អាស៊ីតខ្លាញ់អូមេហ្គា3 ដែលគេស្គាល់ថាជាអាស៊ីតខ្លាញ់ N-3 គឺជាអាស៊ីតខ្លាញ់មិនឆ្អែតដែលមានសារៈសំខាន់សម្រាប់សុខភាពទូទៅ។ អាស៊ីតខ្លាញ់ក្នុងកម្រិតទាប ឬមិនគ្រប់គ្រាន់អាចនាំឱ្យមានបញ្ហាកង្វះសារធាតុចាំបាច់ក្នុងរាងកាយ ។ កង្វះនៃសារធាតុចិញ្ចឹមអាចជាការបង្កគ្រោះថ្នាក់ដល់សុខភាពរបស់អ្នកនិងបង្កឱ្យមានបញ្ហាសុខភាពជាច្រើន ។ ខាងក្រោមនេះជាបញ្ហាមួយចំនួនដែលបង្ហាញថា រាងកាយរបស់អ្នកត្រូវការអាស៊ីតខ្លាញ់អូមេហ្គា3 បន្ថែមទៀត៖
១-បញ្ហាបេះដូង ៖ តួនាទីរបស់អាស៊ីតខ្លាញ់អូមេហ្គា3 នៅក្នុងជំងឺសរសៃឈាមបេះដូងគឺមានសារៈសំខាន់។ ក្រុមអ្នកជំនាញបានណែនាំឲ្យទទួលទានរបបអាហារដែលមានកម្រិតជាតិខ្លាញ់ឆ្អែតទាប និងអាហារដែលសម្បូរទៅដោយជាតិខ្លាញ់ polyunsaturated និង monounsaturated (រួមទាំងអាស៊ីតខ្លាញ់អូមេហ្គា3) ដើម្បីបង្ការជំងឺបេះដូង។ អាស៊ីតខ្លាញ់អូមេហ្គា3 ជួយកាត់បន្ថយកត្តាហានិភ័យនៃជំងឺបេះដូងរួមមានកូឡេស្តេរ៉ុល និងសម្ពាធឈាមឡើងខ្ពស់ ដោយកាត់បន្ថយការកកើតបន្ទះខ្លាញ់ និងកំណកឈាម ដែលអាចធ្វើឱ្យស្ទះសរសៃឈាមអារទែ ។ វាជាការសំខាន់ក្នុងការកាត់បន្ថយហានិភ័យនៃជំងឺគាំងបេះដូង ជំងឺដាច់សរសៃឈាមខួរក្បាល និងចង្វាក់បេះដូងមិនធម្មតា ចំពោះអ្នកដែលមានហានិភ័យខ្ពស់នៃការកើតជំងឺបេះដូង ។
២-បញ្ហាផ្លូវចិត្ត ៖ អាស៊ីតខ្លាញ់អូមេហ្គា 3 ដែលត្រូវបានគេចាត់ទុកថាមានសារសំខាន់សម្រាប់ការចងចាំ និងសុខភាពផ្លូវចិត្ត។ ពួកវាជួយបង្កើតភ្នាសកោសិកានៅក្នុងខួរក្បាល ដែលមានសារៈសំខាន់សម្រាប់សុខភាពខួរក្បាល ។ ដូច្នេះហើយការទទួលទានអាស៊ីតខ្លាញ់អូមេហ្គា3 មានសារៈសំខាន់សម្រាប់មុខងាររបស់ខួរក្បាល។ ការទទួលទានអាស៊ីតខ្លាញ់អូមេហ្គា3 ក្នុងកម្រិតទាបអាចនាំឱ្យមានជំងឺ ADHD និងការសិក្សាធ្លាក់ចុះ ។
៣-ជំងឺបាក់ទឹកចិត្ត ៖ អាស៊ីតខ្លាញ់អូមេហ្គា 3ជាពិសេសប្រភេទ EPA និង DHA គឺមានប្រសិទ្ធភាពខ្ពស់ក្នុងការការពារ និងគ្រប់គ្រងជំងឺបាក់ទឹកចិត្ត ។ ការទទួលទានជាតិខ្លាញ់នេះមិនគ្រប់គ្រាន់អាចបង្កើនហានិភ័យនៃជំងឺបាក់ទឹកចិត្ត ព្រមទាំងធ្វើឲ្យរោគសញ្ញានៃជំងឺនេះវិវឌ្ឍកាន់តែអាក្រក់ ។
៤-បញ្ហាគំហើញ ៖ ការមានបញ្ហាភ្នែកគឺជារោគសញ្ញាមួយផ្សេងទៀតនៃការខ្វះអាស៊ីតខ្លាញ់អូមេហ្គា3 ។ អាស៊ីតខ្លាញ់នេះគឺជាសមាសភាគសំខាន់នៃម៉ូលេគុលជាតិខ្លាញ់ ដែលជួយធ្វើឲ្យភ្នែករបស់អ្នកមានសុខភាពល្អ ។ ពួកវាក៏ជួយធ្វើឲ្យប្រព័ន្ធបង្ហូរសារធាតុរាវខាងក្នុងភ្នែកធ្វើការបានត្រឹមត្រូវផងដែរ ដូច្នេះវាអាចបន្ថយហានិភ័យនៃការមានសម្ពាធខ្ពស់ និងជំងឺដក់ទឹកក្នុងភ្នែក ។ ជំងឺស្ងួតគ្រាប់ភ្នែកក៏មានទំនាក់ទំនងទៅនឹងបញ្ហាកង្វះអាស៊ីតខ្លាញ់អូមេហ្គា3ផងដែរ ។
៥-ការរលាក និងការឈឺសន្លាក់ ៖ បញ្ហាអាស៊ីតខ្លាញ់អូមេហ្គា3 មិនគ្រប់គ្រាន់ក្នុងរាងកាយអាចនាំឱ្យមានការរលាកសន្លាក់ ដែលអាចបង្កឱ្យមានជំងឺរលាកសន្លាក់រ៉ាំរ៉ៃ ។ អាស៊ីតខ្លាញ់អូមេហ្គា3 មានលក្ខណសម្បត្តិប្រឆាំងនឹងការរលាក ដែលអាចជួយកាត់បន្ថយការឈឺចាប់និងការរលាកក្នុងរាងកាយ ។ អាស៊ីតខ្លាញ់នេះក៏ជួយកាត់បន្ថយការរឹងសន្លាក់ និងបន្ថយតម្រូវការនៃការប្រើប្រាស់ថ្នាំផងដែរ ៕
ចែករំលែកព័តមាននេះ