០១៦ ថយចុះ១១% សម្លា.ប់មនុស្ស ១៧១៧នាក់
រាជធានីភ្នំពេញ ៖ មនុស្ស ១៧១៧នាក់បានស្លា.ប់និងរបួស៦៦០៧នាក់ (ធ្ងន់៥៩%) ដោយសារគ្រោះថ្នាក់ចរាចរណ៍ចំនួន ៣៧០០លើក
រាជធានីភ្នំពេញ ៖ មនុស្ស ១៧១៧នាក់បានស្លាប់និងរបួស៦៦០៧នាក់ (ធ្ងន់៥៩%) ដោយសារគ្រោះថ្នាក់ចរាចរណ៍ចំនួន ៣៧០០លើក កើតឡើងនៅទូទាំងប្រទេសកម្ពុជាកាលពីឆ្នាំ២០១៦ ។
តួលេខនេះ បានបង្ហាញឡើងនៅក្នុងកិច្ចប្រជុំបូកសរុបលទ្ឋផលត្រួតពិនិត្យការអនុវត្តច្បាប់ស្តីពីចរាចរណ៍ផ្លូវគោកប្រចាំឆ្នាំ២០១៦ និងទិសដៅការងារឆ្នាំ២០១៧ របស់គណៈកម្មាធិការជាតិដើម្បីសុវត្ថិភាពចរាចរណ៍ផ្លូវគោក ដែលបាននិងកំពុងប្រព្រឹត្តធ្វើនៅសណ្ឋាគារសូហ្វីតែលភូគីត្រា នាព្រឹកថ្ងៃទី០២ មករា ២០១៧ ក្រោមអធិបតីភាពសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ។
ក្នុងគ្រោះថ្នាក់ចរាចរណ៍ទាំង៣៧០០លើកខាងលើ ភាគច្រើនជាអ្នកបើកបរម៉ូតូមានរហូតដល់៧៤% ស្លាប់១២៧៤នាក់ ក្នុងនោះមិនពាក់មួកសុវត្ថិភាពមានចំនួន៩៧៦នាក់ស្មើនឹង៥៧% ។
បើតាមរបាយការណ៍ដែលត្រូវបានបង្ហាញឡើងនៅព្រឹកថ្ងៃចន្ទដដែលនេះក៍បានបញ្ជាក់ទៀតថា មូលហេតុដែលបង្កឲ្យកើតមានគ្រោះថ្នាក់ចរាចរណ៍ បណ្តាលមកពីល្មើសល្បឿន៤៤% មិនប្រកាន់ស្តាំ១២% ស្រវឹង១២% មិនគោរពសិទ្ធិអាទិភាព៩% វ៉ាជែង១២% បត់ក្នុងស្ថានភាពគ្រោះថ្នាក់៧% កត្តាយានយន្ត៣% និងងងុយដេក២% ។
យ៉ាងណាក៍ដោយ គ្រោះថ្នាក់ចរាចរណ៍នៅក្នុងឆ្នាំ២០១៦កន្លងទៅ បើប្រៀបធៀបទៅនឹងឆ្នាំ២០១៥ មានការថយចុះចំនួន៤៤៣លើក ស្មើនឹង១១% អ្នកស្លាប់ថយចុះ២៧១នាក់ស្មើនឹង១៤% និងអ្នករបួសថយចុះ៥៤២នាក់ ស្មើនឹង៨% ៕
ចែករំលែកព័តមាននេះ